1 Pues pa’go, atan i ginefli’e’-hu na mañe’lu-hu, humallom yu’ na en hahasso hafa para en che’gue despues di manhalom hamyo gi chalan. Lao atan, sa’ hafa na en hahasso este siha gi kurason-miyu?

2 Ti en hasso, ada, na hu sangani hamyo na yanggen en risibi i Espiritu Santo siña kumuentos hamyo nu i hila’ i mananghet siha? Pues, pa’go, taimanu hamyo kumuentos nu i hila’ i mananghet siha an ti ginen i Espiritu Santo?

3 I anghet siha manguentos ginen i alentos i Espiritu Santo; entonses, ma sangan i fino’ i Kristo. Entonses, hu sangan giya hamyo, ekungok i fino’ i Kristo; sa’ atan, i fino’ i Kristo siempre ha sangani hamyo todu siha i para en che’gue.

4 Entonses, despues di hu sangan todu este siha, yanggen ti siña en komprende siha, pues put ti manmamaisen hamyo, yan ti mandakdak hamyo; entonses, taigue hamyo gi manana, lao siempre matai hamyo gi hinemhom.

5 Sa’ atan, ta’lo hu sangani hamyo na an humalom hamyo gi chalan, ya en risibi i Espiritu Santo, siempre ha fa’nu’i hamyo todu i para en che’gue.

6 Atan, este i dottrinan i Kristo, ya tata mas dottrina para en ma na’i estaki ha manifesta gui’ gi sensen giya hamyo. Ya yanggen ha manifesta gui’ giya hamyo gi sensen, todu i ha sangan giya hamyo, debi di en che’gue.

7 Pues pa’go guahu, si Nephi, ti siña mas hu sangan; i Espiritu ha na’para yu’ sumangan mas, ya puminiti yu’ sa’ i tai hinenggen-ñiha, yan i baban-ñiha, yan i iknoranten-ñiha yan i mahettok-ñiha i taotao siha; sa’ ti manmalago’ ma espiha tiningo’, pat u ma komprende i dangkolo na tiningo’, ni’ manma na’i siha klaru, tanto klaron i palabra.

8 Pues pa’go i guinefli’e’-hu na mañe’lu-hu, hu li’e’ na en espipiha ha’ gi kurason-miyu; ya ha na’piniti yu’ para bai hu kuentos put este. Sa’ yanggen en ekungok i Espiritu ni’ ha fa’nana’gue i taotao para u fanaitai, siempre en tingo’ na debi di en fanaitai; sa’ i baba na espiritu ti ha fa’nana’gue i taotao para u fanaitai, lao ha fa’nana’gue na munga manaitai.

9 Lao atan, hu sangan giya hamyo na debi di en fanmanaitai todu i tiempo; ya munga ma cho’gue hafa para i Saina solu fine’nana en tayuyuti si Yu’os Tata gi na’an i Kristo, ya ha konsagra i che’cho’-miyu giya hamyo, ya i che’cho’-miyu para i minaolek i anten-miyu.