1 Jinataj Jesus janaj pachaman wicharisqantawampacha, tukuy runas t’aqakorqanku sapa ujnin warminta, wawasnintawan pusaspa wasisninkuman.

2 Chay ratupacha tukuy jallp’api runasqa uyarerqanku, manaraj ch’isiyajtin, ashkha runas Jesusta rikusqankuta, pay yachachisqantawan. Uyarerqankutaj Jesus q’ayantin watejmanta ashkha runaswan rikuchikunanta.

3 Arí, tutantin Jesuspa jamusqanmanta willarqanku; ashkha runasman willaramusqankuraykutaj, ashkha karqanku, arí, may chhika runas tutantin llank’arqanku q’ayantin chayanankupaj, maymanchus Jesus watejmanta tukuy runaswan rikuchikunman, chay lugarman.

4 Q’ayantintaj, maypachachus ashkha runas tantakorqanku, Nefi, hermanon Timoteowan, pitachus wañusqasmanta jataricherqa, paypa wawampis, Jonas sutiyoj, Matoniwan, paypa hermanonwan Matoniah sutiyoj, Kumenwan, Kumenoniwan, Jeremiaswan, Shemnonwan, Jonaswan, Sedeciaswan, Isaiaswan ima, paykunata Jesus ajllarqa; Paykunataj rerqanku, ashkha runas chawpipi sayarerqankutaj.

5 Ashkha, ashkha runas jamusqankurayku, chunka iskayniyoj t’aqasman runasta t’aqacherqanku.

6 Chunka iskayniyoj ajllasqastaj runasta yachacherqanku. Paykunataj runasta pampapi qonqoricherqanku, Tatamanta mañakunankupaj Jesuspa sutimpi.

7 Ajllasqastaj Tatamanta mañakorqanku Jesuspa sutimpi. Chantataj jatarerqanku runasta yachachinankupaj.

8 Maypachachus paykuna yachacherqanku Jesuspa nisqanta, imaynatachus Jesus yachacherqa kikillantataj, chaypacha paykuna watejmanta qonqorikorqanku Tatamanta mañakunankupaj Jesuspa sutimpi.

9 Paykunataj Tatamanta mañakorqanku imatachus tukuy imamanta astawan munarqanku, chayta. Munarqankutaj Santo Espiritu paykunaman qosqa kananta.

10 Ajinata Diosmanta mañakuytawan, paykuna yaku kantuman rerqanku. Runastaj qhepankuta rerqanku.

11 Jinataj Nefi yakuman yaykorqa, bautizasqataj karqa.

12 Paytaj yakumanta llojsispa bautizayta qallarerqa. Paytaj bautizarqa tukuy Jesuspa ajllasqasninta.

13 Jinataj maypachachus tukuy paykuna bautizasqas karqanku yakumanta llojserqankutaj, chaypacha Santo Espirituwan, ninawan ima junt’asqas karqanku.

14 Paykunataj muyuykusqa karqanku ninawan jina. Chaytaj janaj pachamanta uraykorqa. Ashkha runastaj chayta rikorqanku, willarqankutaj chaymanta. Angelestaj janaj pachamanta uraykorqanku, paykunata bendicerqankutaj.

15 Jinataj angeles ashkha runasta bendecishajtinku, Jesuspis jamullarqataj, paykuna ukhupi sayarerqa, bendecillarqataj.

16 Jinataj ashkha runasman parlarqa, paykunata kamacherqataj watejmanta pampapi qonqorikunankuta, ajllasqasnimpis pampapi qonqorikunallankutataj.

17 Jinataj tukuyninku pampapi qonqorikusqankutawan, ajllasqasninta Diosmanta mañakunankuta kamacherqa.

18 Paykunataj mañakuyta qallarerqanku; Jesusmantataj mañakorqanku, payta wajyaspa Señorninku, Diosninkutaj nispa.

19 Jinataj Jesus paykuna ukhumanta t’aqakorqa, mana karuman rispa. Paytaj pampaman k’umuykorqa, nerqataj:

20 Tatáy, qanta agradeceyki Santo Espirituta ajllasqasniyman qosqaykimanta. Ñoqapi creesqankuraykutaj kay pachamanta paykunata ajllarqani.

