1 Ao ngkai tariu aika kam tangiraki, I a tia ni wareki bwaai aikai bwa kam aonga n atai bwaai aika kaineti ma ana berita aika tabu te Uea are e a tia ni karaoia ma te bata are Iteraera—

2 Bwa e a tia n taetae nakoia Iutaia, ni wiia ana burabeti aika a tabu, ma n moan rikin bwaai, man te roro teuana nakon te roro teuana, ni karokoa te tai are a na manga kaokaki iai nakon te ekaretia ae koaua ma ana nanai te Atua; ike a na manga botaki ni mwengaia iaon aban rikiia, ao a na manga tei iaon abaia ni berita ni kabane.

3 Taraia tariu aika kam tangiraki, I a taekin bwaai aikai nakoimi bwa kam aonga ni kimwareirei, ao n euti atuumi n aki toki, ibukin taian kakabwaia aika e na anga te Uea ae te Atua nakoia natimi.

4 Bwa I ataia ae kam a tia ni karaoa te ukeuke ae korakora, angiia mwaitimi, ni kan atai kanoan bwaai aika a na roko; mangaia ae I ataia bwa kam ataia ae e na roko te kara nakon rabwatara, ao ni mate; e ngae n anne ao ti na kona n noora te Atua n rabwatara aikai.

5 Eng, I ataia ae kam ataia bwa e na kaoti n te rabwata nakoia ake a mena i Ierutarem, are ti mwananga mai iai; bwa e riai bwa e na kaoti i buakoia; bwa e riai bwa e na rinanon te maiu n rabwata te Tia Karikibwai n ai aroia aomata, ao ni mate ibukiia aomata ni kabane, bwa aonga ni bane n toro irouna aomata ni kabane.

6 Bwa ngkai e reke te mate nakoia aomata ni kabane, ao bwa e aonga ni kakoroaki bukin ana babaire n nanoanga te Tia Karikibwai ae kakannato, e riai n iai te mwaaka ni mangauti, ao e riai bwa e na reke te mangauti nakoia aomata ni kaitaraa te bwaka; ao e a roko te bwaka ibukin riaoan te tua; ao ngkai e rinanon te bwaka te aomata ao a na teweaki nako mai matan te Uea.

7 Mangaia ae e riai n akea tokin te mwakuri ni kamaiu—ma ngkana iai tokin te mwakuri ni kamaiu ao te rabwata ae mka aio e aki kona ni katoka te aki mka. Mangaia ae te moan motiki taeka are e bwakara te aomata e riai bwa e na tiku n aki totoki. Ao ngkana ngaia anne e na wene te rabwata aio ni mka ao n tamruru n okira te aonaba are e karikaki mai iai, ao n aki mangauti.

8 Ai korakorara wanawanan te Atua, ana nanoanga ma ana akoi! Bwa taraia, ngke arona bwa a na aki mangauti rabwatara ao a na riki tamneira bwa ana toro te anera are bwaka mai matan te Atua ae Akea Tokina, ao n riki bwa te riaboro, n aki mangauti.

9 Ao a na riki tamneira n ai arona, ao ti na riki bwa taian riaboro, ana anera te riaboro, aika a na kararoaaki mai matan te Atua, ao ni maeka ma taman taian kewe, i nanon te korakai, n aiarona; eng, n aiaron te aomata are e kamwaneia ara moan karo, are e onika rabwatana nakon aneran te oota, ao ni kamangaoi nanoia natiia aomata bwa a na riki bwa koraki n tiritiri ao ni karaoi botaki ni karaba aika buakaka aika mwakurin te roo.

10 Ai korakora ra ana raoiroi Atuara, are e a tia ni katauraoa te kawai ibukira are ti kona iai ni birinako mai nanon bain te man ae kakamaku aio; eng, te man ae kakamaku anne, te mate ma moone, are I aranna bwa maten te rabwata, ao maten naba te tamnei.

11 Ao man te kawai ni kamaiu are e katauraoia Atuara, ae Atuan Iteraera ae Tabu, te mate aio, are I a tia n taekinna, ae te mate n rabwata, e na kainaomataia ana mate; are te mate ae te rua ni mate.

12 Ao te mate are I a tia n taekinna, ae te mate n tamnei, e na kainaomataia ana mate; are te mate n tamnei bon moone; ngaia ae te mate ao moone a na kainaomataia aia mate, ao moone e na kainaomataia tamnei ake e tautoronia, ao te rua ni mate e na kainaomataia rabwata ake e tautoronia, ao a na manga ikotaki rabwataia ma tamneia aomata n riki bwa ti teuana; ao e na riki aio rinanon mwaakan te mangauti are mwaakan Atuan Iteraera ae Tabu.

