1 Jinataj Jesuspa ajllasqasnin purerqanku, imatachus uyarerqanku, rikorqankutaj, chayta yachacherqanku, Jesuspa sutimpi bautizarqankutaj, jinataj ajllasqasnin tantakorqanku, sinchita Diosmanta mañakorqanku, ayunarqankutaj.

2 Chaypachataj watejmanta Jesus paykunaman rikhurimorqa Diosmanta mañakusqankurayku paypa sutimpi. Jesus jamorqa, paykuna ukhupi sayarerqataj, nispa: ¿Imatataj munankichis ñoqa qosunaykichista?

3 Payman nerqankutaj: Señor, willanawaykuta munaykuman ima sutiwanchus kay iglesiata sutichasajku, chayta; imaraykuchus kayrayku ashkha runas tratanakunku.

4 Señortaj paykunaman nerqa: Cheqamanta, cheqamanta niykichis ¿Imaraykutaj runas kayrayku tratanakuspa kankuri?

5 ¿Manachu escriturasta leenku? Mayqen escrituraschus ninku, Cristoj sutinta churakunaykichista, mayqenchus ñoqaj sutiy. Imaraykuchus qhepa p’unchaypi kay sutiywan wajyasqas kankichis.

6 Pitajchus ñoqaj sutiyta churakun, tukukuykama allinta sayantaj, payqa salvasqa kanqa qhepa p’unchaypi.

7 Chayrayku imatachus ruwankichis, chayta ruwankichis ñoqaj sutiypi. Chayrayku iglesiata sutichankichis ñoqaj sutiywan; Tatata wajyankichistaj ñoqaj sutiypi, ñoqarayku iglesiata bendcinampaj.

8 ¿Imaynamantataj ñoqaj iglesiay kanman mana ñoqaj sutiywan sutichasqa kajtin? Iglesia Moisespa sutinwan sutichasqa kanman chayqa, iglesiaqa Moisespata. Iglesia waj runaj sutinwan sutichasqa kanman chayqa, iglesia chay runajpata. Chayrayku iglesiachus ñoqaj sutiywan sutichasqa kanman chayqa, ñoqaj evangelioy patapi sayarichisqa chayqa, chay iglesia ñoqaypata.

9 Cheqamanta niykichis, qankuna evangelioy patapi sayachisqa kankichis; chayrayku imatachus wajyankichis, chaykunata ñoqaj sutiypi wajyankichis. Chayrayku Tatata wajyankichis iglesiarayku ñoqaj sutiypi chayqa, Tataqa uyarisonqachis.

10 Iglesiachus evangelioy patapi sayarichisqa kanman chayqa, Tataqa ruwayninkunata rikuchenqa kay iglesiawan.

11 Manachus evanelioy patapi sayarichisqa kanman astawanqa runaj ruwasqan patapi sayarichisqa, chayrí supaypa ruwasqan patapi sayarichisqa kanman chayqa, cheqamanta niykichis, paykuna uj tiempopaj kusikonqanku ruwasqasninkupi, chaywampis tukukuy tiempo chayamonqa, paykunataj ruthusqas, wijch’usqastaj kanqanku ninaman, maymantachus mana pipis kutimunchu.

12 Imaraykuchus ruwasqasninku paykunata qhatenqanku, ruwasqasninkuraykutaj wijch’usqas kanqanku; chayrayku nisusqaykichista yuyariychis.

13 Ñoqa evangelioyta qorqaykichis. Kaytaj qosusqaykichis evangelioy — Kay pachaman jamorqani Tataypa munayninta ruwaj, Tatay kachamuwasqanrayku.

14 Tataytaj kachamuwarqa cruzpi oqharisqa kanaypaj; cruzman oqharisqa kaytawantaj tukuy runasta ñoqaman pusajta kachamuwarqa. Imaynamantachus ñoqa runasnejta oqharisqayman jina, chay jinapis runas Tatanejta oqharisqas kanankupaj, ñawpaqeypi sayanankupaj, ruwasqankuman jina juzgasgas kanankupaj, allin ruwayniyoj kajtinkupis, sajra ruwayniyoj kajtinkupis.

15 Kuypaj oqharisqa karqani; chayrayku Tataj tiyninman jina, tukuy runasta ñoqaman pusasaj, ruwasqankuman jina juzgasgas kanankupaj.

16 Jinataj pichus Diosman kutirikun, sutiypi bautizakuntaj, payqa kusisqa kanqa. Paychus tukukuykama allinta sayan chayqa, payta mana juchachasajchu Tataypa ñawpaqempi ima p’unchaypichus kay mundota juzgasaj.

