1 Beʼoraaʼ quiʼn tʼaniquech tech Jose, tech u tʼup in palal. Techeʼ h síheʼch tu kaxil in yah ólal; beyoʼ tu dzah tech sásil a maʼmaʼ tu kinil u maʼs yahtal in wól.

2 Ca u kub tech Yumtsil xan le luʼumaʼ; le luʼum sén hadzutsaʼ, utiaʼal ca dzaʼabac tech yétel u palal a palal, yétel a sucuʼunoʼob utiaʼal ca canántaaquech minaʼan u xul u kiniliʼ wá teʼex ca wuʼuyiqueʼex u tʼan u Sagrado Máquiʼl Israel.

3 Behlaʼ túneʼ Joseʼ, u tʼupil in palal, tech le tiʼn bisah teʼ tu kaxil ichil yah ólaloʼ, ca anac tech bendicionoʼob Yumtsil minaʼan u xul tumen u palal a palaleʼ maʼ bín láh xuʼulsaʼacoʼobiʼ.

4 Tumen, heʼel túnaʼ, tech u yichil in bak, teneʼ u palen u palal Jose le maʼx h bisaʼab bey esclavo tac Egiptoeʼ. Yételeʼ nuctac le maʼalob promesaoʼob tu dzah Yumtsil tiʼoʼ.

5 Tu yoʼolaleʼ, Joseeʼ, hach tu hahil tu yilah c kinil. Tu kamaʼh humpʼél promesa tiʼ Yumtsileʼ, tiʼ ichil u palal u palaleʼ bín u líks Yumtsil Hahal Dios humpʼél u toh ramaʼil tiʼ u yotoch Israel maʼ letiʼ le Mesiasoʼ, sino humpʼél u ramaʼil bín bisaʼac; maʼ bín tuʼubsaʼac ichil u promesa Yumtsiliʼ, tuʼux cu yaʼalic le Mesiasoʼ; bín u yeʼesuba tiʼoʼob tu dzoʼoc kinoʼob yétel u pixanil u páhtalil tu yoʼolal u hóksicoʼob ichil le eʼhochʼeʼenoʼ tiʼ sásil, beyoʼ ichil le taacbil eʼhochʼeʼenoʼ yétel ichil u kalaʼan cuxtal tiʼ le cuxtal hálkab cu bisicubaoʼoboʼ.

6 Tumen Jose tu yaʼalah tu hahileʼ, tán u yaʼalic: Yumtsil in Hahal Dioseʼ bin u líks huntúl profeta cu yilicoʼ, huntúl profeta cu yilicoʼ yéyaʼan utiaʼal u palal in palal.

7 Beyoʼ, tu hahil Jose tu yaʼalah: Bey cu yaʼalic ten Yumtsilaʼ: Bín in líks huntúl profeta cu yilicoʼ in yéymaʼh ichil a palal, tu yoʼolal letiʼ bín quiʼmaʼcchahac u yól u palal a palal. Yan in wáʼal tiʼ ca u bet humpʼél meyah utiaʼal u yichil a bakel, letiʼoʼobeʼ promesaoʼob in mentmaʼh yétel a tataoʼoboʼ.

8 Yételeʼ heʼel in wáʼalic in tán tiʼeʼ maʼ u betiʼc ulak meyah, baʼaleʼ chén ca u bet le baʼax quen in wáʼal tiʼoʼ. Yétel yan in nohochcuntiʼc tiʼn tán tumen bín u bet ín meyah.

9 Yétel bín nohochchahac bey heʼebix Moiseseʼ, le maʼx in wáʼalmaʼh teʼex bín líkiʼc utiaʼal u salvartiʼc in cahaleʼ, u yotoch Israel.

10 Bín tún in líks Moises utiaʼal u bisic a cahal tu luʼumil Egipto.

11 Baʼaleʼ tiʼ ichil a palal bín in líks humpʼél profeta cu yilicoʼ, tiʼ maʼx bín in dza páhtalil utiaʼal u tʼoxic in tʼan tiʼ u palal a palal, maʼ chén utiaʼal u tʼoxic in tʼaniʼ, cu yaʼalic, Yumtsil, beyxanneʼ utiaʼal u tsolic maʼalob tiʼoʼob ca u creertoʼob in tʼan le tʼoxaʼan ichiloʼoboʼ.

12 Le betiʼqueʼ yan u dzíb u palal a palal beyxann u palal Juda yan u dzíb; le baʼax quen u dzíbt u palal a palal yétel le baʼax quen u dzíbt u palal u palal Judaoʼbín chʼíhic hunmúchʼ utiaʼal u yaʼachʼeʼtiʼc le maʼ hahil caʼansahoʼob tu yoʼolal u yantal u xuʼulul le baʼateloʼoboʼ ca anac paz ichil u palal a palal yétel tu yoʼolal u bisaʼaloʼob ca u kahóltoʼob le baʼax yoheʼl caʼach u tataoʼoboʼ yétel in promesaoʼob tu dzoʼoc kinoʼob cu yaʼalic Yumtsil.

13 Quex tumen maʼ yaʼab u mukiʼ in wáʼalmaʼheʼ bín betaac u yantal u muk, tu kinil quen cáhac u betaal in meyah ichil tulácal in cahal tu yoʼolal a caʼa dzaʼabal tech, u Yotoch Israel, cu yaʼalic Yumtsil.

