1 Behlaʼ túneʼ in sucuʼuneʼex hach in yacunmeʼexeʼ, dzoʼoc in xoquiʼc teʼex le baʼaloʼobaʼ tu yoʼolal a wohéltiʼqueʼex u promesaoʼob Yumtsil u dzamaʼh tiʼ tulácal u yotoch Israel.

2 Letiʼeʼ dzoʼoc u tʼan tiʼ le judioʼoboʼ tu yoʼolal u chiʼ u hahil profetaoʼoboʼ, desde cah cáhiʼ, desde u kinil u úchben tataoʼob hasta u kinil u palal u palaloʼob, tac quen kuchuc u kinil u múchʼicubaoʼob tiʼ le u hahil u iglesia Hahal Diosoʼ, le quen múchʼquiʼntaacoʼob tiʼ le luʼum prometertaan tiʼoʼoboʼ, bín tún dzaʼabacoʼob tiʼ u luʼumiloʼob prometertaanoʼ.

3 Heʼel túnaʼ in yacunmeʼex in sucuʼuneʼexeʼ, quiʼn wáʼalic teʼex le baʼaloʼobaʼ, tu yoʼolal u quiʼmaʼcchahal a wóleʼex yétel ca a líks a poleʼex teʼ kinoʼob minaʼan u xuloʼ, tu yoʼolal le bendicionoʼob quen u dza Hahal Dios tiʼ a palaleʼexoʼ.

4 Tumen in woheʼl yaʼab tiʼ teʼexeʼ dzoʼoc a sén caxtiʼqueʼex ca a wohélteʼex c bakeleʼ yan u químil; chén baʼaleʼ bín c il Hahal Dios tiʼ yanoʼon t wínclil.

5 Beyoʼ in woheʼl teʼexeʼ a woheʼleʼex letiʼeʼ yan u yeʼesicuba tu bakel tiʼ le Jerusaleniloʼoboʼ, teʼ tuʼux hókoʼonoʼ tumen kabét ca úchuc ichiloʼob tumen u deber u chaʼ le Máx u mentmaʼh tulácaloʼ u betuba maʼc tiʼ u bakel yétel ca químic tu yoʼolal tulácal le maʼcoʼoboʼ utiaʼal tulácal le maʼcoʼoboʼ ca pʼátacoʼob u yilicoʼob tumen letiʼ.

6 Tumen le químiloʼ dzoʼoc u tal tiʼ tulácal maʼc tu yoʼolal u dzoʼocsaʼal u tucul le cu chʼaʼic toʼon ótsililoʼ le maʼx u mentmaʼh tulácaloʼ, kabét xan ca anac humpʼél u páhtalil le caʼa cuxtaloʼ, yételeʼ le caʼa cuxtaloʼ kabét ca talac tiʼ maʼc tumen dzoʼoc u lúbul maʼc, le xan u lúbul maʼcoʼ h tal tumen maʼ tu yuʼubah tʼaniʼ; yétel tu yoʼolal úchic u lúbul maʼqueʼ cah puʼul maʼc tu tán Yumtsil.

7 Le betiʼqueʼ kabét humpʼél sacrificio minaʼan u xul, tumen wá cu xuʼululeʼ, le kasaʼ maʼ tu páhtal u búquiʼntiʼc yétel le xmaʼ kasoʼ. Tu yoʼolaleʼ le yáx juicio h lúb yókol maʼqueʼ minaʼan u xul tiʼ. Wá bey aniloʼ, le bakaʼ yan u tuʼutal yétel u betuba polvo ich u maʼmaʼil luʼum tu yoʼolal mix bikin ca caʼa líkiʼc.

8 Sén yaʼab u naʼatiʼl Hahal Dios; cu chʼaʼic ótsilil yétel sén yaʼab u yutsil. Tumen heʼel túnaʼ, wá maʼ bín líkiʼc le bak tu caʼaténoʼ, c pixanoʼobeʼ heʼel u pʼátal yanal u páhtalil le angel h lúb tu tán le Hahal Dios minaʼan u xuloʼ cah sunah quiʼsin utiaʼal maʼ u caʼa líkiʼl utiaʼal mix bikin.

