Fet

Fet i no blong gat wan stret save long ol samting; taswe, sapos yufala i gat fet, yufala i hop long ol samting we yufala i no save lukim, we oli tru (Alma 32:21).

Mi, mi gel blong Papa blong Heven, we Hem i lavem mi tumas. Mi gat fet long plan blong Hem we i no save finis, we senta blong Hem i Jisas Kraes, Sevya blong mi.

Ol Valiu Eksperiens we Yu Mas Mekem

Komplitim ol tri valiu eksperiens we yu mas mekem. Mekem papa o mama o wan lida blong yu i saenem mo i putum deit long wanwan long olgeta afta we yu finisim olgeta.

1. Fas prinsipol blong gospel hem i fet long Lod Jisas Kraes. Lanem abaot fet long ol skripja mo long ol profet we oli stap laef. Ridim Hibrus 11; Alma 32:17–43; Ita 12:6–22; mo Joseph Smith—History 1:11–20. Ridim tu (2) toktok blong jeneral konfrens abaot fet. Yusum fet blong yuwan taem yu statem wan fasin blong mekem prea long laef blong yu. Stat blong mekem prea blong yu long moning mo naet oltaem. Afta we yu folem paten ia blong tri wik, toktok raon wetem wan papa o mama o wan lida wanem yu bin lanem abaot fet mo olsem wanem evri dei prea blong yuwan i bin mekem fet blong yu i kam moa strong. Long jenol blong yu talemaot ol filing blong yu abaot fet mo prea.

2. Faenemaot ol prinsipol blong fet we ol mama blong ol soldia blong Hileman oli bin tijim. Ridim Alma 56:45–48 mo 57:21. Luklukbak long wanem we “Famle: Wan Ofisol Toktok I Go long Wol” (luk long pej 101) i talem abaot rol blong wan mama. Wetem wan mama, wan bubuwoman, o wan lida, toktok raon long ol kwaliti we wan woman i nidim blong tijim ol pikinini blong hem blong gat fet mo blong putum ol tingting blong olgeta nomo long ol trutok blong gospel. Olsem wanem nao ol prinsipol ia oli save helpem yu long laef blong yu tedei mo i save helpem yu blong rere blong save kam wan fetful woman, waef, mo mama? Rekodem ol tingting mo filing blong yu insaed long jenol blong yu.

3. Blong laef folem ol prinsipol blong gospel, i nidim fet. Rid abaot fet long Baebol Diksonari o Stap Tru long Fet. Fet long Sevya Jisas Kraes i lid i go long aksen. Jusum wan prinsipol olsem prea, taeting, livim kakae, fasin blong sakem sin, o kipim Sabat dei i tabu. Long hom blong yu o long wan nara ples, planem mo prisentem wan lesen long famle haos naet long olsem wanem nao fet i helpem yu blong laef folem gospel prinsipol ia. Sapos i posibol, askem wan memba blong famle blong serem wan eksperiens we i mekem fet blong hem i kam strong moa. Serem ol eksperiens blong yuwan tu. Long jenol blong yu, raetem daon wan long ol eksperiens ia mo raetem ol filing blong yu abaot fet.

Sam Moa Valiu Eksperiens

Komplitim tri moa valiu eksperiens. Yu save jusum folem ol tingting we i stap ia o raetem tu (2) blong yuwan nomo. Papa, mama o wan lida blong yu i mas givim raet blong yu wok long ol eksperiens ia we yuwan yu raetem bifo yu save stat blong wok long olgeta. Mekem papa, mama o wan lida blong yu i saenem mo i putum deit long wanwan eksperiens afta we yu finisim olgeta.

4. Lanem moa abaot sakramen. Ridim abaot Las Kaekae long Matiu 26:26–28; Mak 14:22–24; mo Luk 22:17–20. Statem wan paten blong tingting hevi long taem blong sakramen taem yu lisin gud long sakramen hym mo ol sakramen prea. Tingbaot from wanem nao yumi tekem bred mo wota. Afta tri wik we yu folem paten ia, raetem long jenol blong yu sam long ol promes we yu bin mekem taem yu tekem pat long sakramen mo tingbaot ol kavenan blong yu blong baptaes mo wanem yu stap mekem blong kipim ol promes ia. Rekodem long jenol blong yu olsem wanem save blong yu long ol promes ia oli bin mekem fet blong yu long Sevya i bin kam moa strong.

