Capítulo 5
Kʼamaʼn maj te Nefi tuʼn Dios, nneʼl tiʼn tib cyiʼjke aj cyajbl tuʼn tcuʼ byoʼn. Zoram, Sam, Jacob, José ix cabtl teʼ tucʼl. Aj tspad Labán. Nbant jun tja Dios. Nnoc kʼoʼn Nefi te rey bixmo colil. Nchi tzaj tzacsanke ploj kʼek oc cywitz. Nchi cyʼiwletke sacerdotes ixke maestros.
1. Lutzan luʼ baj que we kin, Nefi, xiʼ nkaʼnna nimxix te Kajaw nDiosa, tuʼn tlaj cykʼojke wermaniye.
2. Per lutzan luʼ, jaw chʼiy cykʼoj wiʼja, hasta cyajbe tuʼn ncuʼ biyoʼna cyuʼn.
3. Ictzun, ijaw lipn tucʼ yol wiʼja cyjaʼw: Taj kermaniye chʼin tuʼn tmandaʼrn kiʼje, ix nok tuʼn tlaj ma ko yajta tuʼn bis. Kbyoncub, tuʼn min kbisn más tuʼn tyol. Tuʼnj lutzan luʼ, kcʼiʼya tuʼn toc te kwiʼxlala; porque koya ajke terman matij, a koʼya tuʼn kmandarna tiʼ jtnam luʼ.
4. Ix ncʼiʼya tuʼn tcuʼ ntzʼibana cywitzke sleʼw cʼuxl luʼ cyakil cyyol wiʼja. Tucʼ oc txi nmaʼna, que cyajbe tuʼn ncuʼ cybyoʼn.
5. Ix baj que tzaj tmaʼn Kajaw weya, Nefi, tuʼn wetza cyxol ix tuʼn nxi oka tuj desyert cyucʼke cyajbl tuʼn cyxi wucʼala.
6. Bajtzan, que kine Nefi, xi wiʼnake nfamilye, Zoram tucʼx tfamilye, tucʼx Sam aj wermaniye matij ix tucʼx tfamilye, Jacob ix José, ke wermaniye chʼin, ax icxkeʼ waʼnaba ix cyakil ke aj cyajbe tuʼn cyxiʼ wucʼale. Ix cyakilkej i eʼx wucʼale ocslaʼn cyuʼn aj otok tzaj tmaʼn ix tzaj tyecʼn Dios weya; ix cyjaʼtzun xi cybiʼn nyola.
7. Ix xi kiʼna kjaya mant ix cyakil aj baʼn tiʼnjtz, ix obeta nim kʼij tuj desyert. Ix tej kbeta nim kʼij, cuʼ kkʼoʼn kjaya.
8. Ix ajke nxjalile cyajbe tuʼn toc kʼot tbi lugar te Nefi, ix ictzun oc kuʼne.
9. Ix cyakilkej iteʼ wucʼale baj cyxiʼmn tuʼn toc tbiʼ aj tnamte Nefi.
10. Ix nimcx oluchaʼrna tuʼn kela cywitzke jwisyo, ke ley ixke tmandamyent Kajaw tiʼj cyakil cosas, según aj tley Moisés.
11. Ix xi-aj Kajaw kucʼala, ix nimx ojaw ankʼina, tuʼnju cycuʼxlen kawaʼna iyaj ix nimxix twitz kawala chmet. Ix keʼ tuʼn cyten kẍneʼla, kwacẍa ix cyakil wik jil.
12. Ix kine Nefi, ax otok chi tzaj wiʼna wucʼale ajke storya cycub cywitz sleʼw cʼuxl brons; ax icx aj xwac tten bixmo yecʼl kbeya aj otok bant tuʼn tkʼab Kajaw te nmane, según aj tzʼibnmaj.
13. Ix baj que nimxix chʼiy kankʼibla, ix nimxix chmet kbaja tuj tnam.
14. Ix we kin Nefi, atzun jun molt tspad Labán, ibant nimca spad wuʼne, tuʼntzun miʼn kcuba cyuʼn xjal te tuj tnam Lamanitas; porque biʼn wuʼne aj cykʼoj toc wiʼja ix cyiʼjke ncʼwaʼla, ix cyiʼjke nxjalile.
15. Ix cub nxnakʼtzaʼna ke nxjal cye tuʼn tbant ja cyuʼn ix tuʼn tbant cyakʼnan tiʼj cyakil wik tzeʼ; ix tuʼn tbant cyakʼnan tiʼj cʼuxl, cobr, brons, acero, oro, plata ixke luʼxix cʼuxl teʼ.
16. Ix wekin Nefi, bant jun tja Dios wuʼne, ax tzaʼn tten te Salomón, banwtla ntiʼ bant cyuʼnke luʼxix macbl, tuʼnj ntiʼju tuj tnam; cyjaʼtzun, ntiʼ bant ictzan tja Salomón. Pero mer ax tqueʼyanc ictzaʼn tja Salomón; ix luʼxix jun binchabnte.
17. Ix bajtzun que we kin, Nefi, o bant wuʼna tuʼn cyocke nxjalile te binchal ix te akʼnal tuʼn cykʼab.
18. Ix bajtzun que, inoʼc cykʼon te cyrey. Pero we kin Nefi, ntiʼ wajbeya tuʼn tten cyrey; cyjaʼtzun nim bant wuʼne cyiʼj.
19. Ix lutzan luʼ, axix toc bant aj tyol Kajaw cyiʼj wermaniye, aj tuʼn woca te cywiʼxanil ix tuʼn woca te xnakʼtzal cye; ix inoʼctzane te cywixlal ix xnakʼtzal, según aj tzaj tmaʼn Kajaw, hasta cyuj kʼij aj jatum cyajbe tuʼn ncuʼ cybyoʼn.
20. Cyjatzun, el twitz aj yol tzaj tmaʼn Kajaw, weye: ka min ma tzʼocx cybiʼn tyola, cheʼlx lajet ttxlaj Kajaw. Ix lutzan luʼ, ijeʼx xoʼn ttxlaj.