9 C pixanoʼobeʼ dzoʼoc caʼach u betiʼcuba bey heʼebix letiʼoʼ yételeʼ toʼoneʼ c betcba quiʼsinoʼoneʼ, u angeloʼob quiʼsin, náchoʼon tu tán Hahal Dios utiaʼal c pʼátal tiʼcnal u tata tus hach ótsiloʼon heʼebix letiʼoʼ, beyoʼ hach chicaʼanoʼon tiʼ le maʼx h tus c úchben tataoʼob, maʼx cu betiʼc u yilaʼal bey huntúl u angelil sásileʼ, yétel cu yocsic tu tucul u palal maʼqueʼ ca u quíns maʼc maʼ tu yaʼalaʼal maʼx h betiʼ yétel tulácal u heʼheʼlásil kakas meyahoʼob tiʼ eʼhochʼeʼenil.

10 Hach yaʼab u yutsil c Hahal Dios cu preparartiʼcoʼon humpʼél beh utiaʼal c púdzul tiʼ u kab le nohoch kakas baʼaloʼ, beyoʼ letiʼ le kasiʼl baʼaloʼ, químil yétel u cúchil quiʼsineʼ le heʼeloʼ quiʼn dzaic u kabaʼ beyaʼ le u químil le wíncliloʼ beyxann le u químil le pixanoʼ.

11 Tu yoʼolal u behil u mentmaʼh utiaʼal u salvartiʼcoʼon c Hahal Dioseʼ, le u Sagrado Máquiʼl Israeloʼ, le químil dzoʼoc in wáʼalicaʼ, le u químil le wíncliloʼ, bín u kub u quiʼmenoʼob; le químil heʼelaʼ letiʼ le mucnaloʼ.

12 Beyxaneʼ le químil dzoʼoc in wáʼalicoʼ, le u químil le pixanoʼ bín u kub u quiʼmenoʼob, le químil heʼelaʼ letiʼ le cuxtal tiʼcnal quiʼsinoʼ. Le betiʼc túneʼ le químil yétel teʼ cúchil quiʼsineʼ yan u kubic u quiʼmenoʼobe, beyxanneʼ le u tuʼuxil quiʼsinoʼ yan u kubic le pixanoʼob u kalmaʼhoʼ, le xan u wínclil yétel u pixan le maʼcoʼoboʼ bín caʼa dzaʼabac humpʼél tiʼ ulʼak, leloʼ bín mentaac tu yoʼolal u páhtalil u caʼa cuxtal u Sagrado Máquiʼl Israel.

13 Sén nohoch u tucul c Hahal Dios. Tumen wá maʼeʼ u cúchil quiʼmaʼc ólal Hahal Dioseʼ yan u kubic u pixanoʼob le utsil maʼcoʼoboʼ, beyxanneʼ le mucnaloʼ cu kubic u wíncliloʼob le utsil maʼcoʼoboʼ; le tún le pixanoʼ yétel le wíncliloʼ bín caʼa dzaʼabac tu caʼatén heʼebix úchilacoʼ humpʼél tiʼ ulʼak, tulácal le maʼcoʼoboʼ bin pʼátacoʼob xmaʼ kasiʼl yétel xmaʼ químiloʼob, yételeʼ bín pʼátacoʼob maʼcoʼob cuxaʼanoʼob yétel cu naʼatiʼcoʼob hach tu bel chicaʼan heʼebix naʼatiʼc toʼon tiʼ le bakaʼ, chén baʼaleʼ c naʼatiʼleʼ bín u betuba hach chucaʼan.

