Aj Tcaban Uʼj Te Nefi

1. Ix bajtzan que kine, Nefi, otok chin baj xnakʼtzana cye ke wermaniya, kmana Lehi, xiʼ tmaʼn nimca tyol: aj nim otok bant tuʼn Kajaw te cye, taj cyetz kʼiʼn tuj tnam Jerusalén.

2. Ix xi tmaʼn tiʼj cyjaw kʼojl tiʼbaj mar, ix tuʼn t-xtalbʼil Dios icolpaj tuʼn miʼn cycyaj tuj mar.

3. Ix yolan tiʼj txʼotxʼ tziʼyanmaj, aj otok chi caʼmban tiʼj; pur maʼxix jun t-xtalbl Dios tzajlen tmaʼn kconseja tuʼn ketza tuj tnam Jerusalén.

4. Porque lutzan luʼ owila jun tilbilal, xi tmaʼn Lehi, que-aj baʼn wuʼna ocu tilpaj Jerusalén; cyjaʼtzan nokatt oten tuj, ax oʼwtla ko cyim tuj.

5. Per tuʼntzan aj kbis, oko camban tiʼj jun txʼotxʼ tziʼyanmaj, jyoʼnmaj cywitz cyakil, ax cyjatzan aj obant tiʼj tuʼn Kajaw wucʼla, atzan jun tnam cxel kʼon te cyherens cye ncʼwale cyaj tkʼoʼn. Ictzan, tuʼnju tbantlen tiʼj tuʼn Kajaw otzaj tkʼon aj txʼotxʼ tziʼyanmaj luʼ weya ix cye ke ncʼwaʼla te jumajx, icx te cyeke aj chuʼl tun tkʼab Kajaw tuj juntl nasyon.

6. Ix akine, Lehi, nxiʼ nmaʼna según nnakʼnan Xewbaj wiʼja, mi junx tzul twitz txʼotxʼ ka miyaʼ kʼiʼn tuʼn tkʼab Kajaw.

7. Cyjaʼtzan, aj txʼotxʼ luʼ tziʼynmaj tuʼn Dios, te cyeke tuʼn chul twitz txʼotxʼ luʼ tuʼn. Ix ka ma chi akʼnan según tzaʼn ntmaʼn tmandamyent tzaj tkʼon atzan jun txʼotxʼ libr ctel te cye; ix mi jun tuʼn cyxi kʼiʼn pres; ix katzan ma chez kʼiʼn, pur tuʼn tlaj ploj xjal ke; porque ka ma chʼiyxix cyil, plojke, becyʼbil twitz tnam nok tuʼn cylaj per atzan cyeke xjal baʼn oc ctel jun txʼotxʼ cʼiwlaʼnmaj.

8. Lutzan luʼ, ax jaʼlo aj txʼotx, luʼ ntiʼ tuʼn tcanan tuj cywiʼke txkantl nasyon; pwes lutzan luʼ nimke nasyon cbel baj twitz txʼotxʼ cyuʼn, cyjaʼtzan balo ntiʼx jun piẍ lugar te oybil herens te juʼn cʼwal.

9. Cyjaʼtzan we kin, Lehi, otzicʼ wiʼna aj tziybil, ka ma chuʼl tiʼn Kajaw ke xjal teʼ tuj tnam te Jerusalén ix cocx cyxoʼnke tmandmyent, nim cychoʼcl te kʼinan xjal twitz txʼotxʼ tzaluʼ; ix miʼn cybi txkantl nasyon cyiʼj, tuʼntzan tel cyetzan txʼotxʼ te cyecx. Ix ka ma txi cycʼuʼnke tmandamyent, chi xeʼl cʼiwlaʼn tibaj cyakil twitz txʼotxʼ; ix mixaʼl jun jaca tzʼoc ten ẍticʼl cyiʼj bixmo tuʼn tel kʼiʼn cytxʼotxʼ; ix chi ankʼil segur ke te jumajx.

