1 ’Me ho tla tla pele molamu ho tsoa kutung ea Jese, ’me lekala le tla hlomela metsong ea hae.

2 ’Me Moea oa Morena o tla lula holima hae, moea oa bohlale le oa kelello, moea oa keletso le matla, moea oa tsebo le oa ho ts’aba Morena;

3 ’Me o tla mo etsa ea potlakang kutloisisong ka ho ts’aba Morena; ’me a ke se ke a ahlola ka chalimo ea mahlo a hae, leha e le ho khalema ka ho utloa taba ea ba re.

4 Empa o tla ahlola mafutsana ka ho loka, a bue taba tsa ba banyenyane ba lefats’e ka ’nete; ’me o tla otla lefats’e ka thupa ea molomo hae, a timetse ba khopo ka moea oa molomo oa hae.

5 ’Me ho loka e tla ba senyepa thekeng la hae, ’nete e be leqhama maphakong a hae.

6 Phiri e tla lula le konyana, lengau le bothe le potsanyane; namane le taoana le khomo e nonts’itsoeng li tla ba hammoho, li eteletsoe ke ngoana ea monyane.

7 ’Me khomo le bere li tla fula hammoho, manamane a tsona a tla robala hammoho; ’me tau e tla fula joang joaloka khomo.

8 ’Me lesea le anyang le tla ipapalla mosimeng oa marabe, le ngoana ea khoesoang a kenye letsoho lefarung la qooane.

9 Ha ho sa tla hlola ho sengoa thabeng eohle e halalelang ea ka, hobane lefats’e le tla tlala tsebo ea Morena, joaloka ha metsi a aparetse leoatle.

10 ’Me mohlang oo, lehlomela la Jese le tla emisetsoa lichaba ka mokhoa oa folakha; balichaba ba tla le batla, ’me ho phomola ha hae e tla ba khanya feela.

11 ’Me ho tla etsahala hore mohlang oo Morena a boele a otlolle letsoho la hae hape khetlo la bobeli ho lopolla karolo e setseng ea sechaba sa hae se siiloeng naheng ea Assiria, le Egepeta, le Pathrose, le Ethiopia, le Elame, le Shineare, le Hamathe, le lihlekehlekeng tsa leoatle.

12 ’Me o tla emisetsa lichaba folakha ea hae, a bokelle ba tebetsoeng ba Iseraele, a phuthe le ba qhalantsoeng Ba Juda ho tsoa likhutlong tse ’ne tsa lefats’e.

13 Mona oa Efraime o tla fela, Juda le eena a lese ho mo qala; Efraime ha a sa tla hlola a honohela Juda, ’me Juda ha a sa tla hlola a loants’a Efraime.

14 Empa ba tla fofa mahetleng a Bafilesta: ho isa nqa ea bophirima; ba tla ba senyetsa ba bochabela hammoho; ba tla beha letsoho la bona holima Edomo le Moabe, ’me bana ba Ammone ba tla ba mamela.

15 ’Me Morena ka botlalo o tla omisa leleme la leoatle la Egepeta; ’me ka moea oa hae o matla o tla tsoka letsoho la hae holima noka, ’me o tla otla ka har’a linokana tse supileng, ’me a etse batho ho ts’ela ba roetse lieta.

16 ’Me mila o tla ba teng ho karolo e setseng ea sechaba sa hae se tla sala, ho tsoa Assiria, joaloka ha o bile teng ho Iseraele mohla a tlohang lefats’eng la Egepeta.