14 Le betiʼc túneʼ bín anac toʼon naʼatiʼl hach chucaʼan tiʼ tulácal c keban, yétel hach sucioʼon beyxann minaʼan c nokil, beyxann le utsiloʼoboʼ bín u naʼatoʼob chucaʼan u quiʼmaʼc ólaloʼ yétel hach toh cuxtaloʼ tumen u búquiʼntoʼob yétel saquiʼleʼ, beyoʼ yétel humpʼél u nokil uts.

15 Le tún quen dzoʼococ u maʼn tulácal maʼcoʼob tiʼ le yáx humpʼél químilaʼ tac le cuxtaloʼ, yétel beyoʼ ca kuchucoʼob u betubaoʼob maʼ tu químiloʼobiʼ, bín kuchucoʼob tu tán u cúchil u juicio u Sagrado Máquiʼl Israel. Cu dzoʼocoleʼ cu juzgartiʼc maʼc, yételeʼ bín juzgartaacoʼob heʼebix u yaʼalic u hahil juicio Hahal Dioseʼ.

16 Lelaʼ hach heʼebix cuxaʼanil Yumtsileʼ, tumen Yumtsil Hahal Dios u yaʼalmaʼheʼ, leloʼ u tʼan minaʼan u xul maʼ tu páhtal u xuʼululiʼ, maʼxoʼob utsiloʼ bín pʼátac utsoʼobeʼ, beyxann le maʼxoʼob kasaʼantacoʼoboʼ bín pʼátacoʼob kasaʼanoʼob; le betiʼqueʼ le kasaʼanoʼoboʼ letiʼoʼobeʼ le quiʼsinoʼ yétel u angeloʼob letiʼ, letiʼoʼobeʼ bín xiʼicoʼob ichil kák mix bikin bín xuʼuluc, le tuʼux mentaan utiaʼaloʼoboʼ, u yah ólaleʼ bey humpʼél kaʼnab yan kákeʼ yétel azufre u kákil cu naʼacal utiaʼal mix bikin bín tuʼupuc.

17 Sén hach nohoch yétel hach toh c Hahal Dios. Tumen Letiʼeʼ cu dzoʼocsic tulácal u tʼanoʼob, dzoʼoc xan u hókol tu chiʼ, yételeʼ u tʼaneʼ yan u dzoʼocsaʼal.

18 Baʼaleʼ heʼel túnaʼ, le utsil maʼcoʼoboʼ, le u maʼalob maʼquiʼloʼob le u Sagrado Máquiʼl Israeloʼ, le maʼxoʼob dzoʼoc u creertiʼcoʼob tiʼ u Sagrado Máquiʼl Israel, le dzoʼoc u cúchicoʼob u cruziloʼob le yókolcabaʼ yétel maʼ sublahoʼobiʼ, leloʼobaʼ bín utiaʼalintoʼob u reinoil Hahal Dios, le h mentaab utiaʼaloʼob le cah mentaab le yókolcabaʼ, u quiʼmaʼc ólaloʼobeʼ hach chucaʼan utiaʼal le kinoʼob minaʼan u xuloʼ.

19 Hach sén cu u chʼaʼic ótsilil c Hahal Dios u Sagrado Máquiʼl Israel! Tumen letiʼeʼ cu salvartiʼc u maʼalob maʼquiʼloʼob tiʼ le nohoch kakas baʼaloʼ, le quiʼsinoʼ, le químiloʼ, le cúchil quiʼsinoʼ yétel le u kaʼnabil kák yétel azufreoʼ, leloʼ yah ólal minaʼan u xul.

20 Hach yaʼab u yutsil c Hahal Dios. Tumen letiʼeʼ u yoheʼl tulácal baʼaloʼob, minaʼan mixbaʼal wá maʼ u yoheʼl letiʼ.

21 Yételeʼ cu tal yókolcab utiaʼal u salvartiʼc tulácal maʼcoʼob, wá u kátoʼob u yuʼuboʼob u tʼan; tumen heʼel túnaʼ, letiʼ cúchic u yayah ólal tulácal maʼcoʼob, beyoʼ, u yayah ólal tulácal baʼax cuxaʼan, heʼebix xíboʼobeʼ beyxann coʼoleloʼob yétel meheʼn palal, maʼxoʼob yanoʼob ichil u familiail Adan.

