Klin fasin

I strong tumas blong man we i wantem mared i faenem wan gel we fasin blong hem i stret, mo we i save wokem evri samting. Praes blong woman olsem i antap we i antap, i winim praes blong ol flas ston ia perel (Ol Proveb 31:10).

Bae mi rere blong go insaed long tempol mo stap gohed blong stap klin gud mo klin inaf.

Ol tingting mo ol aksen blong mi bae i stanap folem ol hae standet blong laef.

Ol Valiu Eksperiens we Yu Mas Mekem

Komplitim olgeta fofala valiu eksperiens ia we yu mas mekem. Mekem papa, mama o wan lida blong yu i saenem mo i putum deit long wanwan long olgeta afta we yu finisim olgeta.

1. Klin fasin hem i wan paten blong tingting mo fasin we i kamaot long ol hae standet blong laef. Hem i gat tu insaed jastiti mo fasin blong stap klin. Paoa blong krietem laef long wol ia hem i wan paoa blong God we Hem i bin givim long ol pikinini blong Hem. Hem i bin komandem se paoa ia, bae wan man mo wan woman nomo i save yusum, taem tufala i mared wetem raet olsem wan hasban mo waef. Stadi long mining mo olsem wanem jastiti mo klin fasin tufala i impoten tumas taem yu ridim Jekob 2:28; “Famle: Wan Ofisol Toktok I Go Long Wol” (luk long pej 101); mo seksen blong stap klin long saed blong seks long buk ia, Blong Ol Yut Oli Kam Strong. Mo tu ridim nambatetin Toktok blong Bilif mo Ol Proveb 31:10–31. Long jenol blong yu raetem daon ol blesing we oli bin promesem taem yu stap klin long saed blong seks mo komitmen blong yu blong stap klin.

2. Laef long klin fasin “long evri taem mo long evri samting, mo long evri ples” i mekem yu kwalifae blong stap gat kompanionsip blong Tabu Spirit oltaem. Taem yu baptaes mo kasem konfemesen, oli bin givim presen we i Tabu Spirit blong i gaedem yu long evri pat blong laef blong yu. From se Tabu Spirit i no save stap long ol tabenakol we i no klin, mekem se yu mas laef long wan klin laef blong yu save gat kompanionsip blong Tabu Spirit mo kasem ol blesing blong ol tempol odinens. Ridim ol skripja refrens ia mo faenemaot ol blesing we oli bin promesem: Jon 14:26–27; 15:26; 2 Nifae 32:1–5; mo Doctrine and Covenants 45:57–59; 88:3–4; 121:45–46. Long jenol blong yu rekodem wanem yu bin lanem, mo raetem daon wan taem we yu bin filim givhan blong Tabu Spirit.

3. Rere blong stap klin inaf blong go insaed long tempol mo blong tekem pat long ol odinens blong tempol. Ridim Alma, japta 5. Mekem wan lis blong ol kwestin we Alma i bin askem. Ansa long ol kwestin ia blong yuwan, mo mekem wan lis blong ol samting we yu save mekem mo bae yu mekem blong mekem yu rere blong stap klin evriwan mo stap klin inaf blong go insaed long tempol mo kasem evri blesing we Papa long Heven i bin promesen long ol gel blong Hem we Hem i lavem tumas.

4. From we Sevya i lavem yu mo i bin givim laef blong Hem from yu, yu yu save sakem sin. Fasin blong sakem sin hem i wan wok blong fet long Jisas Kraes. Ridim Moronae 10:32–33, buk blong Inos, mo seksen abaot fasin blong sakem sin we i stap long buk ia, Blong Ol Yut Oli Kam Strong. Bigfala sakrifaes blong Sevya blong pemaot man i bin mekem i posibol blong yu save kasem fogivnes from ol sin blong yu. Ridim ol prea blong sakramen long Doctrine and Covenants 20:77, 79. Tingting blong yu save kam klin inaf blong tekem pat long sakramen evri wik mo fulumap laef blong yu wetem ol klin aktiviti we bae oli karem paoa long saed blong spirit i kam. Taem yu mekem samting ia, bae yu gro strong long paoa blong yu blong stanap strong long temtesen, kipim ol komanmen, mo kam olsem Jisas Kraes. Faenemaot wanem yu save mekem evri dei blong stap klin oltaem, mo raetem plan blong yu long jenol blong yu.

Valiu Projek

Yu save statem valiu projek ia we oli askem yu blong mekem long eni taem.

Sevya i bin jusum blong laef long wan klin laef. Folem woning blong Hem blong lanem abaot Hem (luk long D&C 19:23) taem yu ridim ful Buk blong Momon: Wan Narafala Testeman blong Jisas Kraes. Yusum ol skripja long laef blong yu mo ol situesen blong yu. Taem yu stap rid, rekodem ol tingting blong yu oltaem long jenol blong yu. Tekem not long eksampol blong Sevya. Wanem nao Hem mo olgeta we oli bin folem Hem oli bin mekem blong stap long ol klin laef? Taem yu ridim finisim Buk blong Momon ia, rekodem testemoni blong yu.

“Mi bin talem long ol brata se Buk blong Momon i moa stret long eni narafala buk long wol, mo i ki ston blong [relijin] blong yumi, mo wan man bae i kam moa kolosap long God sapos hem i folem ol tijing blong hem, bitim eni narafala buk” (Josef Smit, long fas toktok blong Buk blong Momon).

Testemoni blong mi abaot Buk blong Momon

Mo taem we bae yufala i kasem ol samting ia, mi wantem askem strong long yufala se bae yufala i askem God, Papa we i No Save Finis, long nem blong Kraes, sapos ol samting ia i no tru; mo sapos bae yufala i askem wetem wan tru hat, wetem tingting we i tru blong wantem save, wetem fet long Kraes, bae hem i soemaot trutok blong ol samting ia long yufala, tru long paoa blong Tabu Spirit (Moronae 10:4).

Papa, mama o lida i saen

Deit:

Ol aoa we mi spendem