Stap Tru mo Strong

Oltaem bambae mi mi strong blong talem se mi mi no mekem wan samting nogud, gogo kasem we mi mi ded. Mo neva bambae mi save talem se tok ya blong yufala i stret (Job 27:5).

Bambae mi gat strong tingting blong mekem ol aksen blong mi i go wetem save blong mi abaot wanem hem i raet mo rong.

Ol Valiu Eksperiens we Yu Mas Mekem

Komplitim ol tri valiu eksperiens ia we yu mas mekem. Mekem papa, mama o wan lida blong yu i saenem mo i putum deit long wanwan long ol eksperiens ia afta we yu finisim olgeta.

Stap tru mo strong hem i wan tingting blong laef folem ol bilif mo standet blong yumi. Ridim Moronae 10:30–33 mo tingbaot wanem hem i minim blong “tanem baksaed blong yufala long evri fasin we i no olsem blong god.” Ridim pamflet ia Blong Ol Yut Oli Kam Strong. Tingting strong long olsem wanem nao ol standet blong Lod oli defren long ol standet blong wol. Rekodem long jenol blong yu, ol standet blong yuwan long saed blong ol aksen, dresap, storian, mo tu ol buk, vidio, televisen, Intanet, miusik, mobael fon, mo ol nara tul blong media. Mo tu raetem plan blong yu blong stap klin long tingting mo stap klin inaf blong go long tempol. Afta we yu kipim ol standet blong yu blong wan manis, rekodem ol filing blong yu long jenol blong yu mo gohed blong kipim komitmen blong yu.
Kondaktem wan rod blong jajem yuwan long olsem wanem yu stap tru mo strong long laef blong yu. Askem yuwan ol kwestin ia: Mi stap longwe long fasin blong tokbaot man (gosip), longwe long fasin blong talem o lisin long ol rabis fani toktok, swe mo fasin blong yusum nogud nem blong God, mo fasin blong tokbaot ol tabu samting be no tingting hevi long hem? Mi stap tru oltaem, gat klin tingting, stap ones, no stap dipen long ol narawan, mo mi mi wan we oli save trastem long wok blong skul mo ol nara aktiviti? Prea evri dei blong Tabu Spirit i helpem yu blong stap tru mo strong. Raetem insaed long jenol blong yu ol samting we yu save mekem blong kam antap long fasin blong yuwan blong stap tru mo strong mo raetem ol samting we yu save mekem blong gat wan niu fasin we yu wantem blong developem.
Sevya i stret eksampol blong stap tru mo strong; Hem i bin mekem wanem Hem i bin promesem Papa blong Hem blong Hem i mekem 3 Nifae 11:10–11. Stadi long ol laef blong sam long olgeta we oli stap insaed long ol skripja we oli stap tru mo strong. Ridim Jenesis 39; buk blong Ita; Job 2:3; 27:3–6; Daniel 3 mo 6; Ol Wok 26; Doctrine and Covenants 124:15; mo Joseph Smith—History 1:21–25. Long jenol blong yu, faenem ol wei we ol pipol ia oli bin soemaot se oli stap tru mo strong. Tingbaot wan taem we yu bin gat strong tingting blong soemaot se yu stap tru mo strong, speseli long wan taem we i no isi mo i no gat plante pipol oli bin stap. Serem eksperiens blong yu mo ol filing blong yu abaot taem ia long wan testemoni miting, o lesen, o wetem papa, mama o wan lida.

Sam Moa Valiu Eksperiens

Komplitim ol tri moa valiu eksperiens ia. Yu save jusum folem ol tingting we i stap ia o raetem tu (2) blong yuwan nomo. Papa, mama o wan lida blong yu i mas givim raet blong yu wok long ol eksperiens ia we yuwan yu raetem bifo yu save stat blong wok long olgeta. Mekem papa, mama o wan lida blong yu i saenem mo i putum deit long wanwan long ol eksperiens ia afta we yu finisim olgeta.