22 Letiʼ cu yahtal yól tu yoʼolal beyoʼ tulácal maʼc ca anac u caʼa cuxtaloʼob tu yoʼolal u páhtal u wáʼataloʼob tu tán letiʼ tu nohoch kinil le juiciooʼ.

23 Cu yaʼalic tun tiʼ tulácal maʼcoʼobeʼ ca u pʼat u kebanoʼob yétel ca oc haʼnacoʼob tu kabaʼ yétel ca u creertoʼob tiʼ u Sagrado Máquiʼl Israel wá maʼeʼ maʼ bín páhchahac u caʼa sutoʼob tu reinoil Hahal Diosiʼ.

24 Wá xan maʼ tán u pʼatiʼcoʼob u kebanoʼob, mix tu creertiʼcoʼob tu kabaʼ mix tán u yoc haʼoʼob tu kabaʼ, mix tán u betiʼcoʼob uts tac tu xuleʼ, bín kascuntaacoʼob tumen le Yumtsil Hahal Dios, u Sagrado Máquiʼl Israel, letiʼ aʼalmaʼhil.

25 Le betiʼqueʼ, letiʼeʼ, dzoʼoc u dzaic humpʼél ley, le tuʼux maʼ dzaʼan mix humpʼél leyeʼ minaʼan castiʼgo, le tuʼux minaʼan castiʼgoeʼ minaʼan condenacion, tuʼux minaʼan condenacioneʼ cu chʼaʼic ótsilil u Sagrado Máquiʼl Israel tiʼoʼob tu yoʼolal le nohoch sacrificio; tumen cu salvartaaloʼob tu yoʼolal u páhtalil letiʼ.

26 Tumen le nohoch sacrificiooʼ cu dzoʼocsic baʼax u kát u justiʼciail tiʼ tulácal le maʼxoʼob maʼ u kamoʼob le leyoʼ, le betiʼqueʼ cu salvartaaloʼob tiʼ le nohoch kakas baʼaloʼ, le químiloʼ, beyxann le u cúchil quiʼsin, xan le quiʼsinoʼ, yétel xan le u kaʼnabil kák yétel azufreoʼ, leloʼ yah ólal minaʼan u xul beyoʼ cu bisaʼaloʼob tiʼ le Hahal Dios dzamaʼh u cuxtaloʼoboʼ, leloʼ letiʼ le u Sagrado Máquiʼl Israeloʼ.

27 Baʼaleʼ ótsil le maʼx dzaʼan le ley tiʼoʼ; beyoʼ, yan tiʼ tulácal u tʼan Hahal Dios, heʼebix toʼoneʼ, baʼaleʼ maʼ tu yuʼubic tʼaniʼ yétel cu xuʼupic u kiniloʼob wáy h luʼumaʼ tumen hach kas yaniʼl.

28 Sénquech kas u tuculil le kasiʼl baʼaloʼ. Hach orgulloso, hach dzoyaʼan yétel hach xaʼakaʼan u tucul le maʼcoʼoboʼ. Wá chan cambalnahaʼanoʼobeʼ cu tucultiʼcoʼobeʼ hach sén yaʼab u naʼat, maʼ tán u yuʼubicoʼob u tan Hahal Dios, tumen cu dzic tu tseloʼob, bey hach cu tuclicoʼob decosque hach cu naʼatiʼcoʼob tu bel letiʼoʼobeʼ; le betiʼqueʼ u naʼatiʼloʼobeʼ chén u chocopolil yétel mixbaʼal u belal tiʼoʼob. Letiʼoʼobeʼ bín xuʼulsaʼacoʼob.