13 O ai korakora ra ana babaire Atuara! Bwa irarikin aei ao ana bwaretaiti te Atua e na kainaomataia tamneia aika a raoiroi, ao te rua ni mate e na kainaomataia rabwataia aika a raoiroi; ao a na manga ikotaki te tamnei ma te rabwata n ti teuana, aomata ni kabane a na riki n aki mka, ao a na aki maamate, ao n riki bwa tamnei aika a maiu, n reke irouia te wanawana ae n ai arora aika iai rabwatara, ma e na kakororaoaki raoi wanawanara.

14 Ngaia ae ti na karekea te atatai ae kororaoi n ara bure, ni kabane, ma ara aki itiaki ma ara bebeekan; ao aika a raoiroi a na karekea te atatai ae kororaoi n aia kimwareirei, ao raoiroia ni kunnikaiaki n te itiaki, eng, n te ninira ae e raoiroi.

15 Ao e na koro bukina bwa ngke a tia aomata ni kabane n rinanon te moani mate nakon te maiu, n te maiu n aki maamate, ao a na tei i matan ana kai n toka ni motikitaeka Atuan Iteraera ae Tabu; ao e na karaoaki te motikitaeka, ao a na motikaki taekaia n aron ana motikitaeka ae tabu te Atua.

16 Ao e koaua n aron ae maiu te Uea, n aron are e a tia n taekinna te Uea ae te Atua, ao bon ana taeka ae akea tokina, ae aki kona ni bua, bwa a teimatoa n raoiroi ake a tia n raoiroi, ao aika a kammaira a na teimatoa ni kammaira; ngaia ae aomata aika a kammaira bon te riaboro ma ana anera; ao a na nako nakon te ai ae aki totoki; are e a tia ni katauraoaki ibukiia; ao karawawataaia aiaron te nei n ai, ao te burimton are e waerake urana n aki totoki ao akea tokina.

17 O ai korakorara ao ai motiraoira Atuara! Bwa e kakoroi bukin ana taeka, aika a tia n otinako mai wiina, ao a na kakoroaki bukin ana tua.

18 Ma taraia, ngkami aika a raoiroi, ana aomata aika itiaki Atuan Iteraera ae Tabu, aika a kakoaua Atuan Iteraera ae Tabu, aika a tia n teimatoa n rinanon te bwainikirinaki man te aonaba, ao n aki ongea te kamamaeaki iai, e na reke irouia uean te Atua, are e a tia ni katauraoaki ibukiia man moan karikan te aonaba, ao kimwareireia e na onrake n aki toki.

19 O ai korakora ra ana nanoanga Atuara, ae Atuan Iteraera ae Tabu! Bwa e kamaiuia ana aomata aika a itiaki mai iroun te man ae kakamaku ae te riaboro, ao te mate, ao moone, ao te nei n ai, ao te burimton ae te kammarakaki n aki totoki.

20 O ai korakora ra tabun Atuara! Bwa e atai bwaai ni kabane, ao bon akea te bwai ae e aki ataa taekana.

21 Ao e a roko nakon te aonaba bwa e na kamaiuia aomata ni kabane ake a ongo ni bwanaana; bwa taraia, e a tia ni kammarakaki ibukiia aomata ni kabane, eng, ni marakiia bwaai ni kabane aika a maiu, n ai aroia mwaane, aine, ma ataei, aika kaain ana utu Atam.

22 Ao e karaoa aio bwa e aonga ni kona n reke te mangauti nakoia aomata ni kabane, bwa aonga n tei aomata ni kabane i matana n te bong ni motikitaeka ae korakora.

23 Ao e tuatua nakoia aomata ni kabane bwa a na rairinanoia, ao a na bwabetitoaki n arana, ao ni karekea i nanoia te onimaki ae kororaoi iroun Atuan Iteraera ae Tabu, bwa ngkana a aki ao a na aki kona ni kamaiuaki nako nanon uean te Atua.

24 Ao ngkana a aki kan rairinanoia ma ni karekea kakoauan arana, ma ni bwabetitoaki n arana, ao n teimatoa ni karokoa te toki, ao a na kabuakakaaki; bwa e a tia n taekina aio te Uea ae te Atua, ae Atuan Iteraera ae Tabu.

