1. Ix jaʼlo, kine, Nefi, chin yolile cyiʼjke tkanil aj yoln nmane tiʼj José, aj xi kʼiʼn tuj Egipto.

2. Tuʼnj lutzan luʼ, ax toc yoln cyiʼjke cyakil tcʼwaʼl; ix nicʼxke tkanil nim tocnen twitz aj cuʼ ttzʼiban. Ix o tma kiʼj ixkej cʼoloj kankʼibl chuʼltl; ix tzʼibnmaj cywitzke sleʼw cʼuxl te Bronce.

3. Ix tejtzun tbaj yoln nmane cyiʼj tkanil tiʼj José, itxquetke tcyʼajl ix tmeʼjl Lamán tuʼn, ix xi tmaʼn: Lutzan luʼ, akiye ncyʼajl ixke nmeʼjl, akiye aj tcyʼajl ix tmeʼjl tnejal nxjalile, waja tuʼn txi cybiʼna nyola.

4. Tuʼnj oʼ tma Kajaw Dios cyjaʼw: kama txi cycʼuʼnake nmandamyenta, chi xeʼle jawa tuj tnam; per ka min ma txi cycʼuʼna nmandamyenta, cheʼlx nxona ntxlaje.

5. Lutzan luʼ ncyʼajile ix nmeʼjl, milay tuʼn ncuʼxa tjaʼ txʼotxʼ aj naʼntok tcyaj nkʼoʼna jun cʼiwlabl cyibja; tuʼnj lutzan luʼ, baʼn wuʼne que ka banin keʼya tiʼj be alcye tuʼn txi cyiʼna, miʼn cyaj cycoʼlina.

6. Pero katzun ploj ma choʼca, lutzan luʼ cjel nkʼoʼna ncʼiwlabl tuʼn tel ploj cyiʼja, ix tuʼn tcuʼ tzak tibaj cywiʼke cymana.

7. Cyjaʼtzun, miʼn chi cyima tuʼn Kajaw tuʼnju ncʼiwlabla; sino que tzul tbecyʼbibil cyiʼja ix cyiʼjke cycʼwaʼla te jumajax.

8. Ix bajtzun que tej tbaj yolan nmane cyucʼke tcʼwaʼl Lamán, ijuʼl tiʼnke tcʼwaʼl Lemuel tucʼl.

9. Ix xiʼ tmaʼn cyjaluʼ: Lutzan luʼ, akeʼya ncʼwaʼl, akiye tcyʼajil ix tmeʼjl tcabn ncʼwaʼla, ax cjel nkʼoʼna ax cʼiwlaʼbl ictzaʼn cyaj nkʼoʼna cye tcʼwaʼl Lamán, cyjaʼtzun milay chi naja te jumajx, sino que ax cxeʼl cʼiwlaʼnke cyxeʼchila.

10. Ix bajtzun tej tbaj yolan nmaʼne cyucʼl, lutzan luʼ, xiʼ yoln cyucʼ tcʼwaʼl Ismael, ictzun, te cyakilke tuj tja.

11. Ix tajtzun tbaʼj yoln cyucʼl, yoln te Sam, ix xiʼ tmaʼn: Cyeʼyexa ixke tcʼwaʼla, porque cxeʼl tetzane aj tnam icxtzan termanniye Nefi; ixke tcʼwaʼla chi bel ajlat cyucʼxke tcʼwal Nefi; icx coquela tzaʼn te, ix ajke tcʼwaʼla icy tzaʼnx te tcʼwal Nefi, ix cxeʼl cʼiwlaʼna cyakil tuj tkʼijlala.

12. Ix bajtzun que tej tbaj yoln icju te cyakilke iteʼ tuj tja, según ntnanta tanmi ix t-xew Kajaw at tiʼj, ix tijn nmane. Ix baj que cyim ix cuʼx makut.

13. Ix bajtzun que nicʼx kʼij tcyimlen, Lamán, Lemuel ixke tcʼwaʼl Ismael ijaw kʼojl wucʼla tuʼn tlaj aj ntmaʼn Kajaw.

14. Porque wekin, Nefi, ilx tiʼj tuʼn nyolana cye icjo según tzaʼn tyol; porque otok txi nmaʼna nimca yol cye; icx te nmaʼne aj naʼntok tcyim; ix nimca ke yol luʼ tzʼibn cywitz caʼbtl nsleʼw, porque cywitzju o cu tzʼibt aj jun storya te nim storya.

15. Ix cywitz jluʼ cbel ntzʼiban ajke cosas te wanmiye, ixke nimca ke tzʼiban cywitz sleʼw cʼuxl te bronce. Porque pur txubtxaj ntnaʼn wanmiye cyiʼjke tuʼjil ix nbaj nximna tuj wanmiye, ix ncuʼ ntzʼibna te jun tkanil ix tuʼn tocnen cye ncʼwaʼla.

16. Lutzan luʼ, txubtxaj nnoʼc wanmiye cyiʼjke cosas te Kajaw, ix atzun wanmiye nim nximn tiʼj aj owila ix onbiya.

17. Simbargo, banwtla weye t-xtalbl Kajaw tuʼn ttzaj tyecʼn aj maʼxix ix luʼxix takʼun, ntmaʼn wanmiye: ¡Aya bisbl xinak kina! Ictzun, bis nnoʼc wanmiye tuʼn tlaj nchibjala. Njaw bisn wanmiye tuʼn tlajke ploj nbant wuʼna.

