1 Beʼoraaʼ ten Nefieneʼ bin in caʼah in tʼan tu yoʼolal le baʼax tu yaʼalah in tataoʼ bín úchuc tiʼ Jose, le h bisaʼab teʼ Egiptooʼ.

2 Tumen heʼel túnaʼhach tu hahileʼ letiʼeʼ tu yaʼalah le baʼax bín úchuc tu yoʼolal tulácal u palal u palal. Beyoʼ minaʼan yaʼab úchben tʼan yan u yúchuloʼoboʼ maʼs nohoch que le heʼelaʼ ichil le tu dzíbtahoʼoboʼ. Ca tún tu yaʼalah le baʼax bín úchuc tu yoʼolal toʼon yétel tu yoʼolal le u palal c palal bín talacoʼoboʼ, leloʼ dzíbtaan tiʼ le laminaoʼob mentaan yétel bronceoʼ.

3 Le cah dzoʼoc u tʼan in tata tu yoʼolal u úchben tʼanil Joseeʼ ca tu tʼanah u palal Laman ca tu yaʼalah tiʼoʼobeʼ: Heʼel in palalaʼ, tumen teʼex u palal in yáx paleʼ in kát ca a wuʼuyeʼex baʼax quen in wáʼaleʼ.

4 Tumen Yumtsil Hahal Dioseʼ dzoʼoc u yaʼalic: Caʼaliquiʼl a betiʼqueʼex in tʼanoʼobeʼ bín anac teʼex yaʼab baʼaloʼob teʼ luʼum heʼelaʼ, baʼaleʼ wá maʼ tán a wuʼuyqueʼex in tʼanoʼobeʼ bín puʼuluqueʼex tiʼn tán.

5 Baʼaleʼ, heʼel túnaʼ in palaleʼex maʼ tu páhtal in wenel ich luʼumoʼ xmaʼ in pʼatiʼc teʼex in bendicion ta wókoleʼex; tumen heʼel túnaʼ, teneʼ in woheʼleʼ wá ca caʼansaʼaleʼex tiʼ le beh u deber a bisiqueʼexoʼ, maʼ tán a pʼatiʼqueʼex.

6 Baʼaleʼ wá cu lúbul u kasaʼanil ta wókoleʼexeʼ heʼel túnaʼ quiʼn pʼatiʼc teʼex in bendicion tu yoʼolal u luksaʼal teʼex le maʼldicionoʼ yétel ca lúbuc yókol a tataeʼex.

7 Le betiʼqueʼ Yumtsileʼ maʼ bín u chaʼ a químileʼexiʼ, tumen tu yoʼolal in bendicion; baʼaleʼ bín u chʼaʼ ótsilil tiʼ teʼex yétel tiʼ u palal a palaleʼex utiaʼal le kinoʼob minaʼan u xuloʼ.

8 Le cah dzoʼoc u tʼan in tata yétel u palal Lamaneʼ ca tu tʼanah tu yicnal u palal Lemuel.

9 Ca tu yaʼalah tiʼoʼob beyaʼ: Heʼel túnaʼ in palaleʼex, teʼex u palaleʼex u segundo in palal quiʼn pʼatiʼc teʼex xan le bendicion heʼebix dzoʼoc in dzaic tiʼ u palal Lamanoʼ; tu yoʼolaleʼ maʼ bín xuʼulsaʼaqueʼex tulácaleʼexiʼ sino tu dzoʼoqueʼ u palal a palaleʼexeʼ bín dzaʼabac tiʼoʼob u bendicion.

10 Leca tún h dzoʼoc u tʼan in tata yételoʼobeʼ, heʼel túnaʼ ca tu yaʼalah tiʼ u palal Ismaʼel, beyoʼ tiʼ tulácal le yanoʼob tu nahil letiʼoʼ.

11 Cu dzoʼocol u tʼan yételoʼobeʼ ca tu tʼanah Sameʼ ca tu yaʼalah tiʼ: Bendecirtaanech yétel u palal a palal tumen bín anac tech le luʼum heʼelaʼ heʼebix xan a wídzin Nefieʼ, yételeʼ u palal a palaleʼ bín xoʼococoʼob hunmúchʼ yétel le utiaʼal letiʼoʼ; techeʼ bín a betaba bey heʼebix letiʼoʼ, u palal a palaleʼ bín beychacoʼob bey heʼebix le utiaʼal letiʼoʼ, techeʼ bín bendecirtaaquech tulácal u kiniloʼob a cuxtal.

