Ol Gudfala Wok

Taswe letem laet blong yufala i saen olsem ia long fored blong ol pipol ia, blong oli save lukim ol gudfala wok blong yufala mo leftemap nem blong Papa blong yufala we i stap long heven (3 Nifae 12:16).

Bae mi helpem ol narawan mo bildimap kingdom tru long stret mo gud seves.

Ol Valiu Eksperiens we Yu Mas Mekem

Komplitim ol tri valiu eksperiens we yu mas mekem. Mekem papa, mama o wan lida blong yu i saenem mo i putum deit long wanwan long ol eksperiens ia afta we yu finisim olgeta.

Lanem from wanem nao seves i wan stamba prinsipol blong gospel. Ridim Matiu 5:13–16; 25:34–40; Galesia 6:9–10; Jemes 1:22–27; Mosaea 2:17; 4:26; mo 3 Nifae 13:1–4. Plante taem, ol narawan i stap givim seves we yu no stap luksave, olsem rere long kaekae, rid long o lisin long ol yangfala pikinini, fiksim klos, o helpem wan brata o sista. Blong tu (2) wik, rekodem long jenol blong yu ol kwaet seves we ol famle memba blong yu o ol narawan oli mekem. Luksave mo soemaot ol seves blong olgeta long sam wei we i gat mining long hem.
Seves i wan stamba prinsipol blong famle laef. Help blong mekem wan plan blong wanem kaekae nao ol famle bae oli kakae, go karem ol kaekae, mo rere long pat blong ol kaekae ia blong tu (2) wik taem. Long taem ia helpem famle blong yu blong kam wan ples blong serem kakae. Ripotem long klas blong yu wanem yu bin lanem.
Ridim Mosaea 18:7–10, mo long jenol blong yu, listim tri wei we yu save mekem ol narawan i harem gud o yu save helpem olgeta blong go tru long ol hadtaem blong olgeta. Mekem ol samting we i stap long lis, mo talemaot long wan famle memba o wan lida abaot eksperiens blong yu mo olsem wanem nao fasin blong yu mo save blong yu i bin jenis.

Sam Moa Valiu Eksperiens

Komplitim tri moa valiu eksperiens. Yu save jusum folem ol tingting we i stap ia o raetem tu (2) blong yuwan nomo. Papa, mama o wan lida blong yu i mas givim raet blong yu wok long ol eksperiens ia we yuwan yu raetem bifo yu save stat blong wok long olgeta. Mekem papa, mama o wan lida blong yu i saenem mo i putum deit long wanwan long ol eksperiens ia afta we yu finisim olgeta.

Tijim wan lesen abaot seves long famle haos naet o long wan nara ples. Yusum ol pikja, miusik, ol eksampol, o ol drama long lesen blong yu. Bae yu wantem blong yusum lesenbuk ia Teaching, No Greater Call olsem wan risos.
Ridim Doctrine and Covenants 58:26–28. Tingting long sam wei we wan yang woman, mo tu olsem wan waef mo wan mama, i save yusum skripja ia long famle blong hem. Developem wan paten blong givim seves long laef blong yu taem yu jusum wan famle memba we yu save helpem. Givim seves long hem blong wan manis. Rekodem long jenol blong yu ol aksen blong yu mo ol filing blong yu abaot olsem wanem samting ia i bin mekem rilesensip blong yu wetem man ol woman ia i bin kam antap.
Spendem tri aoa blong givim seves aotsaed long famle blong yu. Askem wod o branj Rilif Sosaeti presiden blong yu o wan komuniti lida blong givim sam tingting blong givim seves. Olsem eksampol, yu save tekem kea long sam pikinini taem papa mo mama blong olgeta oli go long tempol; kolektem, fiksim, o mekem gud sam pleiplei o gem blong wan neseri; akseptem wan wok blong klinap long mitinghaos; o go long stoa o ridim sam stori blong wan woman o man we i mas stap long haos nomo o sam narawan we i stap long nid. Rekodem long jenol blong yu, wanem nao ol narawan oli bin mekem taem yu bin givim seves long olgeta mo rekodem sam gol blong sam nara janis blong givim seves long fiuja.
Tru long ol gudfala wok blong yu, bae ol narawan oli luk eksampol blong yu mo bae oli wantem blong save moa abaot gospel. Prea blong gat wan misinari eksperiens. Ridim Matiu 24:14; 28:19; mo Doctrine and Covenants 88:81. Invaetem wan fren we i no wan memba o wan we i no stap kam tumas long Jos blong go wetem yu long wan Jos miting o long wan aktiviti. Mekem ol nara fren blong yu oli save long hem, mo mekemsua se hem tu i tekem pat long aktiviti. Serem testemoni blong yu long gospel, mo invaetem hem blong kambak bakegen.

Ol Valiu Eksperiens blong Miwan

Valiu Projek

Afta we yu komplitim ol sikis valiu eksperiens blong ol gudfala wok, mekem wan projek we bae i helpem yu blong praktisim wanem yu bin lanem. Hemia bae i wan impoten wok we bae i tekem yu samples ten aoa blong yu komplitim. Wetem prea, lukaotem Tabu Spirit blong i lidim yu blong jusum wan projek we i gat mining long hem.

Mekem papa, mama o wan lida i givim raet long projek blong yu bifo yu statem. Raetem wan evaluesen afta yu finis. I gat sam tingting blong wan valiu projek we i stap daon ia.

Help blong mekem plan mo tekem pat insaed long wan projek blong klinim o mekem komuniti blong yu i naes.
Rere blong kam wan blong mekem samting long hom tru long fasin blong putum tugeta sam resipi blong kuk, go pem ol kaekae, mo rere blong mekem kaekae blong famle.
Wok wetem wan memba blong famle blong putum tugeta ol nem blong sam famle we oli ded finis we oli no bin memba blong Jos. Faenemaot taem we oli bon mo taem oli ded mo sendem ol nem blong olgeta i go long tempol. Help blong planem wan tempol trip mo mekem ol baptaes blong ol famle ia.
Rere blong givim seves long ol narafala man taem yu kasem trening blong wan skil we yu mas yusum long taem blong ol imejensi situesen, olsem fas help, fasin blong mekem man i pulum win bakegen, o skil blong sevem laef blong man.
Sevem ol narawan. Kam wan voluntia insaed long komuniti, putum tugeta sam samting blong mitim ol yumaniterian nid, spendem longfala taem blong help blong lukaotem ol pikinini mo ol olfala pipol, o tij long wan skul o long komuniti blong yu.

Projek blong mi hem i:

Plan blong mi blong tekemaot projek ia hem i:

I givim raet

Deit we yu ting se bae yu komplitim projek

Evaluesen blong mi long projek ia hem i (putum olsem wanem yu bin filim, mo olsem wanem save blong yu abaot ol gudfala wok, i kam antap):

Papa, mama o lida i saen

Deit:

Ol aoa we mi spendem