1 Jinataj Sumaj nisqa jallp’api, templonejpi ashkha Nefij llajtanmanta runas tantakorqanku. Paykunapura t’ukorqanku, parlanakorqankutaj rikuchispa imaynatachus chay jatun, t’ukunapaj waj jinayay karqa.

2 parlanakorqankutaj kay Jesucristomanta, mayqenmantachus señal qosqa karqa wañunanmanta.

3 Jinataj paykunapura parlanakuspa, uj janaj pachamanta jina jamoj parlayta uyarerqanku. Tukuynejta qhawarqanku mana chay parlayta jap’eqasqankurayku. Mana sajra parlaychu karqa, manataj jatun parlaychu karqa. Juch’uy parlay kajtimpis, chay parlayqa sonqosninku ukhuman yaykorqa, chayrayku cuerposninkuta, tukuysituta kharkaticherqa. Arí, kikin espiritusninkumana yaykorqa, sonqosninkuta k’ajacherqataj.

4 Jinataj watejmanta parlayta uyarerqanku, manataj jap’eqarqankuchu.

5 Kinsa kaj kutirayku uyarerqanku chay parlayta, ninrisninkutataj kicharerqanku chay parlayta uyarinankupaj, ñawisninkutaj nisqanman qhawarqanku. Altuman allinta qhawarqanku, maymantachus chay parlay jamorqa chayman.

6 Kinsa kaj kutita parlaypa nisqanta jap’eeqarqanku. Paykunamantaj nerqa nispa:

7 Qhawariychis, kaymi munasqa Waway, pipichus kusisqa kani, pipichus sutiyta jatuncharqani. Payta uyariychis.

8 Jinataj nisqana jap’eqaspa watejmanta janaj pachanejman qhawarqanku. Chayrayku paykuna rikorqanku uj Runa janaj pachamanta uraykamojta. Paytaj yuraj p’achawan p’achallisqa karqa. Uraykorqa, paykuna ukhupitaj sayarikorqa. Tukuyninkoj ñawisninkutaj payta qhawarqanku. Paykunatau mana simisninkuta kichariyta munarqankuchu, nitaj paykunallapurapis tapunakuyta munarqankuchu, yachanankupaj imachus ninayasqanta. Imaraykuchus paykuna angel rikhurimusqanta yuyarqanku.

9 Jinataj makinta oqharispa, llajtaman parlarqa nispa:

10 Qhawariychis, ñoqaqa jesucristo kani, pimantachus profetas sut’incharqanku jamunayta.

11 Ñoqaqa kay pachaj k’anchaynin, kawsaynintaj kani. Ñoqataj k’allku copamanta ujyarqani, mayqentachus Tata qowarqa. Ñoqataj Tatata jatuncharqani kay pachaj juchasninta apaspa, imapichus Tataj munaynina muchorqani tukuy imapa qallariymantapacha.

12 Jinataj Jesus kaykunata parlasqantawan q’alitunkupampaman urmarqanku, imaraykuchus yuyarqanku sut’inchasqaman jina Cristo janaj pachaman wichariytawan paykunawan rikuchikamunan karqa.

13 Jinataj Señorqa paykunaman parlarqa nispa:

14 Jatariychis, ñoqaman jamuychistaj, makisniykichista pechoypi t’ojsisqaman churaykunaykichispaj, makisniypi, chakisniypiwan clavospa jusk’usqankuta llankhanaykichispajtaj. Chaymanta yachanaykichispaj Israelpa Diosnin, tukuy kay pachaj Diosnin kasqayta, yachanaykichispajtaj kay pachaj juchasninrayku wañusqayta.

15 Jinataj q’alitunku paymana chayaspa, makisninkuta pechompi t’ojsisqanta llankharqanku; makisnimpi, chakisnimpiwan clavospa jusk’usqankuta llankhallarqankutaj. Tukuyninkutaj ujmanta uj chayta ruwarqanku. Ñawisninkuwan rikorqanku, makisninkuwantaj llankharqanku, cheqamanta yacharqanku, willarqankutaj pay kasqanta, pimantachus profetas parlarqanku jamunanta.

16 Maypachachus tukuyninku rikorqanku kikinku yachanankupaj, chaypacha tukuyninku kuska qhaparerqanku nispa:

17 ¡Hosanna! ¡Jatunchasqa kachun tukuymanta asqan altupi Diospa sutin! Paykunataj Jesuspa chakisninman urmaspa, payta yupaycharqanku.

18 Jinataj Nefiman parlarqa (imaraykuchus Nefi ashkha runas ukhupi karqa). Nefita kamacherqataj chimpananta.

19 Nefitaj jatarispa chimparqa, Señorpa ñawpaqempi k’umuykorqa, chakisninta much’arqataj.

20 Señortaj payta kamacherqa sayarinanta. Paytaj jatarispa, ñawpaqempi sayarerqa.

21 Señortaj paymana nerqa: Qanman atiyta qoyki kay llajtata bautizanaykipaj watejmanta janaj pachaman wicharisqaytawan.

22 Watejmantataj Señorqa ujkunata wajyarqa, kikillantataj paykunaman nerqa. Paykunaman qorqataj atiyta bautizanankupaj. Paykunaman nerqataj: Kay jinata bautizankichis, manataj phiñanakunkichischu qankuna ukhupi.

