Wanem Nao Mi Save Mekem Taem Mi Komplitim Progres blong Miwan?

Taem yu komplitim program blong Progres blong Miwan, hem i wan impoten step blong mekem fet mo testemoni blong yu i kam moa strong, mo yu stap rere from ol tempol kavenan. Yu bin lanem olsem wanem blong mekem ol komitmen, wok blong mekem ol komitmen ia oli kamtru, mo ripotem progres blong yu. Proses ia i mas gohed taem yu stap long rod long tempol mo gohed blong developem ol kwaliti we bae oli helpem yu truaot long laef blong yu. Yu save gohed long progres blong yu taem yu wokhad blong kasem wan Ona Bi o taem yu statem Progres blong Miwan bakegen.

Kasem Wan Ona Bi

Oli bin givim ol smol medol blong Ona Bi fastaem long ol yang woman we oli wantem blong mekem moa bitim wanem oli askem. Blong gohed long progres blong yu, yu save kasem wan Ona bi blong i go wetem medol blong yu blong Rekonisen Olsem Wan Yangfala Woman. Yu save kasem wan smol medol blong Ona Bi afta yu komplitim tufala samting ia:

1. Ridim Buk blong Momon bakegen. Wan fasin blong mekem skripja stadi evri dei bae i mekem fet blong yu i kam moa strong mo bae i helpem yu blong kasem insperesen blong yuwan mo givhan truaot long laef blong yu. Sapos yu ridim blong faef minit nomo evri dei, yu save komplitim ful Buk blong Momon long wan yia.

2. Givim seves long ol narafala man blong wan total blong 40 aoa. Taem i posibol, sam long ol aoa ia i mas gat tu ol taem we yu stap helpem wan nara yang woman wetem Progres blong Miwan blong hem. Hemia yu mas mekem anda long daereksen blong wod o branj Yang Woman presidensi. Taem yu stap helpem wan nara yang woman, bae yu wantem blong:

   • Kam fren blong hem.

   • Kam wan eksampol blong wan stret mo gud gel blong God.

   • Leftemap tingting blong hem blong wok wetem papa mo mama blong hem blong jusum ol stret valiu eksperiens mo ol projek.

   • Helpem hem blong setem ol gol mo komplitim wetem ol valiu eksperiens mo ol projek.

   • Helpem hem blong kipim ol rekod blong ol valiu eksperiens mo projek.

   • Helpem hem blong andastanem ol gospel prinsipol we ol valiu eksperiens mo projek oli tijim.

   • Leftemap tingting blong hem blong i ridim Buk blong Momon, mo toktok raon wetem hem long wanem hem i stap ridim.

   • Leftemap tingting blong hem blong hem i serem ol valiu eksperiens mo projek blong hem wetem famle blong hem.

Statem Progres blong Miwan Bakegen

Yu save statem ful program blong Progres blong Miwan bakegen mo kasem wan seken medol blong Rekonisen Olsem Wan Yangfala Woman.