25 Mangaia ae e a tia n anga te tua; ao ike akea te tua are e taekinaki ao a na akea naba te rekenikai; ao ngkana akea te rekenikai ao a na akea naba te kabuakakaaki; ao ngkana akea te kabuakakaaki ao e na mena ana nanoanga Atuan Iteraera ae Tabu i aoia, ibukin te mwakuri ni kamaiu; bwa a kainaomataaki man te mwaaka are mai irouna.

26 Bwa te mwakuri ni kamaiu e kanakoraoa nanon ana motiraoi iaoia ake a tuai n anganaki te tua, bwa a na kamaiuaki man te man ae kakamaku, te mate ao moone, ao te riaboro, ao te nei n ai ma te burimton, ao te kammarakaki n aki totoki; ao a na kaokaki nakon te Atua are e anganiia te ikeike, ae Atuan Iteraera ae Tabu.

27 Ma e na reke kain ane e a tia n anganaki te tua, eng, ane iai i nanona ana tua te Atua ni kabane, n ai arora, ao e aki ongeaba nako iai, ao e kabanebuaka bongin kataakina, bwa e na kananoanga arona!

28 O ana babaire ni kamwamwane teuare buakaka! O aia kamoamoa, ma mamaaraia ao burababaia aomata! Ngkana iai rabakauia ao a taku bwa a rangi ni wanawana, ao a aki kan ongo n ana taeka n reirei te Atua, ao a kaaki taekana, n taku bwa a ataa taekana i bon irouia, mangaia ae te baba wanawanaia ao akea te raka are a na karekea mai iai. Ao a na mate.

29 Ma e raoiroi te ataibwai ngkana a ongo n ana reirei te Atua.

30 Ma e na reke kaiia akana a kaubwai, aika a kaubwai ni kaubwain te aonaba. Bwa ngkai a kaubwai ao a ribaia aika a kainnano, ao a bwainikirinia aika a nimamannei, ao a memena nanoia iaon kaubwaia; mangaia ae kaubwaia bon atuaia. Ao taraia, e na mauna kaubwaia ma ngaia.

31 Ao e na reke kaiia akana a bonotaninga ma n aki kan ongo taeka; bwa a na mate.

32 E na reke kaiia akana a mataki aika a rawa n nooraba; bwa a na mate naba.

33 E na reke kaiia akana a aki korotobibiaki i nanoia, bwa ataakin aia bure e na tiringia n te kabanea ni bong.

34 E na reke kain te tia kewe, bwa e na teweaki nako moone.

35 E na reke kain te tia tiriaomata are e tiritiri n oin nanona, bwa e na mate.

36 A na reke kaiia kabekaau, bwa a na teweaki nako moone.

37 Eng, e na reke kaiia akana taromauri bouananti, bwa e kukurei irouia te riaboro are e mena i aoia riaboro ni kabane.

38 Ao, ni kakimototoa, e na reke te maraia nakoia ake a bane ni mate i nanon aia bure; bwa a na okira te Atua, ma n noora matana, ao a na tiku n aroia ni bure.

39 O tariu, aika kam tangiraki, uringa buakakan te bure nakon te Atua ae Tabu, ao buakakan naba te bwaka nakon ana kariri te tia kamwane. Uringnga, te nano ni bwain te aonaba bon te mate ao te nano ni bwain te tamnei, bon te maiu are akea tokina.

40 O tariu, aika kam tangiraki, ongo n au taeka. Uringa korakoran Atuan Iteraera ae Tabu. Kam na tai taku bwa I a tia n taekin bwaai aika a matoatoa nakoimi; bwa ngkana kam karaoia, ao kam na kabuakaka te koaua; bwa I a tia n taekin ana taeka are E karikingkami. I ataia bwa a matoatoa taekan te koaua nakoia aomata ni kabane aika a aki itiaki; ma aomata aika a raoiroi a aki maaku, bwa a tangira te koaua ao a aki kamwaieieaki mai iai.

41 O ngaia ae tariu aika kam tangiraki, nakomai nakon te Uea, te Atua ae Tabu. Uringnga bwa kawaina a raoiroi. Taraia, te kawai ibukiia aomata, e wariki, ma e wene raoi n eti i matana, ao te tia taraa te mataroa bon Atuan Iteraera ae Tabu; ao akea te toro ae kamwakuria ikekei; ao akea riki te kawai nako iai ma ti rinanon te mataroa; bwa e aki kona ni mwaamwanaaki, bwa te Uea ae te Atua arana.