23 Cheqamanta qankunaman niykichis, pichus juchasninmanta Diosman kutirikun parlasqaykichisrayku, sutiypi bautizakuyta munaspa, payta bautizankichis. Qankuna yaku ukhuman uraykuspa sayarinkichis, sutiypitaj paykunata bautizankichis.

24 Kunantaj kayta ninkichis, sutisninkumanta paykunata wajyaspa, nispa:

25 Jesucristoj atiyninta jap’isqayrayku, bautizayki Tataj sutimpi, Wawaj sutimpi, Santo Espiritoj sutimpiwan. Amen.

26 Chaypachataj paykunata yakuman ch’ultiykunkichis, ch’ultiykuytawantaj watejmanta yakumanta llojsimunkichis.

27 Chay jinamanta sutiypi bautizankichis. Imaraykuchus cheqamanta niykichis, Tata, Wawa, Santo Espirituwan ujlla kanku. Ñoqataj Tatapi kani, Tatataj ñoqapi. Tatawan, ñoqawan ujlla kayku.

28 Ñoqa kamachisusqaykichisman jinalla bautizankichis. Amataj qankuna ukhupi phiñanakunkichischu, imaynatachus ñawpajta phiñanakorqankichis. Amataj phiñasqa simiwan parlapanakunkichischu yachachisqasniymanta, imaynatachus ñawpajta parlanakorqankichis.

29 Cheqamanta, cheqamanta niykichis, pichus phiñanakuy espirituyoj mana ñoqamantachu, astawanqa supaymanta. Imaraykuchus supay phiñaanakuypa tatan, paytaj runasta phiñachin phiña sonqoyoj kanankupaj.

30 Uyariychis, mana yachachinichu runasta phiña sonqoyoj kanankuta, astawanqa yachachini mana chaykunata ruwanankuta.

31 Uyariychis, cheqamanta, cheqamanta yachachiyniykunata willasqaykichis.

32 Kaykunata yachachini, kaykunatataj Tataqa yachachinaypaj qowan. Tatamanta willani, Tatataj ñoqamanta willan. Santo Espiritupis Tatamanta, ñoqamantawan willallantaj. Sonqoymanta willani Tata tukuy runasta kamachisqanta, maypipis kajtinku, Diosman kutirikunankupaj, ñoqapi creenankupajtaj.

33 Pitajchus ñoqapi creejqa, bautizachikojtaj, salvasqa kanqa. Paytaj Diospa reinonta chayaqepaj jap’enqa.

34 Pitajchus mna ñoqapi creejqa, bautizachikojtaj, juchachasqa kanqa.

35 Cheqamanta, cheqamanta niykichis, kaykunata yachachini, Tatamantataj kaykunata willani. Pichus ñoqapi creen, Taapi creellantaj. Tataj paymana ñoqamanta willanqa, imaraykuchus payta visitanqa ruphaywan, Santo Espirituwan ima.

36 Chay jinataj Tataqa ñoqamanta willanqa. Santo Espiritutaj Tatamanta, ñoqamantawan willanqa. Imaraykuchus Tatawan, ñoqawan, Santo Espirituwan ujlla kayku.

37 Watejmanta qankunaman niykichis, Diosman kutirikunaykichis tiyan, juch’uy wawa jinaman tukuspa. Sutiypitaj bautizakunaykichis tiyan. Mana chayqa, manapuni kaykunata jap’iyta atinkichischu.

38 Watejmanta niykichis, Diosman kutirikunaykichis tiyan, sutiypi bautizakunaykichis tiyallantaj juch’uy wawa jinaman tukuspa. Mana chayqa mana Diospa reinonta chayaqepaj jap’iyta atinkichischu.

39 Cheqamanta, cheqamanta niykichis kaykunaqa yachachiyneyqa. Pichus kaykuna patapi sayarin, ñoqaj rumiy patapi sayarin. Manataj ukhu pachaj punkun payta atipanqachu.

40 Pitajchus yachachiyniyman yapan, chayrí, juch’uychan, yachachiyniykuna kasqanta nispa, pay kikin sajramanta jamun, manataj rumiy patapi sayachisqachu. Payqa wasichakun t’iyu pampapi, ukhu pachaj punkusnin kichasqa kanku payta jap’inankupaj para jich’amojtin, mayus chayamunku; wayrastaj sinchista wayramuspa payta urmachinku.

41 Chayrayku kay llajtaman riychis, imatachus parlarqani, chayta willamuychis kay pachaj kantusninkama.