1 Atan, matto i tiempo na guahu, si Nephi, kumati yu’ gi Saina i Yu’os-hu, put i binibon i mañe’lu-hu.

2 Lao atan, i bubon-ñiha mas ma aomenta kontra guahu, esta manmalago’ ma puno’ yu’.

3 Hunggan, manggonggong kontra guahu, ya ilek-ñiha: I heben na che’lu-ta hinasso-ña para u gubietna hit; ya meggai pinadesi-ta put guiya; entonses, maila’ ya ta puno’ gui’, ya munga na ta fanmamadesi mas put i kuentos-ña. Sa’ atan, munga na guiya para gubietna-ta; sa’ debi hita ni’ manamko’ na mañe’lu, debi ta gubietna este na taotao siha.

4 Pa’go ti hu tuge’ gi plegu todu i fino’-ñiha kontra guahu. Lao nahong ha’ para bai sangan na ma espipiha para bai ma puno’.

5 Pues matto i tiempo na ha akonseha yu’ i Saina, na guahu, si Nephi, bai hu dingu siha ya bai falagu halom gi halom tano’, yan ayu siha i malago’ dumalak yu’.

6 Entonses, matto i tiempo na guahu, si Nephi, hu konne’ i familia-ku, yan si Zoram yan i familia-ña, yan si Sam, i amko’ na che’lu-hu yan i familia-ña, yan si Jacob yan Joseph, i heben na che’lu-hu, yan lokkue’ i mañe’lu-hu famalao’an yan todu i malago’ dumalak yu’. Ya todu i malago’ dumalak yu’ siha ayu i manmanhongge gi akonseha yan ribilasion Yu’os; entonses, ma ekungok i fino’-hu.

7 Ya in chile’ i tento’-mami yan hafa siha pusipble para hami, ya manhanao ham gi halom tano’. Ya despues i biahen-mami meggai diha esta, in hatsa i tento’-mami.

8 Ya i taotao-hu manmalago’ ma agang i lugat Nephi; entonses, in agang Nephi.

9 Ya todu i manhahami manmalago’ ma agang siha i taotao Nephi.

10 Ya in chagi para bai in esge i sentensia, i lai siha, yan i etden i Saina siha, gi todu manera konsiste gi lain Moises.

11 Ya i Saina gaige giya hami; ya maolek lina’la’-mami; sa’ in tanom i pipitas, ya in kusecha ta’lo abondansia. Ya meggai pineksai-mami ni’ todu klasen ga’ga’.

12 Ya guahu, si Nephi, hu chule’ lokkue’ i nota siha ni’ ma matka gi plegon bronse; yan i bola, pat i kompas, ni’ ma pripara para si tata-hu ginen i kannai i Saina, konsiste nu ayu i ma tuge’.

13 Pues matto i tiempo na maloffan maolek i lina’la’-mami, ya mumeggai ham gi tano’.

14 Ya guahu, si Nephi, hu chule’ i sapblen Laban, ya hu fa’tinas meggai sapble gi taiguihi na klasi, sino i taotao siha ni’ manma a’agang Lamanites u fanmatto ya u ma destrosa ham; sa’ hu tungo’ ha i chinatli’e’-ñiha giya guahu yan i famagu’on-hu yan ayu siha i manma a’agang taotao-hu.

15 Ya hu fa’na’gue i taotao-hu manmanhatsa guma’, yan para u fanma cho’cho’ gi todu manera nu i hayu, yan i lilok, yan i kopble, yan i bronse, yan i aseru yan i oru, yan i plata, yan i prisiosu na acho’-siha, ni’ mansen abondansia.

16 Ya guahu, si Nephi, hu hatsa un templo; ya hu hatsa parehu yan i templon Solomon fuera di ti ma hatsa yan meggai prisiosu na kosas siha; sa’ taya’ nu ayu siha gi tano’, entonses, ti siña ma hatsa taiguihi i templon Solomon. Lao i maneran i konstraksion kulan taiguihi i templon Solomon; ya i che’cho’ mampos finu.

17 Pues matto i tiempo na guahu, si Nephi hu fa’na’gue i taotao-hu para u fambumuchachu, ya u fanma cho’cho’ nu i kannai-ñiha.

18 Pues matto i tiempo na manmalago’ para guahu i rai-ñiha. Lao guahu, si Nephi, hu diseha na u fannai rai; sinembatgo, hu cho’gue para siha konsiste gi ayu i gaige gi nina’siña-hu.

19 Lao atan, i fino’ i Saina ma kumple gi mañe’lu-hu, ni’ ha sangan put siha, na para guahu gubietnon-ñiha yan ma’estron-ñiha. Entonses, guahu gubietnon-ñiha yan ma’estron-ñiha konsiste gi otden i Saina, estaki ma espiha para bai hu ma puno’.

20 Entonses, ma kumple i fino’ i Saina ni’ ha sangan giya guahu, ilek-ña: Yanggen ti ma ekungok i fino’-mu siempre manma kondena ginen i Saina, ya atan, manma kondena.