1 Behlaeʼ le in yabilmeʼex in sucuuneʼexaʼ, in tucliqueʼ tán a tucultiʼqueʼex ta pucsiʼkaleʼexeʼ le baʼax quen a beteʼex quen dzoʼococ a wocoleʼex tiʼ le behoʼ. Baʼaleʼ, heʼel túnaʼ, baʼaxtén ca tucultiʼqueʼex ta pucsiʼkaleʼex le baʼaloʼobaʼ?

2 Maʼ wá kahaʼan teʼex tiʼn wáʼalaheʼ le quen dzoʼococ a kamiqueʼex le Hahil Pixanoʼ heʼel u páhtal a tʼaneʼex ichil u tʼan le angeloʼoboʼ? Bix cun páhtal a tʼaneʼex ichil u tʼan angeloʼob wá maʼ tu yoʼolal le Hahil Pixanoʼ?

3 Angeloʼobeʼ cu tʼanoʼob tu yoʼolal u páhtalil le Hahil Pixanoʼ; tu yoʼolaleʼ cu yaʼalicoʼob u tʼan Cristo. Le betiʼqueʼ tiʼn wáʼalah teʼexeʼ ca chuʼupuc a wóleʼex tiʼ u tʼan Cristo; tumen heʼel túnaʼ u tʼan Cristo cun u yaʼal teʼex tulácal baʼax u deber a betiʼqueʼex.

4 Tu yoʼolaleʼ, le cu dzoʼocol in wáʼalic le tʼanoʼobaʼ wá maʼ tán u páhtal a naʼatiʼqueʼexeʼ, lelaʼ tumen maʼ tán a kátiʼqueʼex mix tán a kopeʼex, tu yoʼolaleʼ maʼ bín bisaʼaqueʼex teʼ sásiloʼ sino bín químiqueʼex ichil le eʼhochʼeʼeniloʼ.

5 Tumen heʼel túnaʼ, quiʼn caʼa aʼalic teʼex, wá tumen ca wocoleʼex tiʼ le behoʼ yétel ca kamiqueʼex le Hahil Pixanoʼ, letiʼ bín u yeʼes teʼex tulácal baʼax u deber a betiʼqueʼex.

6 Heʼel túnaʼ, lelaʼ letiʼ u caʼansahil Cristo, maʼ bín dzaʼabac ulak caʼansahil tac le quen dzoʼococ u yeʼesicuba tiʼ teʼex tu bakeloʼ. Le tún quen u yeʼesuba tiʼ teʼex tu bakeloʼ, le baʼax quen u yaʼal teʼexeʼ letiʼ le baʼax bín a beteʼexoʼ.

7 Beʼoraaʼ ten Nefieneʼ, mixbaʼal ulak cu páhtal in wáʼalic; letiʼ le Pixanoʼ letiʼ maʼ tu chaʼic in tʼan, quiʼn pʼátal bey tán u yahtal in wól tu yoʼolal maʼ tu creertiʼc maʼquiʼ, tumen hach kasaʼanil, mixbaʼal yoheʼl yétel hach chich u yól maʼcoʼob; tumen maʼ tán u caxtiʼcoʼob ca u yoheltoʼobiʼ, mix tán u naʼatiʼcoʼob le nohoch caʼansahoʼ le quen dzaʼabac le caʼansahoʼ tiʼoʼob hach toh, beyoʼ, quex wá sén toh le tʼanoʼ.

8 Behlaʼ túneʼ le in yabiltiʼqueʼex in sucuʼuneʼexaʼ, quiʼn wiliqueʼ lailiʼ tán a tuculeʼex ta pucsiʼkaleʼexeʼ, tu yoʼolaleʼ cu yahtal in wól ca kabétchahac in wáʼalic teʼex le baʼaloʼobaʼ. Tumen wá ca wuʼuyiqueʼex u tʼan le Pixanoʼ le cu caʼansic maʼcoʼob ca orarnacoʼobeʼ heʼel a wohéltiʼqueʼex kabét ca orarnac maʼqueʼ, tumen u kasiʼl baʼaleʼ maʼ tán u caʼansic maʼc ca orarnaquiʼ, sino cu caʼansiqueʼ maʼ kabét ca orarnaqueʼex untiʼch yétel maʼ tu saʼatal a wóleʼex; mixbaʼal u deber a betiʼqueʼex tu meyhul Yumtsil wá maʼ tánil ca orar tu kabaʼ Cristo tu yoʼolal u bendecirtiʼc le baʼax ca betiʼqueʼexoʼ, yétel xan tu yoʼolal a meyaheʼexeʼ ca betaac uts tiʼ teʼex.