Lukaotem toktok ia stap tru mo strong (integrity) long wan diksonari. Intaviu mama blong yu, bubuwoman o wan nara woman we yu respektem abaot olsem wanem nao oli andastanem mo olsem wanem oli yusum toktok ia. Mekem wan lis blong ol rod we yu save mekem ol aksen blong yu oli go stret wetem save blong yu blong wanem nao hem i raet o rong, mo rekodem long jenol blong yu wanem nao i minim long yu blong stap tru mo strong.
Lanem blong stanap olsem wan witnes. Ridim Mosaea 18:9. Afta rekodem long jenol blong yu olsem wanem yuwan yu save “stanap olsem [wan witnes] blong God long evri taem mo long evri samting, mo long evri ples.” Jusum wan fasin blong yu we yu nid blong kam antap long hem blong yu save kam wan moa gud eksampol. Developem fasin blong stap tru mo strong long laef blong yu taem yu stap praktisim niu fasin ia blong yu blong tri wik. Rekodem progres blong yu long jenol blong yu.
Blong laef folem loa blong livim kaekae hem i wan janis blong praktisim fasin blong stap tru mo strong. Long wan fast Sandei, no tekem eni kaekae o dring blong tu (2) taem long wan dei mo givim mane ia i go olsem fast ofring blong famle blong yu. Gat wan stret stamba tingting long maen blong yu taem yu stap livim kaekae. Ating bae yu livim kaekae blong wan fren we i sik, o blong winim wan nogud fasin blong yu, o blong kasem wan spesel blesing blong yuwan o wan narawan, o blong givim ol tangkyu. Statem mo klosem fast blong yu wetem wan prea.
Listim ol poen, ol taem we yumi stap long hem, mo ol problem we i stap mekem famle i no strong. Ridim Fas Presidensi mesej long pej 1 blong buk ia, “Famle: Wan Ofisol Toktok I Go Long Wol” (luk long pej 101), mo seksen blong famle long Blong Ol Yut Oli Kam Strong. Afta lukaotem long ol magasin blong Jos, kaonsel blong olgeta we yumi sastenem olgeta olsem ol profet, sia, mo ol reveleta. Raetem long jenol blong yu, plan blong yu blong mekem famle blong yu naoia i kam strong mo ol valiu mo kastom we yu wantem blong setemap wetem fiuja famle blong yu.

Ol Valiu Eksperiens blong Miwan

Valiu Projek

Afta we yu komplitim ol sikis valiu eksperiens blong stap tru mo strong, mekem wan projek we bae i helpem yu blong praktisim wanem yu bin lanem. Hemia bae i wan impoten wok we bae i tekem yu samples ten aoa blong yu komplitim. Wetem prea, lukaotem Tabu Spirit blong i lidim yu blong jusum wan projek we i gat mining long hem.

Mekem papa, mama o wan lida i givim raet long projek blong yu bifo yu statem. Raetem wan evaluesen afta yu finis. I gat sam tingting blong wan valiu projek we i stap daon ia.

Rekodem ol eksampol blong ol rod we ol famle memba oli bin soemaot ol kwaliti blong stap tru mo strong long laef blong olgeta.
Blong stap tru mo strong i minim blong kipim ol komitmen blong yu. Faenemaot mo kipim ol komitmen blong yu long ol narawan taem yu stap tekem pat olsem wan memba blong wan tim o wan oganaesesen o long wan lidasip posisen long skul o komuniti blong yu.
Yusum 1 Timoti 4:12 olsem gaed blong yu, oganaesem mo mekem wan aktiviti we bae i helpem yu blong praktisim blong stap olsem “wan gudfala eksampol long ol Kristin man.”
Mekem mo kipim ol tempol kavenan we oli nidim fasin blong stap tru mo strong. Rere blong mekem ol kavenan long tempol taem yu mekem o werem wan klos we i go stret wetem ol standet blong wan dresap we i stret olsem we oli eksplenem long pamflet ia Blong Ol Yut Oli Kam Strong mo long ol toktok blong ol profet we oli laef.
Long ol toktok we ol Jeneral Atoriti oli givim, lukaotem ol topik blong fasin blong stap tru mo strong mo fasin blong stap ones. Lanem from wanem nao ol prinsipol ia oli impoten long hapines blong yu mo taem yu stap rere blong go long tempol. Mekem wan samting (olsem wan pikja, wan buk wetem ol gudfala toktok, o wan samting we yu somap long han) we bae i mekem yu yu tingbaot, evri dei, komitmen blong yu blong stap ones mo tru long ol taem mo blong oli save yu from fasin blong stap tru mo strong blong yuwan.

Projek blong mi hem i:

Plan blong mi blong tekemaot projek ia hem i:

I givim raet

Deit we yu ting se bae yu komplitim projek

Evaluesen blong mi long projek ia hem i (putum olsem wanem yu bin filim, mo olsem wanem save blong yu blong stap tru mo strong, i bin kam antap):

Papa, mama o lida i saen

Deit:

Ol aoa we mi spendem