Rekonisen Olsem Wan Yangfala Woman

Taem yu komplitim program blong Progres blong Miwan, bae yu kwalifae blong kasem Rekonisen Olsem Wan Yangfala Woman. Blong kasem awod ia:

Go oltaem long sakramen miting (taem i posibol).
Laef folem ol standet long buk ia Blong Ol Yut Oli Kam Strong.
Komplitim ol valiu eksperiens mo valiu projek blong wanwan long ol eit valiu ia.
Kipim wan jenol blong yuwan.
Go long seminari o tekem pat long independen stadi (taem i gat).
Ridim Buk blong Momon oltaem.
Rekodem testemoni blong yu abaot Sevya Jisas Kraes.

Awod ia i luksave yu from fasin blong yu blong stap klin inaf mo from yu bin komplitim evri samting we oli askem yu blong mekem long Progres blong Miwan. Olsem wan we i kasem awod ia, yu soem se yu bin stanemap wan paten blong progres long laef blong yu. Yu yu rere blong mekem mo kipim ol tabu tempol kavenan. Yu bin komitim yuwan blong kipim ol komanmen, givim seves long ol narafalawan, mo developem mo serem ol presen mo talen blong yu. Bae yu traehad blong mekem hom mo famle i kam moa strong.

Oli save prisentem awod blong Rekonisen Olsem Wan Yangfala Woman long wan sakramen miting. Afta we yu kasem awod ia, yu mas gohed blong laef folem ol standet long buk ia, Blong Ol Yut Oli Kam Strong. Yusum wanem yu bin lanem taem yu gohed blong rere blong mekem ol tabu tempol kavenan wetem Papa long Heven. Bae yu faenem glad mo hapines taem yu mekem samting ia.