14 Bey tún úchic u profecia Jose tán u yaʼalicaʼ: Heʼel túnaʼ, Yumtsileʼ bín u bendecirt le profetaoʼ yételeʼ le maʼxoʼob quen u yóltoʼob u xuʼulsoʼobeʼ bín yaʼachʼeʼtaacoʼob, tumen bín betaac tu hahil le promesa u dzamaʼh ten Yumtsil tu yoʼolal u palal in palaloʼ, heʼel túnaʼ, teneʼ hach in woheʼl yan u dzoʼocsaʼal le tʼanaʼ.

15 Bín dzaʼabac u kabaʼ heʼebix teneʼ yétel bín dzaʼabac u kabaʼ heʼebix u tataeʼ. Yétel bín beychahac hach heʼebix ten tumen le baʼax bín u bet Yumtsil tu yoʼolal u kab le tu yoʼolal u páhtal Yumtsiloʼ bín u bis in cahal tuʼux yan salvacion.

16 Bey úchic u tʼan tu yaʼalah Joseaʼ: Hach in woheʼl le heʼelaʼ hach u hahil bey heʼebix xan hach in woheʼl u promesa Moiseseʼ hach hah; tumen Yumtsileʼ dzoʼoc u yaʼalic teneʼ bín in canánt u palal a palal minaʼan u xul u kiniliʼ.

17 Yumtsileʼ dzoʼoc u yaʼalic bín in líks huntúl Moises yétel bín in dza páhtalil tiʼ letiʼ tiʼ hundzít cheʼ, yan in dzic xan tiʼ humpʼél naʼatiʼl utiaʼal u dzíb. Baʼaleʼ maʼ bín in pʼat u tʼan yétel u yak utiaʼal ca tʼanac yaʼabiʼ, tumen maʼ bín in bet ca u tʼan maʼalobiʼ. Baʼaleʼ bín in dzíbt in ley tiʼ yétel u hach yal in kabeʼ bín in líks huntúl maʼc ca tʼanac tu yoʼolal.

18 Tu yaʼalah xan ten Yumtsileʼ: Yan in líksic letiʼ utiaʼal u palal a palal, yétel xan bín in líks huntúl utiaʼal u tʼan tu yoʼolal letiʼ. Heʼel túnaʼ, letiʼ bín in chaʼ u dzíbtiʼc u dzíbil u palal a palal utiaʼal u palal a palal; le maʼx in líksmaʼh utiaʼal u tʼan utiaʼal u palal a palaloʼ letiʼ bín u yaʼaleʼ.

19 Le baʼaxoʼob quen u dzíbtoʼ letiʼ le baʼax quen in tucult tiʼ in naʼatiʼl maʼalob ca kuchuc tiʼcnal u palal a palaleʼ bín ilaʼac hach heʼebix dzoʼoc u tʼaʼanaloʼob tumen u palal a palal desde le luʼumoʼ tumen in kahól u feoʼob.

20 Bey yaniʼloʼob teʼ ichil le luʼumoʼ bín u yaʼaloʼob ca u pʼatoʼob u kebanoʼob yídzinoʼob, beyoʼ quex tumen dzoʼoc u maʼn yaʼabach u palal a palaloʼob tiʼ yaʼab haʼaboʼob. Beyoʼ bín tʼoʼoxoc u tʼaneʼ, heʼebix hach facil u tʼaneʼ.

21 Tu yoʼolal u feeʼ, u tʼanoʼobeʼ tiʼn chiʼ bín hókoc ca xiʼic tiʼcnal u yídzinoʼob le u palal a palaloʼoboʼ; yételeʼ quex tumen maʼ hach yaʼab u mukil u tʼanoʼobeʼ ten bín in dza u muk tiʼ u tʼanoʼob tu yoʼolal u feil ca u kaʼahs le promesa tiʼn wáʼalah tiʼ a tataoʼobeʼ.

22 Heʼel túnaʼ in pal Jose, bey úchic u profecia in tata le úchoʼ.

23 Tu yoʼolal túneʼ bendecirtaanech tu yoʼolal le promesaaʼ, tumen u palal a palaleʼ maʼ bín xuʼulsaʼacoʼobiʼ tumen bín u yuʼuboʼob u tʼanil teʼ librooʼ.

24 Bín líkiʼc xan huntíl maʼc hach yaʼab u páhtalil ichiloʼobeʼ le maʼxoʼ bín u sén bet uts, heʼebix tiʼ tʼanoʼobeʼ beyxann tiʼ meyahoʼob, letiʼeʼ yan u betiʼcuba utiaʼal u betiʼc le baʼax cu yóltiʼc Hahal Dioseʼ tu yoʼolal u sénquech feil utiaʼal u betiʼc nucuch baʼaloʼob cu háksic yól maʼc yétel u betiʼc le baʼax nohoch tu yich Hahal Dios tán u caʼa dzaic tu bel u yotoch Israel yétel u palal a sucuʼunoʼob.

25 Beʼoraaʼ bendecirtaanech Jose. Heʼel túnaʼ hach chichanech; le betiʼc túneʼ uʼuy u tʼan a sucuʼun Nefi, yételeʼ bín betaac tech hach heʼebix dzoʼoc in wáʼalic techoʼ. Kaʼahs u tʼan a tata taitac u químil. Amen.