1 Baʼaleʼ heʼel túnaʼ, yaʼab bín anaqueʼ, u kinil quen cáhac in betiʼc humpʼél nohoch meyah ichiloʼob, ca in kaʼahs in promesaoʼob in wáʼalmaʼh tiʼ u palal maʼcoʼob ca páhchahac in tiʼchic in kab tu caʼatén tu yoʼolal in molic in cahal, tumen letiʼoʼobeʼ tiʼ u nahil Israel u taloʼob.

2 Tu yoʼolal xan in kaʼahsic le promesaoʼob in mentmaʼh techoʼ, Nefi, yétel tiʼ a tata, ca kaʼahac ten u palal a palal, yételeʼ u tʼan u palal a palaloʼobeʼ tiʼn chiʼ bín hókoqueʼ cu bin tiʼcnal u palal a palal; in tʼanoʼob xaneʼ bín xiʼic bey chanbel tán tac tu xulil yókolcab utiaʼal ca u yiloʼob in cahal letiʼoʼobeʼ letiʼ u yotoch Israel u taloʼoboʼ;

3 Tumen xan in tʼanoʼobeʼ bín túxtaacoʼobe, le maʼ Judioʼoboʼ bín u yaʼaloʼobeʼ: Humpʼél Biblia! Humpʼél Biblia! Yan toʼon humpʼél Biblia maʼ tán u páhtal u yantal ulak Biblia.

4 Baʼaleʼ bey tún u yaʼalic Yumtsil Hahal Diosaʼ: Hach minaʼan u naʼatoʼobeʼ, bín anac tiʼoʼob humpʼél Biblia; tiʼ le Judioʼob cu taloʼ in úchben cahal in prometertmaʼh tiʼoʼob. Baʼax diosboʼotiʼquiʼl cu dzaicoʼob tiʼ le Judioʼoboʼ tumen tiʼ letiʼoʼob cu kamicoʼob le Bibliaoʼ? Beyoʼ. Baʼax u kát yaʼaloʼob le maʼ Judioʼoboʼ yétel le heʼeloʼ? Kahaʼan wá tiʼ letiʼoʼob u maʼnoʼob le Judioʼoboʼ minaʼan u yichil, u yayah ólaloʼob yétel le u meyahoʼob le Judioʼoboʼ yétel u betiʼcoʼob in tʼan tu yoʼolal u bisicoʼob le salvacionoʼ tac tiʼ le maʼ Judioʼoboʼ?

5 Teʼex maʼ Judioeʼexeʼ, ca kaʼahsiqueʼex wá le Judioʼoboʼ, in cahal in prometertmaʼhoʼ? Maʼatech, baʼaleʼ ta maʼldecirteʼexoʼob yétel kuxilnaheʼex yételoʼob, maʼ a tuculteʼex a caʼa molicoʼobiʼ. Baʼaleʼ heʼel túnaʼ, ten bín in bet ca sunac tulácal le baʼaloʼoboʼtu yókol a poleʼex. Tumen ten Yumtsileneʼ, maʼ in tuʼubsmaʼh in cahaliʼ.

6 Hach minaʼan a naʼat wá ca wáʼaliqueʼ: Humpʼél Biblia; yan toʼon humpʼél biblia maʼ kabét toʼon ulak Bibliaiʼ. Dzoʼoc wá u yantal teʼex caʼach humpʼél Biblia wá maʼ tu yoʼolal le Judioʼoboʼ?

7 Maʼ wá a woheʼleʼex yan ulak nohoch cahoʼobiʼ? Maʼ wá a woheʼleʼex ten, Yumtsil a Hahal Dioseʼex, tiʼn mentah tulácal maʼcoʼob yétel cu kaʼahal ten le cahacbaloʼob tiʼ u islaoʼob le kaʼnaboʼ quiʼn reinartiʼc teʼ caʼanoʼ yétel le luʼum yanaloʼ, quiʼn bisic in tʼan tiʼ u palal maʼcoʼob, beyoʼ, tulácal u cahiloʼob le yókolcabaʼ.