29 Baʼaleʼ maʼalob u betiʼcuba maʼc cambalnahaʼan wá cu yuʼubic u tʼan Hahal Dios.

30 Baʼaleʼ, ótsil le maʼxoʼob ayikaloʼob tiʼ u baʼaliloʼob le yókolcabaʼ. Tumen hach ayikal maʼcoʼobeʼ cu tucultiʼcubaoʼob maʼs maʼalob tiʼ le ótsiloʼoboʼ, cu chʼaʼapachtiʼcoʼob le maʼx tac u yuʼubicoʼob u tʼan beyxann u ayikaliloʼobeʼ letiʼ u diosiloʼob. Baʼaleʼ, heʼel túnaʼ, u ayikaliloʼobeʼ bín xuʼuluc xan hunmúchʼ yételoʼob.

31 Ótsil le cócoʼob maʼ u kátoʼob yuʼubicoʼ, tumen bín xuʼulsaʼacoʼob.

32 Ótsil le chʼopoʼob maʼ u kátoʼob ilicoʼ, tumen bín xuʼulsaʼacoʼob xan.

33 Ótsil le cu yaʼalicoʼob yaʼab baʼaleʼ maʼ dzaʼan u yóloʼob u betiʼcoʼoboʼ, tumen le quen u kahóltoʼob u kasaʼaniloʼob tu dzoʼoc kineʼ letiʼ cun h ment lob tiʼoʼob.

34 Ótsil le maʼx cu tusoʼ, tumen bín puʼuluc teʼ cúchil quiʼsin.

35 Ótsil le maʼc cu quínsicoʼ u kát quínsic maʼqueʼ, tumen bín químic.

36 Ótsil le maʼxoʼob cu betiʼcoʼob sénqech kas baʼaloʼoboʼ tumen bín puʼulucoʼob tiʼ u cúchil quiʼsin.

37 Ótsil le maʼxoʼob cu adorartiʼcoʼob yanal diosoʼob, tumen u quiʼsin tulácal le quiʼsinoʼoboʼ cu quiʼmaʼcchahal u yól tiʼ letiʼoʼob.

38 Tu dzoʼoqueʼ ótsil le maʼxoʼob cu químiloʼob ichil u kebanoʼoboʼ, tumen yan u sutiʼcubaoʼob actán tiʼ Hahal Dios, cu pactiʼcoʼob u yicheʼ cu pʼátaloʼob ichil u kebanoʼob.

39 In sucuʼuneʼex hach in yacunmeʼexeʼ, quexiʼeʼ ca kaʼahac teʼex hach yaʼab u yahil u kebanchahal maʼc tu contra le Hahal Dios sén utsoʼ yétel hach yaʼab u yahil can u kububa maʼc tiʼ u kasaʼantac tán le maʼx cu tusoʼ. Ca kaʼahac teʼexeʼ wá cu tuclic maʼc tiʼ u baʼaliloʼob yókolcabeʼ, letiʼ le químiloʼ, baʼaleʼ wá cu tuclic maʼc tiʼ u baʼaliloʼob le pixanoʼ, letiʼ le cuxtal minaʼan u xuloʼ.

40 In sucuʼuneʼex hach in yacunmeʼexeʼ, uʼuyeʼex baʼax quiʼn wáʼalic. Ca kaʼahac teʼexeʼ hach nohoch le u Sagrado Máquiʼl Israeloʼ. Maʼ a wáʼaliqueʼex dzoʼoc in wáʼalic teʼex chich tʼanoʼob; tumen wá bey ca betiʼqueʼexoʼ, maʼ tʼan a kamiqueʼex le hahoʼ; tumen dzoʼoc in wáʼalic teʼex u tʼan le Máx u mentmaʼheʼex. In woheʼleʼ, le hahil tʼanoʼoboʼ hach chich utiaʼal tulácal le maʼx maʼ limpioʼoboʼ; baʼaleʼ le toh u cuxtaloʼoboʼ maʼ sahacoʼob tiʼiʼ, tumen u yabilmoʼob le hahoʼ yétel maʼ tu xaʼakal u tuculoʼobiʼ.