18. Nojna wiʼja ntiʼ tuʼn wex tzokpaje tuʼn tlajke ploj ixke il aj juratxix nchin baj tmukʼan.

19. Ix ka wajbla tuʼn njaw tzalaja, nxjikʼan wanmiye tuʼn cylaj twitz wila, simbargo baʼn wuʼna alʼij nnoc ncʼuʼja.

20. Aju nDiosa n-onn wiʼja, otzʼonna wiʼja cyiʼjke nbisa tuj desyert; ix ochin cleta tuʼn tibaj mar.

21. Ochin noja tuʼn t-xtalbl tcʼujlabil asta ocxa tbaj nchibjala.

22. Ochi baj ttzacsanke wenemiwiye asta ioc cyluʼlin nwitza.

23. Lutzan luʼ, otbi nwiʼya tex kʼij, ix otzaj tkʼoʼn nximbatza tuj tilbilal konicʼan.

24. Nimxix nchin nana Dios twitz kʼijl; ictzun cyiwx ojaw nwiʼya tuj cyaʼj; ix icuʼtzke tsanjel Dios ix inoʼcx biʼna cyuʼn.

25. Ix otxi samaʼn nximlala txaʼn tkʼab t-xew ocxa tpon twiʼ montanya max maʼtweʼ; ix otil nwitzake maʼxix cosas, ictzun, maʼxixke te cye xinak; cyjaʼtzun tzaj kʼamaʼn weya tuʼn min tcuʼ ntzʼibana.

26. Entons, ka oʼwilake maʼxix cosas, ka tuj t-xtabl Kajaw cyibaj cycʼwaʼlke xinak otxi aj bitzal cye tucʼ nimxix tajbl, ¿Titzun kuʼn nnoc nacpaj ix ncuʼ wanmiye tuʼj taʼw, ix ncuʼ naj nchibjala ix ncyim wipana tuʼn tlajke nbisa?

27. Ix ¿Tikuʼn tuʼn txi nkʼoʼna te wila nok tuʼn tlaj nchibjala? Ictzun ¿Tikuʼn tuʼn txi nkʼoʼn wiba cyujke ploj, aj nxi nkʼoʼna gan te ploj xjal tuʼn toctz tuj wanmiye tuʼn tbaj naj aj ntzalajible ix njyon tiʼj tuʼn tbisn wanmiye? ¿Tikuʼn nchin jaw kʼojl tuʼn tlaj wenemiweye?

28. ¡Tzulx tnabletz, aya wanmiye! Miʼn baj tcyimiye tisana tuj il. ¡Tzʼocxa txubtxaj, aye wanmiye! Miʼ txi tkʼoʼn tiba te tenemiw wanmiye.

29. Miʼ jaw kʼojl mása tuʼn tlajke wenemiwiye, mix tuʼn tel tiʼna wipane tuʼn tlajke nbisa.

30. ¡Tzʼocxa txubtxaj aye wanmiye! Kʼonxa te Kajaw ix kʼmanxa: ¡Aya Kajaw, c-ocx nxoʼna te jumajx! Ictzun, pur txubtxaj c-ocl wanmiye tiʼja, ¡aya nDiosa ix aya aj jun picy te coʼpl weya!

31. ¿C-colpajel wanmiye tuʼna Kajaw? ¿Chineʼl tcoʼpna tuj cykʼabke wenemiwiya? ¿Oc chin luʼlila tuʼna twitz il?

32. ¡Nokat lamʼon chi telke tlamel impyerna nwitza, pues piẍn ten wanmiye ix baʼnxix nxewa! Miʼn chitzaj tlamoʼna. Kajaw, aj tlamel xtis tuʼn nbeta tuj be tuj tumlxix, ix jaca chinoca te jun baʼn te chkʼajlaj tujbe.

33. ¡Aya Kajaw, chin tmukʼanxe tuj xbalen te t-xtisa! Binchama Kajaw jun be tuʼn wex tzokpaje cyiʼjke wenmiwaye! Kʼonxa tuj jikn aj nbeya. Miʼn cuʼ tkʼoʼna jun ploj tuj nbeya tuʼn njaw tolje, sino kʼiʼn ela ke tnachil tuj nbeya; ix miʼn cub tmakoʼne tuj nbeya, sino oʼcx cyeke wenemiwaye.

34. ¡Aya Tat, tiʼja kʼukl ncʼuʼja, ix tiʼja cykebl ncʼuʼja te jumajx! miʼn tzʼoc keʼ ncʼuʼja tiʼj tkʼab chibaj; porque baʼn wuʼne que becyʼbil twitz jun xjal aj nnoc keʼ tcʼuʼj tiʼj tkʼab chibjal. Ictzun, becyʼbil xjal nnoʼc keʼ tcʼuʼj tiʼj jun xinak, bixmo oʼcx nkeʼ tcʼuʼj tiʼj chibjte t-kʼiʼl.

35. Ictzun, baʼn wuʼne que tzul tkʼoʼnxix Dios libr te aj nkanin tiʼj. Ictzun tzul tkʼoʼn we nDios, ka min ma txi nkaʼnn tuj nyaʼ tocnen. Cyjaʼtzun, cjawl nmana teya ictzun; cjawil nwiʼye cyiw tiʼja nDiosa, nxake te nxtisbl. Lutzan luʼ cjawil nwiʼye tiʼje min cbajel, aya ncimient, xak ix aya nDiosa te Jumajx. Icxtenju.