1 Cheqamanta niykichis, señalta qosqaykichis yachanaykichispaj ima tiempochus kaykuna junt’akonqanku — Noqa llajtayta tantasaj, o Israelpa wawasnin, unay ch’eqerachisqa kasqankumanta. Ñoqataj paykuna ukhupi jatarichisaj Sionniyta.

2 Kaytataj qosqaykichis señal kanampaj — cheqamanta niykichis maypachachus kunan willasusqaykichis cosas, jinataj cosas gentilesman willasqas kajtinku, Santo Espiritoj atiyninnejta, imachus Tatamanta qankunaman qosqa kanqa, paykuna yachanankupaj kay llajtamanta, pikunachus Jacobpa wawasninmanta puchun kanku, kay llajtaymantawan, mayqenchus paykunanejta ch’eqerachisqa kanqa;

3 Cheqamanta, cheqamanta niykichis maypachachus Tata kayta paykunaman willanqa — jinataj Tatamanta llojsimonqanku, paykunamanta qankunaman.

4 Imaraykuchus Tataj y uyayninman jina, paykuna kay jallp’api tiyakonqanku. Paykunataj Tataj atiyninman jina tiyakonqanku libre runas kanankupaj, kaykuna paykunamanta llojsinankupaj mirayniykichispa puchunman, Tataj tratochasqan junt’akunampaj, mayqentachus pay ruwarqa llajtanwan, o Israelpa wawasnin.

5 Chayrayku maypachachus kay ruwanas, kunanmantapacha qankuna ukhupi ruwanaswan gentilesnejta llojsimunku qankunaj mirayniykichisman, pikunachus mana creeyman urmanqanku juchallikusqankurayku;

6 Imaraykuchus Tataj munayninman jina gentilesnejta llojsimonqanku, atiyninta gentilesman rikuchinampaj. Manachus gentilesqa sonqosninkuta rumiyachenqanku chayqa, juchamanta kutirikuyta atinankupaj, ñoqaman jamuyta atinankupaj, sutiypi bautizasqas kayta atinankupaj, cheqa yachachiyniyta yachayta atinankupajtaj ñoqaj llajtaywan yupasqas kanqanku, o Israelpa wawasnin.

7 Jinataj maypachachus kaykuna junt’akonqanku, mirayniyki kaykunata yachanankupaj, señal paykunapaj kanqa, yachanankupaj Tataj ruwaynin qallarisqata, llajtanwan tratochasqanta junt’anampaj. Chaytaj Israelpa wawasninwan trato.

8 Chay p’unchay chayashajtintaj, reyesqa simisninkuta wisq’anqanku; imaraykuchus mana paykunaman willasqata rikonqanku, mana uyarisqankupi t’ukonqankutaj.

9 Imaraykuchus chay p’unchaypi, ñoqarayku Tataqa ruwayta ruwanqa. Ruwaytaj may jatun, t’ukunapaj ruway kanqa paykuna ukhupi. Paykuna ukhupitaj mana creejkuna kanqanku waj runa chayta paykunaman willashajtimpis.

10 Chaywampis kamachiypa kawsaynin ñoqaj makiypi kanqa; chayrayku payta mana nanachenqankuchu, payta waj jinayachejtinkupis. Payta thañichisaj, yuyayniy supaypa sajra yuyayninmanta aswan jatun kasqanta rikuchinaypaj.

11 Chayrayku pichus ñoqa, Jesucristoj, parlasqayta mana creenmanchu, imatachus Tata paywan genilesman willachenqa, paymana tiyta qonqataj chaykunata gentilesman willanampaj (Moisespa nisqanman jina ruwasqa kanqal), paykunaqa tratochasqa llajtaymanta qharqosqos kanqanku.

12 Llajtaytaj, mayqenchus Jacobpa mirayninmanta puchun, gentiles ukhupi kanqanku, arí, paykuna ukhupi kanqanku sach’aspi animaleswan purej leon jinalla, imaynatachus juch’uy leon purin ovejas ukhupi, mayqenchus ovejasta sarun, wañuchintaj. Manataj pipis paykunata salvanmanchu.