41 Bey túnoʼ le in sucuʼuneʼex in yabilmeʼexoʼ, coʼoteneʼex tiʼcnal Yumtsil, le Sagrado Mácoʼ. Ca kaʼahac teʼexeʼ u beloʼobeʼ tohtac. Heʼel túnaʼ, le behaʼ utiaʼal maʼqueʼ nuʼutʼ, baʼaleʼ hach toh actán yaniʼl tiʼ; yétel le maʼx calántiʼc le honahoʼ letiʼ u Sagrado Máquiʼl Israel teʼeloʼ maʼatech u kubic le meyahoʼ tiʼ mixmaʼc maʼsiʼ yétel minaʼan ulak honaheʼ chén le hah humpʼéloʼ; tumen letiʼeʼ maʼ tán u páhtal u tuʼusul, u kabaʼeʼ Yumtsil Hahal Dios.

42 Heʼemaʼxac cu kopeʼ cu heʼ le honahoʼ tiʼ; le tún le yaʼab u naʼatoʼoboʼ yétel le maʼxoʼob sén cambalnahaʼanoʼoboʼ yétel le ayikaloʼoboʼ, le maʼxoʼoboʼ hach caʼanal u yichoʼob tumen hach cambalnahaʼanoʼob yaʼab u naʼat, yétel yaʼab u ayikaliloʼob, heʼel túnaʼ letiʼoʼobeʼ le hach kuxinahaʼan yételoʼoboʼ; wá maʼ tán u pʼatiʼcoʼob le baʼaloʼoba, ca u betubaoʼob bey maʼc mixbaʼal yoheʼl tu tán Hahal Dios ca u betubaoʼob utiaʼal u caʼansaʼaloʼobeʼ letiʼeʼ maʼ bín u heʼ le honahoʼ tiʼoʼobiʼ.

43 Baʼaleʼ u baʼaliloʼob le maʼx yaʼab u tucul yétel le yaʼab u naʼatoʼoboʼ bín pʼátac taacaʼan tiʼ letiʼoʼob teʼ kinoʼob minaʼan u xuloʼoboʼ; beyoʼ, letiʼ le quiʼmaʼc ólal mentaan utiaʼal le sagrado maʼcoʼoboʼ.

44 In sucuʼuneʼex hach in yacunmeʼexeʼ, ca kaʼahac teʼex baʼax quiʼn wáʼalic. Heʼel túnaʼ, quiʼn luʼsic in nokeʼ quiʼn títiʼc in nok ta táneʼex, tán in orar tiʼ u Hahal Diosil in salvacioneʼ ca u pacten yétel yich tulácal baʼal chicaʼan yilicoʼ. Bey túnoʼ a woheʼleʼexeʼ, tiʼ u dzoʼoc kin le quen juzgartaac tulácal maʼcoʼob tu yoʼolal baʼax u mentmaʼhoʼob, u Hahal Dios Israeleʼ tu yilah tiʼn títah a kebaneʼex tiʼ ten yételeʼ sac yaniʼlen wáʼalacbal tu tán, teneʼ mixbaʼal yan in wil yétel a kiʼikeleʼex.

45 In sucuʼuneʼex in yabilmeʼexeʼ ca náchchaqueʼex tiʼ a kebaneʼex. Titeʼex ta tseleʼex u cadenail le maʼx u kát u kaxeʼexoʼ. Coʼoteneʼex tu yicnal le Hahal Dios maʼx u tunichil a salvacioneʼexoʼ.

46 Preparartabaeʼex utiaʼal le hach nohoch kin le quen dzaʼabac le baʼax tohoʼ tiʼ le utsil maʼcoʼ; beyoʼ, u kinil le juiciooʼ tu yoʼolal maʼ a sén chʼaʼiqueʼex sahquiʼl, mix u kaʼahal chucaʼan tiʼ teʼex a kakas kebaneʼex, ca a kaʼam tʼanaqueʼex sén tohoʼob, tohoʼob u juicioʼob Yumtsil yan tech tulácal páhtalil. Baʼaleʼ in woheʼl in kebanoʼob; in betmaʼh tu contra a leyil, intiʼaʼal in kebanoʼob, le xan le quiʼsinoʼ dzoʼoc u kamiquen ca dzaʼabac ten tiʼ u sén yayah ólaloʼob letiʼ.