5. Blong leftemap andastaning blong yu abaot Atonmen blong Jisas Kraes, ridim Aesea 53:3–12; Jon 3:16–17; Rom 5; 2 Nifae 9:6–7, 21–26; Alma 7:11–13; 34:8–17; mo Doctrine and Covenants 19:15–20. Long jenol blong yu raetem daon ol filing blong yu abaot Sevya mo wanem Hem i bin mekem blong yu. Serem ol filing blong yu long wan testemoni miting.

6. Blong leftemap andastaning blong yu long plan blong fasin blong sevem man. Ol buk blong stadi oli tekem tugeta 1 Korin 15:22; Revelesen 12:7–9; 2 Nifae 9:1–28; 11:4–7; Doctrine and Covenants 76:50–113; 93:33–34; Moses 4:1–4; mo Abraham 3:24–27. Droem o kasem wan pikja we i soem plan blong fasin blong sevem man, mo i mas tekem laef bifo laef long wol ia, taem yumi bon, laef long wol ia, ded, jajmen, mo laef afta long jajmen. Wetem pikja ia, eksplenem plan blong fasin blong sevem man long klas blong yu, famle blong yu o wan fren. Toktok raon long olsem wanem nao save long plan blong fasin blong sevem man i lidim ol aksen blong yu, i helpem yu blong andastanem huia yu, mo i bin mekem fet blong yu i kam moa strong.

7. Lod i bin komandem yumi blong pem taeting. Ridim Doctrine and Covenants 119 mo Malakae 3:8–12. From se taem yumi obei long loa blong taeting hem i olsem wan pruf blong fet blong yu, pem wan ful taet. Afta tri manis, rekodem insaed long jenol blong yu, olsem wanem nao we taem yu bin pem taeting i bin helpem fet blong yu blong i gro. Listim ol blesing blong laef blong yu, evriwan long olgeta, smol o bigwan, we i bin kam from fet blong yu long prinsipol blong taeting.

Ol Valiu Eksperiens blong Miwan

Valiu Projek

Afta we yu komplitim ol sikis valiu eksperiens blong fet, mekem wan projek we bae i helpem yu blong praktisim wanem nao yu bin lanem. Hemia bae i wan impoten hadwok we bae i tekem yu samples ten aoa blong yu finisim. Wetem prea, lukaotem Tabu Spirit blong i lidim yu blong jusum wan projek we i gat mining long hem.

Mekem papa o mama o wan lida i givim raet long projek blong yu bifo yu statem. Raetem wan evaluesen afta yu finis. I gat sam tingting blong wan valiu projek we i stap daon ia.

• Lanem baehat “Kraes we I Laef” (luk long pej 102). Taem yu mekem olsem, tingbaot olsem wanem paoa blong Sevya long laef blong yu mo olsem wanem fet blong yu long Hem i bin kam antap. Praktis blong stap folem eksampol blong Sevya.

• Ridim Alma 32:28–43. Tingbaot fet olsem wan sid taem yu stap help blong planem, lukaotem, mo tekem ol kaekae long wan garen blong ol vejetebol. Rekodem long jenol blong yu olsem wanem yu save fidim, kea long, mo mekem fet blong yu i kam moa strong.

• Tekem wan famle histri klas long wod o branj blong yu. Tekem ol stori blong ol famle blong yu o ol nara pipol we oli bin soemaot fet, o gat intaviu wetem ol memba blong famle blong yu o sam narawan mo rekodem ol stori blong olgeta.

• Tokbaot ol blesing blong fet taem yu raetem wan orijinol stori, poem, o singsing o taem yu komplitim wan pikja art projek we i soemaot fet blong yu long Jisas Kraes.

Projek blong mi hem i:

Plan blong mi blong tekemaot projek ia hem i:

I givim raet

Deit we yu ting se bae yu komplitim projek

Evaluesen blong mi long projek ia hem i (putum tu olsem wanem yu bin filim mo olsem wanem save blong yu abaot fet i bin kam antap):

Papa, mama o lida i saen

Deit:

Ol aoa we mi spendem