42 Bwa ane karebwerebwe ao e na kaukia nakoina; iai aika a wanawana, ma aika a rabakau, ma aika a kaubwai, ma aika a kamoamoa ibukin rabakauia, ma wanawanaia, ma kaubwaia—eng, bon aomata aikai aika e ribaia; ao ngkana a aki kaaki bwaai aikai, man iangoia bwa aomata aika baba imatan te Atua, ao ni karinanoia, ao e na aki kaukia nakoia.

43 Ma a na karabaki aia bwai aika a wanawana ma aika a motiraoi mai irouia n aki toki—eng, ae te kukurei are e a tia ni katauraoaki ibukiia aomata aika itiaki.

44 O tariu, aika kam tangiraki, uring au taeka. Taraia, I buuti kunnikaiu, ao I ioioi i matami; I tataro nakon te Atua are te tia kamaiuai bwa e na taraai ni matana aika e kona n noori iai bwaai ni kabane; mangaia ae kam na ataia bwa n te kabanea ni bong, are a na bane ni motikaki iai taekaia aomata n aron aia mwakuri, ae e a tia ni kakoaua Atuan Iteraera ae I a tia n ioioi nako ami bure man tamneiu, ao I tei i nanon te oota i matana, ao ni mwaawa man raraami.

45 O, tariu aika kam tangiraki, kitan ami bure; ioi nako ana taurekereke te aomata are kan kabaeingkami ni kamatoatoa; nakomai nakon te Atua are ngaia te bwaa ibukin kamaiuakimi.

46 Katauraoi tamneimi nakon te bong are e mimitong are e karaoaki iai te motiraoi nakoia aika a raoiroi, are te bong ni motikitaeka, bwa kam na aki keanako ma te maaku ae korakora; bwa kam aonga n aki uring bwaninin raoi ami bure aika a kakamaku, ao n tauaki nanomi nakon te kan takaruaea: E tabu, e tabu aron am motikitaeka, O te Uea ae te Atua ae Moan te Mwaaka—bwa I ataa au bure; I a tia n riaon nakon am tua, ao riaon tua irou bon au bure; ao I a tia n reke iroun te riaboro, ao I a riki bwa konana ngai ni karawawatakina ae korakora.

47 Ma taraia, tariu, e riai bwa N na kautingkami nakon korakoran kakamakun koauan bwaai aikai? E riai bwa N na karawawatai tamneimi ngkana a itiaki ami kaantaninga? E riai bwa N na karawawata au taeka nakoimi n aron korakoran te koaua ngkana kam kainaomataki man te bure?

48 Taraia, ngke arona bwa kam tabu ao N na taekin bwaai aika a tabu nakoimi; ma ngkai kam aki tabu, ao kam onimakinai bwa te tia reirei ngai, ao e riai bwa N na reiakin nakoimi mwiin ami bure.

49 Taraia, e ribaki te bure iroun tamneiu, ao e kukurei nanou n te raoiroi; ao N na neboa aran te Atua ae tabu.

50 Nakomai, tariu, ni kabane ake a taka, nakomai nakon te ran; ao ane akea ana mwane, nakomai bobwai ao amwarake; eng, nakomai kabooa te wain ao te miriki n akea te mwane ao n akea boona.

51 Mangaia ae tai kabanebuaka te mwane ni bwaai aika akea bonganaia, ke korakoram ni bwaai aika aki kakukureiko. Kakaonimaki n ongeaba nakoiu, ao uring taian taeka aika I a tia n taekin; ao nakomai nakon Atuan Iteraera ae Tabu, ao kanuaiko ni bwaai aika aki kona ni bua, ke ni mka, ao kakukureia tamneim bwa e na marika.

52 Taraia tariu aika kam tangiraki, uring ana taeka Atuami; tataro nakoina n tai nako n te ngaina, ao anga ami kaaitau nakon arana ae tabu n te tairiki. Kakukurei nanomi.

53 Ao kam na nora korakoran ana berita aika a tabu te Uea, ma aron korakoran ruona nakon te aonaba nakoia natia aomata; ao man korakorana, ma ana akoi ma ana nanoanga, ao e a tia ni tuea nakoira bwa a na aki tiringaki ni kabane kanoara, n kaineti ma te rabwata, ma e na kamaiuia; ao n rooro aika a na roko ao a na riki bwa te mwanga ae raoiroi nakon te bata are Iteraera.

54 Ao ngkai, tariu, I kan taekin bwai riki tabeua nakoimi; ma n N na taekin nikiran au taeka nakoimi nakon te ingabong. Amen.