47 Baʼaleʼ heʼel túnaʼ, in sucuʼuneʼex; kabét wá ca in kaʼahs teʼex u sénquench yahil le baʼaloʼoba? Heʼel wá in wáʼalic baʼal chich ta tuculeʼex wá maʼalob a tuculeʼexeʼ? Kabét wá in wáʼalic teʼex toh bey heʼebix hach toh u yaʼalaʼal le hahoʼ wá a pʼatmaʼheʼex le kebanoʼ?

48 Heʼel túnaʼ, wá toh a cuxtaleʼexeʼ u deber in wáʼalic teʼex utsil baʼaloʼob; baʼaleʼ tumen maʼ toh a cuxtaleʼex yétel yaneʼn ichileʼex bey a maʼestroeʼexeʼ, kabét ca in caʼans teʼex u keyahil le kebanoʼ.

49 Heʼel túnaʼ, hach sénquech kas tiʼn wich le kebanoʼ cu quiʼmaʼcchahal u yól tiʼ le baʼax tohoʼ; ten túneʼ bín in adorart u yutsil kabaʼ Hahal Dios.

50 Coʼoteneʼex in sucuʼuneʼex, tulácaleʼex le ukaheʼexoʼ coʼoteneʼex tiʼ le haʼoʼobaʼ; tac le maʼx minaʼan takin tiʼeʼ, coʼoten yétel ca hanalnac; beyoʼ, coʼoteneʼex, maʼneʼex haʼil uva yétel lecheʼ xmaʼ takin yétel xmaʼ tohol.

51 Tu yoʼolal túneʼ maʼ a xupiqueʼex takin tiʼ baʼaloʼob mixbaʼal u belal mix a xupiqueʼex a meyaheʼex tiʼ baʼaloʼob maʼ tán u quiʼmaʼccunsic a wól. Beteʼex le baʼax quiʼn wáʼalic teʼexaʼ ca kaʼahac teʼex le baʼaxoʼob in wáʼalmaʼhoʼ. Coʼoteneʼex tu yicnal u Sagrado Máquiʼl Israel ca quiʼmaʼcchahac a wóleʼex tiʼ baʼaxoʼob maʼ tu xuʼulul mix tán u kastal, ca polocchaqueʼex.

52 Heʼel túnaʼ in sucuʼuneʼex hach in yacunmeʼexeʼ, ca kaʼahac teʼex baʼax u yaʼalmaʼh a Hahal Dioseʼex; orarnaheʼex tiʼ untiʼch tiʼ le kinoʼ yétel ca a dzaeʼex diosboʼotiʼc tiʼ u yutsil kabaʼ tiʼ le ákaboʼ. Ca quiʼmaʼcchahac a wóleʼex.

53 Ilawileʼexeʼ hach nuctac u promesaoʼob Yumtsil yétel hach u xímbatmaʼh tiʼcnal u palal maʼcoʼob; yétel tu yoʼolal hach nohoch letiʼ yétel hach uts yétel hach cu chʼaʼic ótsilileʼ, dzoʼoc u prometertiʼc toʼoneʼ u palal c palaleʼ maʼ bín láh xuʼulsaʼacoʼob tiʼ u bakeloʼobiʼ, sino letiʼeʼ bín u canántoʼob; beyoʼ tiʼ le kinoʼob bín talacoʼoboʼ bín kuchuc u betubaoʼob humpʼél utsil ramaʼ tiʼ u yotoch Israel.

54 Behlaʼ túneʼ, in sucuʼuneʼex in kát in wáʼal teʼex ulak baʼaloʼobeʼ; baʼaleʼ sámaʼleʼ heʼ in wáʼalic teʼex u dzoʼoc in tʼanoʼob. Amen.