1 Behlaeʼ le in sucuʼune ex in yacunmeʼexeʼ, ten Nefieneʼ, cu háwál in tʼan aʼalaʼan baʼal tumen le pixanoʼ tiʼ teʼex. Mix tán u páhtal in dzíbtiʼc wá chén humpʼít baʼaloʼob hach in woheʼl yan u yúchul. Beyxaneʼ chén tán u páhtal in dzíbtiʼc humpʼít u tʼan in wídzin Jacob.

2 Le betiʼqueʼ, cu quiʼmaʼctal in wól yétel le baʼaxoʼob dzoʼoc in dzíbtiʼcaʼ, baʼaleʼ, chén yan humpʼít maʼs in tʼan tumen kabét ca tʼanaquen tu yoʼolal u caʼansahil Cristo; le betiʼc túneʼbin in caʼah in tʼaneʼex hach toh heʼebix xan hach toh in tʼan cun yúchil.

3 Tumen in pixaneʼ cu quiʼmaʼcchahal u yól tiʼ le baʼax tohoʼ; tumen bey u meyah Yumtsil Hahal Dios ichil u palal maʼcoʼob. Tumen Yumtsil Hahal Dioseʼ cu sáscuntiʼc naʼat, tumen letiʼeʼ cu tʼan tiʼ maʼcoʼob heʼebix u yaʼalaʼal tʼanoʼob letiʼoʼob tu yoʼolal u naʼatiʼcoʼob.

4 Le betiʼqueʼ in kát ca kaʼahac tiʼ teʼexeʼ dzoʼoc in wáʼalic teʼex tu yoʼolal le profeta u yeʼesmaʼh ten Yumtsiloʼ, le heʼeloʼ bín u dza u yoc haʼ tu Tamaʼn Hahal Dios, le maʼx bín u luʼs u keban le yókolcabaʼ.

5 Wá le u Tamaʼn Hahal Diosoʼ le hach chucaʼan u yutsiloʼ, wá kabét ca dzaʼabac u yoc haʼ tiʼ ich haʼ tu yoʼolal u dzoʼocsic tulácal le baʼax utsoʼ, cux tún hach maʼs kabét tiʼ toʼon, keban maʼcoʼon, ca dzaʼabac toʼon oc haʼ ich haʼ?

6 Beʼoraaʼ in kát in kát teʼexeʼ le in sucuʼuneʼex hach in yacunmeʼexaʼ, bix úchic u dzoʼocsic u Tamaʼn Hahal Dios yétel tulácal baʼax utsoʼ le cah dzaʼab u yoc haʼ?

7 Maʼ wá a woheʼleʼex letiʼeʼ hach chucaʼan u yutsiliʼ? Chén baʼaleʼ quex tumen hach chucaʼan u yutsileʼ, cu yeʼesic tiʼ u palal maʼcoʼobeʼ, tu bakeleʼ, cu humillartiʼcuba tu tán le Tataoʼ, tán u yaʼalic tu hahileʼ heʼ u yuʼubic u tʼan u Tataeʼ.

8 Le betiʼqueʼ, le cah dzoʼoc u yoc haʼ ich haʼeʼ cah ém le Hahil Pixanoʼ yókoleʼ bey huntúl paiomaʼeʼ.

9 Ulak baʼaleʼ cu yeʼesic tiʼ u palal maʼcoʼobeʼ, hach toh le behoʼ yétel xan hach nuʼutʼ le honah tuʼux u deber u yocoloʼoboʼ letiʼ eʼesmaʼhil tánil tiʼ toʼon bix c betiʼcoʼ.

10 Ca tu yaʼalah tiʼ u palal maʼcoʼob: Tʼuʼulpachteneʼexi. Le betiʼqueʼ le in sucuʼuneʼex in yacunmeʼexaʼ, heʼel wá u páhtal c tʼuʼulpachtiʼc Jesus wá maʼ tán c dzic c ól c dzoʼocs u tʼan le Tataoʼ?

11 Ca tún tu yaʼalah le Tataoʼ: Pʼat a kebaneʼex, pʼat a kebaneʼex yétel ca oc haʼnaqueʼex tu kabaʼ le in Pal hach in yacunmaʼhoʼ.

12 Tiʼn wuʼuyah xan u tʼan le Paloʼ, tán u yaʼalic: Le maʼx cu yoc haʼ tiʼn kabaʼeʼ, cu dzaʼabal le Hahil Pixan tiʼoʼ, heʼebix tiʼ teneʼ; le betiʼqueʼ tʼuʼulpachteneʼexiʼ yétel ca a beteʼex le baʼaxoʼob dzoʼoc a wiliqueʼex in betiʼcoʼ.

13 Le betiʼc túneʼ le in sucuʼuneʼex hach in yacunmeʼexaʼ, in woheʼleʼ wá teʼex ca tʼuʼulpachtiʼqueʼex le Paloʼ yétel tulácal u yól a pucsiʼkaleʼex, maʼ caʼapʼél a wóleʼex mix ca tus tu tán Hahal Dioseʼ, baʼaleʼ, yétel tulácal chucaʼan a wóleʼex, ca a pʼateʼex a kebaneʼex, tán a wáʼaliqueʼex tu hahil tu tán le Tataoʼ, a káteʼex a chʼaʼeʼex ta wókoleʼex u kabaʼ Cristo yétel le oc haʼoʼ. Beyoʼ, tán a tʼuʼulpachtiʼqueʼex a Yumtsileʼex yétel a Salvadoreʼex tiʼ le haʼoʼ heʼebix u yaʼalmaʼhileʼ, heʼel túnaʼ bín a kameʼex le Hahil Pixanoʼ; cu dzoʼocoleʼ, heʼ cu tal u yoc haʼil le kákoʼ yétel le Hahil Pixanoʼ, bey túnoʼ heʼel u páhtal a tʼaneʼex ichil u tʼan angeloʼobeʼ, yétel cu páhtal a yáwáteʼex diosboʼotiʼc tiʼ u Sagrado Máquiʼl Israel.