10. Per lutzan luʼ, oc tcanan kʼij oc cycuʼ tzʼak tuj ntiʼ cyocslabil, ix otakka tzicyʼ cyiʼn nimca cyʼiwlabl te Kajaw, ix loʼn cyuʼn tiʼj tbantlen txʼotxʼ ix cyakil xjal, ix loʼn cyuʼn ajke matij bix cyeʼyex tbinchben Kajaw atxax aj tbant twitz txʼotxʼ, kʼiʼn tipumal Dios tuʼn cybantke cyakil cosas tuʼn cyocslabl, ix kʼiʼnke cyakil tmandamyent Kajaw cyuʼn atxax tzajlen keʼ, ix otok cheʼx kʼiʼn tuʼn Kajaw tuj ju cyexax txʼotxʼ tziʼyanmaj luʼ, lutzan luʼ, cxeʼl nmaʼne ka ma pon kʼij tuʼn tel cyicʼn tSant Israel, aj axix toc Mesías, aj Colpil cye ix Dios, lutzan luʼ, ajke t-xtis baʼn xjal cxeʼl cyibaj.

11. Ictzan, c-ulil tiʼn cyibaj cablke nasyon, aj al-ej c-xeʼl cykʼoʼn cyipumal; ix quelil kʼiʼn cytxʼotxʼ cyuʼn, ix chi cabanel ix chi cbajel sputan.

12. Ictzanju tuj cyankʼibl tuj juʼn cʼoloj ankʼbil, cbetl chicʼ, ix nimca tnachil cbajel; cyjaʼtzan jluʼ akiye ncʼwaʼl, waja tuʼn tul tuj cycʼuʼja, ictzan tuʼn txi cybiʼna ke nyola.

13. ¡Tzulx cynable; tzulx cynable tuj jun cywatle, ictzan, tuj witzicʼ te tuj kʼakʼ, ix cxel cychtoʼna aj caden plojxix cʼaloʼnkiye tuʼn, que atzan tzyul te cycʼwaʼlke xinak tuʼntzenju chi xeʼl kʼiʼn pres tuj aj jul cʼixcʼej bix te jumajx!

14. ¡Tzulx cynable, chi weʼctza tuj kuk! ¡Chibina tyol jun mambaj xoʼbl, aju t-ximlal chʼix tuʼn txiʼ cykʼoʼna tuj cheʼw ix tuj ju pantyon, jatuma mijun betn xjal jaca meltzʼaj; tuj cabl kʼij, ix cxeʼl wiʼna be te cyakil twitz txʼotxʼ!

15. Per lutzan luʼ, o colpaj wanmiye tuj kʼakʼ tuʼn Kajaw; owila ttzalajibl, ix tine cyuj tkʼab tuj ttxubtxajal te junmajx.

16. Ix aj wajbl aj tuʼn tul ti cycʼuja tij tmandamyent ixke tjuicio Kajaw; lutzan luʼ, atzan jun tajbl wanmiya atxax aj ttzajlen keʼ.

17. Pur bis ntnaʼn wanmiya tuʼn cʼixbleʼn junjun maj, pues otzaj txoblal wiʼja que tuʼnju cyiw cyanmiye, aju kDios tzul bitzal cyeya tuʼn tcyakil tkʼoj ix tuʼn cybaj txʼemina ix tuʼn cybaj kʼuchana te jumajx.

18. Bixmo tuʼn tcuʼ tzʼak cyibja jun ploj bixmo nach cyibaj juʼn cʼoloj ankʼbil; ix tuʼn cycub kʼoʼna tuj castiw tuʼn spad ix tuʼn weʼyaj, ix tuʼn cyel icʼna, ix tuʼn cyxi kʼiʼna según tzaʼn tajbil ix tpresbil diabl.

19. ¡Akeʼya ncʼwaʼl, miwt bʼant j-ajo, sino que akiye jun tnam baʼnix jyoʼnmaj ix xtaʼln tuʼn Kajaw! Ix lutzan luʼ, i cybantkej tajbil Kajaw, porque ax toc tbanalke tbe tuj xtis te junmajx.

20. Ix oʼtmakʼa: Ka ma txiʼ cycʼuʼna ke nmandamyenta, chi jawal jawna tuj tnam; per katzan miʼn txiʼ cycʼuʼna chelil lakeʼye ntxlaje.

21. Ix jaʼlo tuʼn pur txubtxaj ten wanmiye cyiʼja ix tuʼn tex txubtxaj wanmiye twitz txʼotxʼ luʼ tuʼn cylaja, ix nya tuʼn nxi kʼiʼna tuj cʼixcʼaj bix taʼw tuj jul, chi weʼctza tuj kuk, akiye ncʼwaʼl, ix choʼcxa xinak, ix chi tena conform tiʼj junx cyxilena ix tuʼn junx cyanmiye, junx cytena tiʼj cyakil cosas, tuʼn min cycuʼxe tuj pres.