17 Pitajchus mana tukukuykama allinta sayanchu, cebada jina ruthusqa, ninaman wijch’usqataj kanqa, chaymantataj mana pi kutimuyta atinchu, Tataj justicianrayku.

18 Kaytapuni runaspa wawasninkuman willan. Kayraykutaj imatachus willan, chayta junt’an. Manataj llullakunchu, astawanqa tukuy parlasqasninta junt’ampuni.

19 Manataj ni uj ch’ichi runa reinonman yaykuyta atinchu. Chayrayku mana imapis samariyninman yaykunchu, pikunachus p’achasninkuta mayllanku ñoqaj yawarniypi, paykunalla, feninkurayku, tukuy juchasninkumanta Diosman kutirikusqankurayku, tukukuykama feniyoj kaqankuraykutaj.

20 Kunantaj kaymin kamacheyqa: Juchasmanta llimphuchakuychis tukuy kay pachaj kantusnin. Ñoqaman jamuychis, sutiypi bautizakuychistaj, Snato Espirituta jap’isqaykichisnejta llimphuchasqas kanaykichispaj, mana ni ima ch’ichiyoj ñawpaqeypi sayarinaykichispaj qhepa p’unchaypi.

21 Cheqamanta, cheqamanta niykichis, kaymin evangelioy; yachankichistaj imatachus iglesiaypi ruwanaykichista. Imaraykuchus imatachus ruwajta rikuwarqankichis, chayta ruwallankichistaj; iamtachus ruwajta rikuwarqankichis chaytapis ruwallankichistaj.

22 Chayrayku kaykunata ruwankichis chayqa, kusikuyniyoj kankichis, imaraykuchus qhepa p’unchaypi oqharisqa kankichis.

23 rikusqaykichista, uyarisqaykichistawan escribiychis, amataj escribiychischu imatachus Dios jark’asorqachis, chayta.

24 Kay llajtaj ruwasqanta escribiychis, mayqenkunachus ruwasqa kanqanku, chaykunatapis, imaynatachus escribisqa karqa imachus pasasqamanta kikinta.

25 Imaraykuchus escribisqaña librosmanta, escribisqa kananku librosmantawan kay llajta juzgasqa kanqa. Imaraykuchus escribisqasninkumanta runas yachanqanku ruwasqasninkuta.

26 Jinataj Tatanejta tukuy ima escribikun; chayrayku escribisqa kananku librosmanta tukuy kay mundo juzgasqa kanqa.

27 Yachallaychistaj kay llajtata juzganaykichista, qankunaman qonay juzgayman jina, chay juzgaytaj cheqampuni kanqa. Chayrayku, ¿Ima laya runataj kanaykichis tiyan? Cheqamanta niykichis, ñoqa jina runa kanaykichis tiyan.

28 Kunantaj Tataman ripuni. Cheqamantataj niykichis, imatachus Tatamanta mañakunkichis ñoqaj sutiypi, qankunaman qosqa kanqa.

29 Chayrayku mañakuychis, jap’inkichistaj; punkuta takaychis kicharimusonqachistaj, imaraykuchus mañakojqa jap’in; punkuta takajtapis kicharinku.

30 Kunantaj qankunarayku, kay mirayraykutaj kusiyniy jatun, sonqo junt’asqa kanaykama; arí, Tatapis kusikullantaj, tukuy k’anchayniyoj angelespis qankunarayku, kay mirayraykutaj; imaraykuchus mana pipis kaykunamanta chinkanqachu.

31 Entiendenaykichista munayman; imaraykuchus kay miraymanta kawsajkunamanta parlashani; paykunamanta mana pipis chinkasqachu kanqa; paykunapitaj junt’a kusikuyniyoj kani.

32 Chaywampis ñoqa ancha phutisqa kani kay miraymanta tawa kaj mirayrayku. Imaraykuchus paykunaqa chinkanampaj churasqa wawata presochasqanman jina, kikillanta payqa paykunata pusan paykunata presochanankama. Paykunataj ñoqata vendewanqanku qolqerayku, qorirayku, imatachus thuta tukuchin, imatachus suwas suwanku, chayraykutaj vendewanqanku. Chay p’unchaypi paykunata visitasaj, ruwasqankuta kikin umasninkuman kutichisajtaj.

33 Jinataj Jesus kayta parlaytawan ajllasqasninman nerqa: K’ullku punkunejta yaykuychis, imaraykuchus cheqampuni punkoqa, k’ullkullataj kawsayman pusaj ñampis, pisistaj kanku chayta arejkuna. Imaraykuchus anchomin punkoqa, jatuntaj wañuyman pusaj ñampis, ashkhastaj kanku chaynejta purejkuna, tuta chayamunankama, chaypachataj ni pi llank’ayta atenqachu.