12 Le tún cah dzoʼoc u tʼan bey tiʼ tulácal le yanoʼob tu nahilaʼ, heʼebix u yuʼubic tu pucsiʼkaleʼ yétel heʼebix aʼalaʼabic tiʼ tumen le u Pixan Yumtsil yan tiʼoʼ, in tataeʼ h chʼíhi, cah químeʼ cah muʼuquiʼ.

13 Le cah dzoʼoc u maʼn dzeʼedzec kin u químiqueʼ, Laman, Lemuel yétel u palal Ismaʼeleʼ cah kuxinahoʼob tiʼ ten tu yoʼolal úchic u sén aʼalaʼal u yaʼalaʼal tiʼoʼob le kexbil tʼanoʼoboʼ tumen Yumtsil.

14 Tumen ten Nefieneʼ, quiʼn wuʼuyiquiʼnbaeʼ hach kabét in tsicbatiʼc tiʼoʼob heʼebix tʼanahiʼc in tataeʼ, tumen teneʼ in wáʼalmaʼh tiʼoʼob yaʼabach baʼaloʼob, beyxann in tata antes u químileʼ beyoʼ yaʼab tiʼ le tʼanoʼoboʼ dzíbtaan tiʼ le ulak in laminaoʼob, tumen tu yókoleʼ tiʼ dzíbtaan maʼs tiʼ le baʼax úchoʼ.

15 Tu yoʼolal tún le heʼeloʼobaʼ quiʼn dzíbtiʼc u tuculoʼob tiʼn wól yétel xan yaʼab tiʼ le sagrado dzíboʼob yan tiʼ le laminaoʼob mentaan yétel bronceoʼ. Tumen cu quiʼmaʼctal in wól tiʼ le sagrado dzíboʼoboʼ yételeʼ quiʼn tucultiʼcoʼob tiʼn pucsiʼkaleʼ, quiʼn dzíbtiʼqueʼ utiaʼal u cambal in palal yétel ca úchuc baʼaloʼob maʼalobtac tiʼoʼob.

16 Heʼel túnaʼ cu quiʼmaʼctal in wól tiʼ u baʼaliloʼob Yumtsil yétel cu tucul in pucsiʼkal huntiʼch tiʼ le baʼaxoʼob in wuʼuymaʼhoʼ yétel le in wilmaʼhoʼ.

17 Baʼaleʼ quex tumen nohoch u yutsil Yumtsil utiaʼal u yeʼesic ten u nucuch meyahoʼob cu háksic in wóleʼ, in pucsiʼkaleʼ cu kaʼam aʼalic: Hach ótsil maʼquen, bevoʼ cu yahtal in wól tu yoʼolal in bakel. Cu sén yahtal in wól yoʼolal in kebanoʼob.

18 Quin wiliquiʼnba tulácal tiʼn baʼpachil tu yoʼolal le tentacionoʼob yétel le kebanoʼob sébaʼan u bisiquenoʼoboʼ.

19 Le quen in dzíbolt ca quiʼmaʼcchahac in wóleʼ cu yókol in wól tu yoʼolal in kebanoʼobeʼ, quex wá beyoʼ in woheʼl tiʼ maʼx in dzamaʼh in wól.

20 In Hahal Dios u yántmaʼheʼn; dzoʼoc u bisiquen ichil in yayah ólal teʼ kaxoʼ yétel dzoʼoc u calántiʼquen tu yókol u haʼil le kaʼnaboʼ.

21 Dzoʼoc u sén chupiquen yétel u yacunah tac u tóquiʼc in bakel.

22 Dzoʼoc u yaʼachʼeʼtiʼc in enemigoʼobeʼ tac u betmaʼh u quiʼquiʼlanquiʼloʼob tiʼn tánil.

23 Heʼel túnaʼ letiʼeʼ dzoʼoc u yuʼubic in kaʼam tʼan tiʼ le kinoʼ, dzoʼoc xan u dzaic ten naʼatiʼl tiʼ visionoʼob ich ákab.

24 Ich kineʼ in sén dzamaʼh in wól in orar tu tánil; beyoʼin túxtmaʼh in tʼan teʼ caʼanoʼ cah ém angeloʼobeʼ ca tu meyahtenoʼob.

25 In wínclileʼ dzoʼoc u bisaʼal xiknal tumen u Pixan tac hach caʼanal luʼumoʼob; in wichoʼobeʼ dzoʼoc u yilicoʼob nucuch baʼaloʼob; beyoʼ hach sén nucuch baʼaloʼob maʼs tiʼ maʼc; le betiʼqueʼ h aʼalaʼab ten maʼ in dzíbtiʼcoʼob.