22. Tuʼn min txi kʼoʼn jun ploj cyiʼja tuʼn ju cyʼiwbil ploj; miʼn cyakʼa jun tkʼojl jun Dios baʼn cyibaja te cycastiwiye, ictzan, jun castiw te junmajx te ximlal ix te anma.

23. Tzulx cynabla, akiye ncʼwaʼl; cykʼoʼnca cyxbalane baʼn te xtis, Cychton baja tiʼj aj ke caden aj toc cyiʼja; cyetza tuj klolj, ix chi weʼctza tuj kuk.

24. Miʼn choc lipana tiʼj cyermaniye aj maʼxix txilen pur wenn, ix atzan te xi tcʼuʼn cyakil tmandemyent atxax kellen tuj Jerusalén ix atzan jun oʼnbl tuj tkʼab Dios tuʼn ktzaj kʼiʼn tzaluʼ twitz txʼotxʼ tziʼyanmaj; porque nokt nyaʼ tuʼn, oʼwtla konaj tuʼn weʼyaj tuj desyert; cyjaʼtzan cyajbeya tuʼn tel twiʼ; ictzan, ix ma tapamca nim taʼw tuʼn cylaja.

25. Ix at tchi wiʼje ix nchin luʼlna nok tuʼn cylaja jaca bant tyoʼt mas cyuʼna; porque lutzan luʼ, ma cuʼ cykʼoʼna tpaj que ten tipumal ix twiʼxlal cyibaja; simbargo baʼn wuʼne miʼn ntjyon tipamal mu twiʼxlal cyibaja sino oʼcx o txi t-ximn tiʼj tnabl Dios ix tiʼj ankʼibla te jumajx.

26. Ix ochi jaw lipna tucʼ yol tuʼnj clarxix otma cyeya. Chi chitzan cyeye que cyiw tten cyija bix ojaw kʼoj cyiʼja simbargo aj cyiw tten atzanjo aj tipumal tyolbil Dios at tucʼal bix aj nnoc kʼoj cyuʼna, ax toc, atzan jaxix txilen at tiʼj Dios aj ntiʼx weʼ tyol, ix yolnxix tiʼj cyplojale.

27. Ix ax toc il tiʼj tuʼn tten tipumal Dios tucʼl, asta tuʼn cyxiʼ samaʼna tuʼn, tuʼn tocx cyxona. Porque lutzan luʼ, nyaʼ te, sino aj Xewbaj te Kajaw aj at tucʼal, aj jaw tcʼabn tuj ttziʼ tuʼn tyoln, ix cyjaʼtzan ntiʼx weʼ tuʼn tyolan.

28. Ix jaʼlo, ncʼwaʼl, Lamán, ix akeye Lemuel ix Sam, tucʼx keye, ncʼwaʼl que akiye tcʼwaʼl Ismael, lutzan lu, ka ma txi cybiʼna tyol Nefi, miʼn chi cyima. Ix ka ma txi cybiʼna, cjel nkʼoʼn ncʼiwlaʼble cyeye, ictzenjo aj tnejal ncʼiwlaʼble.

29. Ix katzan cycʼiʼya txi cybiʼne, celx wiʼna tnejal ncʼiwlable, ictzanju, aj ncʼiwlable, ix cjel ten tibaj.

30. Ix jaʼlo nchin yolna tucʼle, Zoram: Lutzan luʼ, aye tmajan Labán. Simbargo, etz kʼiʼna tuj tnam te Jerusalén ix baʼn wuʼna que aye jun amiw baʼn te ncʼwaʼl Nefi te jumajx.

31. Cyjatzanjluʼ, tuʼnj pur baʼn xjala, ajke tcʼwaʼla chul yajxa chi xel cʼiwlaʼn tucʼal cycʼwal Nefi, ix chi tel wenn nim tiemp twitz txʼotxʼ luʼ, ix ntiʼ, oʼcxtzala ka cyex cye cyplojal cocal nach tiʼj cycʼwaʼl te junmajx tuj tnam luʼ.

32. Cyjaʼtzan jluʼ, ka ma txi tcʼuʼna ajke tmandamyent Kajaw, oc ctzajal tcyʼiwlaʼnj txʼotxʼ luʼ te baʼn te cye tcʼwaʼla tucʼax te ncʼwaʼle.