8 Baʼaxtén ca quehartiʼcabaeʼex yoʼolal a kamiqueʼex ulak in tʼanoʼob? Maʼ wá a woheʼleʼexeʼ u testiʼmonio caʼapʼél cahoʼobeʼ cu yeʼesic teʼexeʼ ten a Hahal Dioseʼex yétel heʼebix u kaʼahal ten humpʼél caheʼ bey xan cu kaʼahal ulak? Le betiʼqueʼ minaʼan u heʼlaʼanil le tʼanoʼob quiʼn wáʼalicoʼ, bey heʼebix tiʼ humpʼél caheʼ bey tiʼ ulʼak. Le tún quen múchʼchahac le caʼapʼél nucuch cahoʼoboʼ u testiʼmonioʼob cu múchʼtal xan.

9 Lelaʼ quiʼn betiʼc tu yoʼolal in weʼesic tiʼ yaʼab maʼcoʼobeʼ, teneʼ lailiʼ igualen hoʼolheʼac, behlaʼeʼ yétel utiaʼal le kinoʼob minaʼan u xuloʼ; yételeʼ quiʼn wáʼalic in tʼan heʼebix in wóltiʼqueʼ. Baʼaleʼ bic a tuculteʼexeʼ wá tumen tiʼn wáʼalah humpʼél tʼaneʼ maʼ tu páhtal in wáʼalic ulak tumen maʼ dzoʼococ in tʼaniʼ mix bín dzoʼococ cu dzoʼocol u xul u cuxtal maʼquiʼ mix tún utiaʼal le kinoʼob maʼ tu xuloʼoboʼ.

10 Tu yoʼolaleʼ maʼ a tucultiʼqueʼex tumen yan teʼex humpʼél Bibliaeʼ tiʼ yan tulácal in tʼanoʼobiʼ; mix xan a tucultiʼqueʼex de que maʼ dzoʼoc in betiʼc u dzíbtaal maʼs.

11 Tumen quiʼn wáʼalic tiʼ tulácal maʼcoʼob, heʼebix lakineʼ beyxann chikin, heʼebix xamaʼneʼ beyxann nohol, yétel u islailoʼob teʼ kaʼnaboʼ ca u dzíbtoʼob le baʼaxoʼob quen in wáʼal tiʼoʼoboʼ; tumen bín in juzgart le yókolcabaʼ tu yoʼolal le libroʼob dzíbtaanoʼ, huhuntúlileʼ heʼebix baʼax u mentmaʼheʼ, heʼebix dzíbtaanileʼ.

12 Tumen heʼel túnaʼbín tʼanaquen tiʼ le Judioʼoboʼ ca u dzíbtoʼob yétel bín tʼanaquen xan tiʼ u palal Nefi ca u dzíbtoʼob xan, bín tʼanaquen tiʼ ulak cahoʼob tiʼ u yotoch Israel, le maʼxoʼoboʼ in bismaʼhoʼob tulak tuʼuxeʼ, ca u dzíbtoʼob; yétel bín tʼanaquen xan tiʼ tulácal u cahiloʼob yókolcab ca u dzíbtoʼob.

13 Yan tún u yúchuleʼ le Judioʼoboʼ bín anac u tʼan u palal Nefi tiʼoʼob, u palal Nefieʼ bín anac tiʼoʼob u tʼan le Judioʼoboʼ; le u palal Nefi yétel le Judioʼoboʼ bín anac tiʼoʼob u tʼan le u cahiloʼob Israel dzoʼoc u saʼataloʼob, leloʼobaʼ bín utiaʼalintoʼob u tʼan le u palal Nefi yétel le Judioʼoboʼ.

14 Bín úchuc túneʼ, in cahaleʼ, letiʼ u yotoch Israeloʼ, bín noʼolocoʼob tu luʼumil u nahil tuʼux yan u ayikaliloʼobeʼ; in tʼan xaneʼ yan u moʼolol humpʼéliliʼ. Quin weʼesic tún tiʼoʼob le cu baʼateloʼob tu contra in tʼan heʼebix xan tu contra in cahaloʼ, le tu yotoch Israel u taloʼoboʼ, teneʼ Hahal Diosen yétel xan tiʼn prometertah tiʼ Abraham de que cu kaʼahal ten u palal u palal teʼ kinoʼob minaʼan u xuloʼoboʼ.