Save
Lukaotem fasin blong lanem samting, tru long stadi mo tu, tru long fet (luk long D&C 88:118).
Oltaem bae mi lukaot blong tekem ol janis blong lanem samting mo kam antap.
Ol Valiu Eksperiens we Yu Mas Mekem
Komplitim ol tri valiu eksperiens we yu mas mekem. Mekem papa, mama o wan lida blong yu i saenem mo i putum deit long wanwan long eksperiens ia afta we yu finisim olgeta.
-
Lanem olsem wanem nao i impoten blong kasem save taem yu ridim Ol Proveb 1:5; 4:7; 2 Nifae 28:30; mo Doctrine and Covenants 88:78–80, 118; 90:15; 130:18–19; 131:6. Tingbaot from wanem nao yu nidim blong kasem save mo andastaning abaot olsem wanem nao yu save yusum ol gospel prinsipol long hom mo famle laef blong yu blong tedei mo blong fiuja. Raetem insaed long jenol blong yu wanem nao yu bin lanem abaot save mo toktok raon long hem wetem wan memba blong famle blong yu o wan Yang Woman lida.
-
Long jenol blong yu, listim ol talen we yu yu gat mo ol nara talen we yu wantem blong developem. Ridim Matiu 25:14–30. Lanem wan niu skil o talen we bae i helpem yu blong yu lukaotem fiuja famle o hom blong yuwan (eksampol, plei long piano, singsing, mekem bajet, yusum gud taem, kuk, somap, o lukaotem pikinini). Serem wanem yu bin lanem wetem famle, klas o Yang Woman lida blong yu.
-
Lanem baehat nambatetin Toktok blong Bilif mo ridim long papa, mama, wan lida, o wan nara adalt. Afta visitim wan miusium o wan so, o go long wan so we i gat danis, miusik, toktok, o drama long hem. Yusum toktok blong bilif ia olsem wan gaed blong yu long evri samting we yu mekem blong Tabu Spirit i save stap olsem kompanion blong yu oltaem. Serem ol tingting ia wetem wan papa, mama o wan lida.
Sam Moa Valiu Eksperiens
Komplitim tri moa valiu eksperiens. Yu save jusum folem ol tingting we i stap ia o raetem tu (2) blong yuwan nomo. Papa, mama o wan lida blong yu i mas givim raet blong yu wok long ol eksperiens ia we yuwan yu raetem bifo yu save stat blong wok long olgeta. Mekem papa, mama o wan lida blong yu i saenem mo i putum deit long wanwan long ol eksperiens ia afta we yu finisim olgeta.
-
Jusum wan gospel prinsipol we yu wantem andastanem moa gud (eksampol, fet, fasin blong sakem sin, jareti, ol famle we i no save finis, o ol kavenan blong baptaes). Ridim ol skripja mo ol toktok blong ol profet blong lata-dei abaot prinsipol ia. Rere long wan toktok blong faef minit long topik ia, mo givim wan toktok long sakramen miting, long wan miting blong Yang Woman, long famle blong yu, o long klas blong yu. Rekodem long jenol blong yu olsem wanem yu save yusum gospel prinsipol ia long laef blong yu.
-
Lanem abaot wan wok o wan seves we yu gat intres long hem. Toktok long wan we i wok long eria ia, mo faenemaot wanem nao ol responsabiliti blong hem, wanem trening o edukesen hem i bin kasem blong tekemap wok ia, mo wanem nao ol kontribusen we hem i stap mekem i go long sosaeti. Rekodem ol samting we yu faenem long jenol blong yu.
-
Lanem baehat tu (2) hym we yu laekem we i stap long Singsing Tabu mo Singsing blong Ol Pikinini. Lanem stret fasin blong lidim ol hym (luk long Hymns, 383–85) mo afta kondaktem ol hym ia tu (2) taem long wan famle haos naet, long wan Yang Woman o nara Jos miting, o long Seminari.
-
Long wan kamp blong Yang Woman, lanem wan skil long fas help, sefti, fasin blong stap klin, mo olsem wanem blong save stap laef. Luklukbak long ol tijing long Young Women Camp Manual blong yu mo raetem daon long jenol blong yu olsem wanem yu save yusum olgeta long hom blong yu blong kipim famle blong yu oli stap sef. Developem wan lis blong ol simpol saplae we famle blong yu bae i nidim sapos i gat wan imejensi. Tijim wan lesen long famle haos naet o serem wanem yu bin lanem long wan Yang Woman lida mo wanem sam moa skil we yu wantem blong lanem blong yu save rere from ol taem blong imejensi.
Ol Valiu Eksperiens blong Miwan
Valiu Projek
Afta we yu komplitim ol sikis valiu eksperiens blong save ia, mekem wan projek we bae i helpem yu blong praktisim wanem nao yu bin lanem. Hemia bae i wan impoten hadwok we bae i tekem yu samples ten aoa blong yu komplitim. Wetem prea, lukaotem Tabu Spirit blong i lidim yu blong jusum wan projek we i gat mining blong hem
Mekem papa, mama o wan lida i givim raet long projek blong yu bifo yu statem. Raetem wan evaluesen afta yu finis. I gat sam tingting blong wan valiu projek we i stap daon ia.
-
Lanem long mama, bubuwoman blong yu, o wan nara woman we yu laekem, olsem wanem blong oganaesem, klinim, o lukaotem wan hom. Afta, yusum wanem yu bin lanem long hom blong yu.
-
Rere blong kasem wan hae edukesen mo kasem ol skil we plante pipol oli wantem tru long fasin blong stap lanem olsem wanem nao blong save go insaed long kolej o ol tes blong mekem blong go long ol skul blong bisnis, olsem wanem blong kasem ol skolasip, ol skul fi mo ol nara samting blong spendem. Aplae blong go insaed long wan skul long stret taem blong skul i stat.
-
Ridim Doctrine and Covenants 89. Tingting long wanem yu save mekem blong stap helti long saed blong bodi. Kam antap long helt blong yu taem yu planem mo mekem wan program blong fitnes mo lan blong kuk mo kakae ol kaekae we oli helti.
-
Lanem abaot stret wei blong kea long ol klos, mo tu olsem wanem blong wasem, aeanem, mo mekem ol simpol ripea mo jenis long ol klos. Yusum ol skil we yu bin lanem taem yu tekem kea long ol klos blong yu.
-
Wok wetem mama, bubuwoman, o wan sista insaed long wod o branj blong yu, blong lanem fulwan mo mekem wan homeking skil, we hem nao bae i tijim yu long hem.
Projek blong mi hem i:
Plan blong mi blong tekemaot projek ia hem i:
I givim raet
Deit we yu ting se bae yu komplitim projek
Evaluesen blong mi long saed blong projek ia hem i (putum olsem wanem yu bin filim, mo olsem wanem andastaning blong yu long save, i bin kam antap):
Papa, mama o lida i saen
Deit:
Ol aoa we mi spendem