1 Jinataj maypachachus Jesus kaykunata parlayta tukucharqa, chaypacha ashkha runasta muyuynimpi ujtawan qhawarerqa, nerqataj: Tiempoy qayllapiña.

2 Rikuniña mana kallpayoj kasqaykichista, mana tukuy parlasqayta entiendenaykichispaj, mayqentachus Tata kamachiwarqa qankunaman parlanaypaj.

3 Chayrayku wasisniykcihisman riychis, imatachus nerqaykichis, chayta yuyamuychis. Tatamanta mañakamuychistaj, ñoqaj sutiypi, entiendenaykichispaj, yuyayniykichista q’ayapaj wakichisychis, imaraykuchus qankunaman kutimusaj.

4 Kunantaj Tataman risaj, jinataj Israelmanta chinkasqa familiaswan rikuchikamusaj, imaraykuchus Tatapaj paykuna mana chinkasqaschu kanku, maymanchus pusasqanta yachasqanrayku.

5 Jinataj Jesus parlaytawan, watejmanta ashkha runasta muyuynimpi qhawarerqa, rikorqataj paykuna waqajta. Paykunataj payta qhawaspalla karqanku pay astawan paykunawan quedakunampaj jina.

6 Paykunamantaj nerqa: Sonqoyqa qankunapaj khuyaywan junt’asqa.

7 ¿Qankuna ukhupi onqosqas kanchu? Paykunata kayman pusamuychis. ¿Qankuna ukhupi kanchu suchus, mana qhawajkuna, mana makiyojkuna, mana chakiyojkuna, sarna onqoyniyojkuna, ch’akisqas, lojt’ustaj, chayrí ima laya onqoyniyojkunapis? Paykunata kaymana pusamuychis, ñoqataj paykunata thañichisaj, imaraykuchus ñoqa khuyaykichis; sonqoyqa khuyaywan junt’asqa.

8 rikuni munasqaykichista qhawachisunaykichispaj imatachus Jerusalempi hermanosniykichispaj ruwasqayta. Imaraykuchus rikuni feniyoj kasqaykichista qankunata thañichinaypaj.

9 Jinataj maypachachus chay jinata parlayta tukucharqa, chaypacha tukuyninku chimparqanku onqosqasninkuwan, muchusqasninkuwan, tukuy suchusninkuwan, mana ñawiyojkunawan, opayasqasninkuwan, ima onqoyniyojkunawantaj. Paytaj sapa ujninkuta thañicherqa, chimpasqankumana jina.

10 tukuyninkutaj, thañichisqa kajkuna, mana onqosqa kajkunawan chakisninman qonqorikorqanku, payta yupaycharqankutaj. Ashkha runasmanta, pichus atej, payqa chimparqa, chakisninta much’arqataj, chayrayku waqayninkuwan chakisninta mayllarqanku.

11 Jinataj kamacherqa juch’uy wawasninkuta pusamunankuta.

12 Chayrayku juch’uy wawasninkuta chimpacherqanku, muyuyninnejpi pampamantaj wawasninkuta churaykorqanku. Jesustaj paykuna ukhupi sayarerqa. Runasqa k’iskikorqanku tukuy wawas payman pusasqa kanankukama.

13 Jinataj maypachachus tukuy wawasta pusarqanku, chaypacha Jesus paykuna ukhupi sayarerqa, ashkha runastataj kamacherqa pampapi qonqorikunankuta.

14 Jinataj maypachachus tukuy runas qonqorikorqanku, chaypacha Jesus sonqompi waqarqa, nerqataj: Tatáy, phutikuni Israelpa wawasnin juchallikusqankumanta.

15 Chayta niytawampacha, paypis pampapi qonqorikullarqataj. Paytaj Tatamanta mañakorqa. Imatachus Tatamanta mañakorqa, chaykunata mna escribiyta atikunmanchu. Ashkha runastaj, pikunachus payta uyarerqanku, paykuna cheqa kasqanta willarqanku.

16 Kay jinata willarqanku nispa: Ñaweqa mana ni jayk’aj rikorqachu, nitaj ninri uyarerqachu allin kajkunata, t’ukunapaj kajkunatawan mayqen jinatachus rikorqayku, uyarerqaykutaj Jesus Tataman parlajta.

17 Qallutaj mana parlayta atinmanchu, nitaj runa escribiyta atinmanchu, nitaj runaj sonqon jap’iyta atinmanchu imatachus rikorqayku, uyarerqaykutaj jesus parlajta, may allin, t’ukunapaj kasqanrayku. Mana pipis kusikusqaykuta entiendenmanchu, mayqenchus sonqosniykuman junt’arqa, maypachachus uyarerqayku Tatamanta mañapuwajtiyku.

18 Jinataj Jesus Tatamanta mañakuyta tukuchaytawan, jatarerqa. Jina kajtimpis tukuy runas ancha kusisqas kasqankurayku atipasqa karqanku kusiywan.

19 Jinataj jesus paykunaman parlarqa, jatarinankuta nerqataj.

20 Pampamanta jatarejtinkutaj, paykunaman nerqa: Kusikuyniyoj kankichis feniyoj kasqaykichisrayku. Kunantaj sonqoy kusiywan junt’asqa.

21 Jesus kaykunata parlaytawan waqarqa. Ashkha runastaj chayta qhawarqanku willanankupaj cheqa kasqanta. Paytaj sapa ujnin wawasta jap’ispa paykunapaj Tatamanta mañaporqa.

22 Chayta ruwaytawan watejmanta waqarqa.

23 Ashkha runasman parlarqataj nispa: Qhawariychis juch’uy wawasniykcihista.

24 Qhawaspataj paykuhna altuman qhawarerqanku. Janaj pacha kicharikojta rikorqanku angelesta janaj pachamanta uraykojta nina ukhupi jinaman rijch’akojta. Angelestaj uraykorqanku juch’uy wawasta muyuykuspa, paykunataj ninawan jina muyuykuchisqas karqanku; angelestaj paykunata bendicerqanku.

25 Runastaj rikorqanku, uyarerqanku, willarqankutaj. Yachankutaj willasqasninku cheqa kasqankuta, imaraykuchus q’alitunku kikinkupaj rikorqanku, uyarerqankutaj. Paykunataj karqanku casi iskay waranqa phishqa pachajniyoj runas. Paykuna ukhupi qharis, warmis, wawaswantaj karqanku.