26 Wá dzoʼoc tún in wilic nucuch baʼaloʼobeʼ, wá Yumtsil yétel u yutsil tiʼ u palal maʼcoʼobeʼ, dzoʼoc u xímbatiʼcoʼob yétel cu sénquech chʼaʼic ótsilil tiʼoʼobeʼ, baʼaxtén cu yokol in pucsiʼkcal yétel cu pʼaʼatal in pixan tiʼ yah ólal, in bakeleʼ cu tsoyaʼantal, in mukeʼ cu lúbul tu yoʼolal le baʼax cu betiʼc u yahtal in wól?

27 Baʼaxtén tún quiʼn dziquiʼnba tiʼ keban tu yoʼolal in bakel? Beyoʼ, baʼaxtén bín in chaʼ in lúbul tiʼ tentacionoʼob ca in pát tuʼux tiʼn pucsiʼkal utiaʼal le kas maʼxoʼ tu yoʼolal ca u kascunt in paz yétel cu bet lob tiʼn wól? Baʼaxtén quiʼn kúxul tu yoʼolal in enemigooʼ?

28 Áheʼn tún in pixan. Maʼ u lúbul in muk ichil keban. Ca quiʼmaʼcchahac in wól in pucsiʼkal. Maʼ in dzaic cúchil utiaʼal u enemigoil in pixan.

29 Maʼ in caʼa pʼuʼuhul tu yoʼolal in enemigoʼob mix xan u lúbul in muk tu yoʼolal in yah ólal.

30 Ca quiʼmaʼcchac in wól in pucsiʼkal; kaʼam tʼanen Yumtsil ca a wáʼal tiʼ: In Yum, teneʼ heʼel in dza tech in wól untiʼcheʼ. Beyoʼ bín quiʼmaʼcchahac in wól tu yoʼolal tech in Hahal Dios yétel u nohoch tunichilech in salvacion.

31 Bín wá a salvart in pixan Yumtsil? Bín wá a salvarteʼn tu kab in enemigoʼob? Bín wá a bet in quiʼquiʼlanquiʼl tu tán keban?

32 Ca kaʼalac tiʼn tán untiʼch u honahiloʼob u cúchil quiʼsinoʼ tumen yah in wól yétel hach in kubic in pucsiʼkal in pixaneʼ. In Yumeʼ, maʼ a kalic u honahil a toh beh tiʼn tán, tu yoʼolal u páhtal in xímbal tu behil le cabal luʼumoʼ yétel tu yoʼolal u páhtal in xímbal toh tiʼ táx behoʼ.

33 Yumtsileʼ ca anac baʼpach tiʼ ten u nokil a toh tʼan, Yumtsil bet ten humpʼél beh utiaʼal in púdzul tiʼ in enemigoʼob. Tohquiʼnt le beh tiʼn tánoʼ. Maʼ ta dzaic mixbaʼal tiʼn bel utiaʼal in lúbuleʼ, sino míst le beh tiʼn tá noʼ; yétel maʼ xan a kascuntiʼc in beh sino u behoʼob in enemigo.

34 In Yumtsil chén tiʼ tech in dzamaʼh in wól yétel tiʼ tech bin in dza in wól minaʼan u xul u kiniloʼob. Maʼ bín in dza in wól tiʼ u muk u kab in bakeliʼ; tumen in woheʼleʼ kascuntaal le maʼx cu dzaic u yól tiʼ u muk u kab u bakeloʼ, beyoʼ maʼldecirtaan le maʼx cu dzaic u yól tiʼ maʼqueʼ wá cu betiʼc u kab u bakel le u mukiloʼ.

35 Bixmaʼiʼ in woheʼl Hahal Dioseʼ bín u dza u yaʼabil le baʼax cu kátaal tiʼeʼ, beyoʼ, in Hahal Dioseʼ bín u dza ten wá quiʼn kátiʼc tu bel. Le betiʼqueʼ, bin in líks in tʼan teʼ caʼanal tuʼux yaneʼchoʼ, beyoʼ, bín kaʼam tʼanaquen tiʼ tech, in Hahal Dios, u nohoch tunichil in toh behoʼ. Heʼel túnaʼ, bín naʼacac in tán ta wicnal utiaʼal le kinoʼob minaʼan u xuloʼ, in tunichilech yétel in Hahal Dios minaʼan a xul. Amen.