1 Ten, Nefieneʼ, maʼ tu páhtal in dzíbtiʼc tulácal le baʼaxoʼob h caʼansaʼab tiʼn cahaloʼ, minaʼan xan ten sénquech páhtalil utiaʼal in dzíbiʼ quex wá sén cu páhtal in tʼaneʼ; tumen le quen tʼanac huntúl maʼc tu yoʼolal u páhtalil le Hahil Pixanoʼ, letiʼ le u páhtalil le Hahil Pixanoʼ cu bisic tu pucsiʼkal u palal maʼcoʼob.

2 Baʼaleʼ heʼel túnaʼ, yaʼab maʼxeʼ cu chichcuntiʼc u pucsiʼkaloʼob tu contra le Hahil Pixanoʼ maʼ tu caxtaal ichiloʼob. Le betiʼqueʼ maʼ tán u kamicoʼob le baʼax dzíbtaanoʼ yétel cu yaʼalicoʼobeʼ le dzíboʼoboʼ mixbaʼal tiʼ.

3 Baʼaleʼ ten Nefieneʼ dzoʼoc in dzíbtiʼc le baʼax dzoʼoc in dzíbtiʼcoʼ; quiʼn tucultiʼqueʼ hach sén kaʼanaʼan utiaʼal in cahal. Tumen untiʼch quiʼn orar tu yoʼolaloʼob ich kin, yételeʼ in wichoʼobeʼ cu yokol tiʼn kan ich ákab tu yoʼolal letiʼoʼob; yétel quiʼn kaʼam tʼan tiʼ in Hahal Dios yétel in fe, yételeʼ in woheʼl bín u yuʼub in kaʼam tʼan.

4 In woheʼl Yumtsil Hahal Dioseʼ bín u kam in oracion utiaʼal u yutsil in cahal. Le tʼanoʼob dzoʼoc in dzíbtiʼqueʼ, quex wá maʼ hach maʼalob in dzíbiʼ, bín in tʼanoʼobeʼ bín anac yaʼab páhtalil letiʼoʼob tumen cu tsoʼolol u xiquiʼnoʼob u betoʼob utseʼ, cu yaʼalic tiʼoʼob tu yoʼolal u tataoʼob yétel cu tʼanoʼob tu yoʼolal Jesuseʼ cu yaʼalic xan tiʼoʼob ca u creertoʼob tiʼ yétel ca u dza u yóloʼob tac tu xul u kinileʼ lelaʼ letiʼ le cuxtal minaʼan u xulaʼ.

5 Cu tʼan tu contra le kebanoʼ yétel u sásilil le hahoʼ; le betiʼqueʼ mixmaʼc bín kuxilnac yoʼolal le tʼanoʼob dzoʼoc in dzíbtiʼcaʼ a menos que letiʼ cu tal tiʼ u pixan u kasiʼl baʼaloʼ.

6 Cu quiʼmaʼcchahal in wól tiʼ toh tʼanoʼob, cu quiʼmaʼcchahal in wól tiʼ hah; cu quiʼmaʼcchahal in wól tiʼ in Jesus tumen dzoʼoc u salvartiʼquen tu cúchil quiʼsinoʼ.

7 Quin sén yabiltiʼc in cahal yétel yan ten nohoch fe tiʼ Cristo decosque bín in wil yaʼab maʼcoʼob minaʼan u maʼnchai tu juicioiʼ.

8 Quin sén yabiltiʼc le Judioʼoboʼ; quiʼn wáʼalic Judio tumen in kát in wáʼaleʼ tiʼ le maʼxoʼob in taloʼ.

9 Quin sén yabiltiʼc xan le maʼ Judioʼoboʼ. Baʼaleʼ heʼel túnaʼ tiʼ mix huntúl tiʼoʼobaʼ cu páhtal in paʼtiʼc mixbaʼal wá maʼ tu taloʼob tiʼ Cristoeʼ yétel ca ococoʼob tiʼ le honah nuʼutʼoʼ tán u xímbaloʼob tiʼ le beh cu bin tiʼ le beh cu bin tiʼ cuxtaloʼ yétel ca xímbalnacoʼob untiʼch tiʼ le behoʼ tac tu xul u kinil wáy h luʼumeʼ.

10 Behlaʼ túneʼ le in yabilteʼex in sucuʼuneʼexaʼ, bey heʼebix xan teʼex judioeʼexeʼ yétel tulácal u xul yókolcab, uʼuyeʼex le tʼanoʼobaʼ yétel creerteʼex tiʼ Cristo, baʼaleʼ wá maʼ tán a creertiʼqueʼex le tʼanoʼobaʼ creerteʼex tiʼ Cristo. Wá ca creertiʼqueʼex tiʼ Cristoeʼ yan a creertiʼqueʼex le tʼanoʼobaʼ, tumen leloʼobaʼ u tʼan Cristo, letiʼ h dza ten; cu caʼansic tulácal maʼc u ment uts.

11 Wá maʼ u tʼan Cristoeʼ, ilawileʼex teʼex; tu dzoʼoc kinoʼ Cristo cun u yeʼes teʼex yétel páhtalil yétel nohochileʼ le tʼanoʼobaʼ letiʼ u hach tʼan letiʼ, tu dzoʼoc kineʼ tech yétel ten bín c ilicbaeʼex tu tán Letiʼ; techeʼ bín a wohélteʼ letiʼ u yaʼalmaʼh ten ca in dzíbt le baʼaloʼobaʼ quex tumen maʼ hach maʼalob in dzíbiʼ.

12 Quin orar tiʼ le Tataoʼ, tu kabaʼ Cristo ca salvartaac yaʼab tiʼ toʼoneʼ, wá maʼ tulácaloʼoneʼ, tu reino letiʼ tiʼ le nohoch dzoʼoc kinoʼ.

13 Behlaʼ túneʼ in sucuʼuneʼex hach in yabiltiʼqueʼexeʼ, tulácaleʼex tiʼ u yotoch Israel a taleʼexoʼ, yétel xan tulácaleʼex u maʼquiʼleʼex u xul yokolcab. Quin wáʼalic teʼex bey le tʼan cu hókol ichil luʼumeʼ, ádios quiʼn wáʼalic teʼex tac le quen talac le nohoch kinoʼ.

14 Beyxaneʼ le maʼx ichileʼex maʼ u kát u kamic u yutsil Hahal Dios, mix a dziqueʼex xiquiʼn tu tʼan le Judioʼoboʼ mix in tʼanoʼob mix le tʼanoʼob bín hokoc tu chiʼ u Tamaʼn Hahal Dioseʼ, heʼel túnaʼ quiʼn wáʼalic teʼex ádios tu hahil, tumen le tʼanoʼobaʼ bín u condenarteʼex tu dzoʼoc kin.

15 Le baʼax quiʼn dzoʼocsic wáy luʼumeʼ bín bisaʼac tiʼ teʼex ta contraeʼex actán Letiʼ, tumen bey dzoʼoc u yaʼalic ten Yumtsil ca in beteʼ, yételeʼ yan in betiʼc. Amen.