14 Baʼaleʼ heʼel túnaʼ le in sucuʼuneʼex hach in yacunmeʼexaʼ, bey úchic u tʼanen le Paloʼ, tán u yaʼaliqueʼ: Le cu dzoʼocol a pʼatiʼqueʼex a kebaneʼex yétel dzoʼoc a wáʼaliqueʼex tu hahil tu tán le Tataoʼ heʼ a wuʼuyiqueʼex in tán tu yoʼolal a kamiqueʼex le oc haʼ ich haʼoʼ, yétel xan cu dzoʼocol a kamiqueʼex u yoc haʼil le kákoʼ yétel le Hahil Pixanoʼ yétel dzoʼoc a tʼan ichil túmben tʼanoʼob, beyoʼ ichil u tʼan angeloʼob, wá bey ca betiʼqueʼex tulácal le baʼaloʼobaʼ baʼaleʼ cu dzoʼocoleʼ ca pʼatiʼqueneʼ, maʼs maʼalob caʼach maʼ a kahóltiʼqueneʼex.

15 Ca tiʼn wuʼuyah u tʼan le Tataoʼ cu yaʼaliqueʼ; beyoʼ, u tán le hach in yacunmaʼhoʼ hah yétel hach maʼ tu xuʼululiʼ. Le maʼx cun u dza u yól tac tu dzoʼocoleʼ letiʼ bín salvartaac.

16 Behlaʼ túneʼ le in sucuʼuneʼex hach in yacunmeʼexaʼ, tu yoʼolal le baʼaloʼobaʼ in woheʼl huntúl maʼqueʼ wá maʼ tán u dzaic u yól tac tu dzoʼoc kin u bet baʼax u yaʼalmaʼh u Pal Hahal Dioseʼ, maʼ tán u páhtal u salvartaal.

17 Le betiʼqueʼ beteʼex le baʼaxoʼob le tiʼn wáʼalah u betiʼc a Yumtsileʼex yétel a Salvadoreʼexoʼ, tumen tu yoʼolal lelaʼ dzoʼoc u yeʼesaʼal ten le baʼaloʼobaʼ, ca a wohélteʼex maʼcamaʼc le honah tuʼux u deber a wocoleʼexoʼ. Tumen le honah tuʼux u deber a wocoleʼexoʼ letiʼ le a pʼatiʼqueʼex a kebaneʼexoʼ yétel le oc haʼ ich haʼoʼ, le tún quen dzoʼocoqueʼ cu tal u pʼoʼil a kebaneʼex tumen kák yétel tumen le Hahil Pixanoʼ.

18 Ca wántaleʼex túneʼ tiʼle toh yétel nuʼutʼ beh cu bisic maʼc tiʼ le cuxtal minaʼan u xuloʼ. Beyoʼ, wá dzoʼoc a wocoleʼex teʼ honahoʼ, dzoʼoc a betiʼqueʼex heʼebix u yaʼalic u tʼan le Tataoʼ yétel le Paloʼ, dzoʼoc xan a kamiqueʼex le Hahil Pixanoʼ cu dzaic testiʼmonio tu yoʼolal le Tataoʼbey xan le Paloʼ tu yoʼolal u dzoʼocsic le promesa u yaʼalmaʼhoʼ, tuʼux cu yaʼaliqueʼ bín a kameʼex wá ca wocoleʼex tiʼ le behoʼ.

19 Behlaʼ túneʼ le in sucuʼuneʼex hach in yacunmeʼexaʼ, le quen dzoʼococ a wocoleʼex tiʼ le toh yétel nuʼutʼ behoʼ, in kát in kát teʼex, dzoʼoc wá u mentaal tulácal? Heʼel túnaʼ quiʼn wáʼalic teʼexeʼ, maʼ; tumen maʼ kuchuqueʼex tac wáyeʼ wá maʼ tu yoʼolal u tʼan Cristoeʼ, yétel humpʼél nohoch fe minaʼan u xul tiʼ letiʼ, tán a paʼtiʼc u yántah u páhtalil le maʼx yan páhtalil tiʼ utiaʼal u salvartiʼcoʼ.

20 Le betiʼqueʼ u deber a bineʼex actán toh tu pach Cristo; ca sén paʼtiʼqueʼex le baʼax utsoʼ yétel ca yacunmaʼeʼex Dios yétel tulácal maʼcoʼob. Le betiʼqueʼ wá ca xímbaleʼex actán tiʼ teʼex, tán u chuʼupul a wóleʼex tiʼ u tʼan Cristo yétel ca dzaic a wóleʼex tac tu dzoʼocoleʼ, heʼel túnaʼ, bey u yaʼalic le Tataaʼ: Bín anac teʼex le cuxtal minaʼan u xuloʼ.

21 Behlaʼ túneʼ le in sucuʼuneʼex hach in yacunmeʼexaʼ, letiʼ le behaʼ; minaʼan ulak beh, mix ulak kabaʼ dzaʼan yánal le caʼanoʼ yoʼolal u páhtal u salvartaal maʼc tiʼ u reinoil Hahal Dios. Heʼel túnaʼ lelaʼ letiʼ u caʼansahil Cristoaʼ chén letiʼ u hach tu hahil caʼansahil le Tataoʼ, le Paloʼ, yétel le Hahil Pixanoʼ, le heʼelaʼ huntúl Dios minaʼan u xul. Amen.