13 Paykunaj makinku chejnejninkoj contrampi oqharisqa kanqa, enemigosninkutaj qharqosqas kanqanku.

14 Arí, ¡Ay gentilesmanta mana Diosman kutirikojtinkoqa! Imaraykuchus Tataqa nin, chay p’unchaypi chawpiykichismanta caballosniykichista qhechusqaykichis, carrosniykichistataj thunisaj.

15 Jallp’api llajtasniykichista thunisaj, tukuy kallpayoj lugaresniykichista tukuchisaj;

16 Kay jallp’aykichispi layqa ruwaykunata chinkachisaj. manañataj astawan layqa runas kanqachu.

17 Lantisniykichistataj thunisaj, ruwasqa dioskunasniykichistataj chawpiykichismanta urmachisaj; manañataj yupaychankichischu makiykichispa ruwasqankuta.

18 Poqoy sach’asniykichista chawpiykichismanta sik’isaj, llajtasniykichistataj tukuchisaj.

19 Jinataj tukuy llullakuykunas, engañaykunas, munapayaykunas, phiñanakuykunas, layqa ruwaykunaswan, qhenchachaykunaswan ima tukuchisqas kanqanku.

20 Imaraykuchus nin Tataqa, pikunachus juchasninkumanta mana kutirinkuchus, manataj munasqa Wawayman jamunkuchu, paykunata llajtaymanta qharqosaj, o Israelpa wawasnin;

21 Phiña kutichiyniyta paykunaman chayachisaj, mana creejkunaman jina, imaynamantachus ni jayk’aj uyarisqanku jinata.

22 Chaywampis sichus ñoqaman kutiriwanqanku, parlasqayta uyariwanqankutaj, sonqonkuta mana rumiyachispa chayqa, igelesiayta paykuna ukhupi jatarichisaj. Paykunataj tratoman yaykonqanku, yupasqataj kanqanku kay Jacobpa mirayninmanta puchunwan, pikunamanchus kay jallp’ata qorqani chayaqenku kanampaj.

23 Llajtaytataj yanapanqa, Jacobpa mirayninmanta puchun kajkuna, pikunallapis Israelpa wawasninmanta jamonqanku llajtata jatarichisnankupaj. Chay llajtataj Mosoj Jerusalen sutiyoj kanqa.

24 Chaymanta llajtayta yanapanqanku tantasqas kanankupaj, pikunachus kay jallp’a patapi ch’eqerachisqas kanku, tantasqas kanankupaj Mosoj Jerusalen nisqaman.

25 Chaypachataj janaj pachamanta atiy paykuna ukhuman uraykonqa; ñoqataj paykuna ukhupi kasaj.

26 Chay p’unchaypitaj Tataj ruwaynin qallarenqa, maypachachus kay evangelio kay llajtaj puchunman yachachisqa kanqa. Cheqamanta niykichis, chay p’unchaypi Tataj ruwaynin qallarenqa tukuy ch’eqerachisqa llajtaypa chawpimpi, arí, chinkasqa familiaspa chawpinkupipis, pikunatachus Tata Jerusalenmanta pusarqa.

27 Arí, tukuy ch’eqerachisqa llajtasniy ukhupi ruwaynin qallarenqa, Tatawan, ñanta wakichisnampaj ñoqaman jamunankupaj, Tatata wajyanankupaj ñoqaj sutiypi.

28 Arí, chaypacha ruwaynin qallarenqa, Tatawan, tukuy llajtas ukhupi, ñanta wakichisnampaj, maynejtachus llajtan chayaqe jallp’anmanta tantasqa kanqa.

29 Tukuy llajtasmanta llojsenqanku; mana usqhaytachu llojsenqanku, manataj ayqespachu llojsenqanku, imaraykuchus ñawpaqenkuta risaj, Tataqa nin, ñoqataj jark’ajninku kasaj.