21 Tatáy, qanmanta mañakuyki Santo Espirituta qonaykita, pikunachus paykunaj nisqankuta creenku, paykunaman.

22 Tatáy, Santo Espirituta qorqanki ñoqapi creesqankurayku; rikunkitaj ñoqapi creesqankuta uyarisqaykirayku ñoqamanta mañakojta. Noqamanta mañakuwanku paykunawan kuska kasqayrayku.

23 Kunantaj Tatáy, qanmanta mañapuyki paykunapaj, pikunachus parlasqankuta creenkuman, paykunapajtaj, ñoqapi creenankupaj, paykunapi kanaypajtaj, imaynatachus qan, Tatáy, ñoqapi kanki ñoqanchis ujlla kananchispaj, ajinata.

24 Jinataj Jesus Tatamanta mañakusqanmanta, ajllasqasninman chimparqa. Paykunataj mana samarispa paymanta mañakusharqanku, manataj yaparqankuchu parlasqankumana, imaraykuchus qosqaña karqa parlanankupaj, paykunataj munakuywan junt’asqas karqanku.

25 Jinataj Jesus paykunata bendicerqa paymanta mañakushajtinku. Paykunaman asirerqa, uyampa k’anchaynintaj paykunaman k’achasnin jinataj. Yuraj kasqankutaj tukuy yuraj kajkunamanta astawan yuraj, arí, mana kay pachapi kanmanchu jina yuraj.

26 Jesustaj nerqa: Mañakullaychispuni, chayrayku mana mañakuyta tukorqankuchu.

27 Paykunamanta ujtawan jatarikuspa, mana karuman rispataj, watejmanta k’umuykorqa, Diosmanta mañakorqataj nispa:

28 Tatáy, qanta agradeceyki llimphuchasqaykimanta, pikunatachus ñoqa ajllarqani feniyoj kasqankurayku, paykunata. Ñoqataj mañapuyki paykunapaj, pikunachus parlasqankuta creenku, paykunapajtaj, ñoqapi llimphuchasqa kanankupaj, paykunaj parlasqankupi feniyoj kasqankurayku, imaynatachus paykuna ñoqapi llimphuchasqaña kanku.

29 Tatáy, mana kay mundoraykuchu mañakuyki, astawanqa pikunatachus qan qowarqanki kay mundomanta, paykunarayku, feniyoj kasqankurayku, ñoqapi llimphuchasqa kanankupaj, ñoqa paykunapi knaypaj, imaynatachus qan Tatáy, ñoqapi kanki ujlla kananchispaj, jatunchasqa kanaypaj paykunarayku.

30 Maypachachus Jesus kaykunata parlayta tukucharqa, watejmanta ajllasqasninman chimparqa. Paykunataj mana samarispa paymanta mañakorqanku. Jesustaj watejmanta paykunaman asirerqa. Paykunataj yurajpacha karqanku Jesus jina.

31 Jinataj watejmanta ithirikuspa, mana karuman rispataj, Diosmanta mañakorqa.

32 Qallutaj mana niyta atinmanchu imatachus Jesus mañakorqa, chayta, manataj runa escribiyta atinmanchu imatachus pay mañakorqa.

33 Chay ashkha runas uyarerqanku, willankutaj. Sonqosninku kicharisqa kasqankuraykutaj sonqosninkupi entienderqanku imatachus pay mañakorqa, chayta.

34 Chaywampis may chhika allin, may chhika jatun mañakusqasnin kasqankurayku, chaykunasta runasqa mana escribiyta, nitaj parlayta atinkumanchu.

35 Jinataj maypachachus Jesus Diosmanta mañakuyta tukucharqa, chaypacha watejmanta ajllasqasninman chimparqa paykunaman nerqataj: Tukuy judiosmanta mana kay chhika feniyoj kasqaykichista jina rikorqanichu; chayrayku mana paykunaman rikuchiyta aterqanichu kay chhika allin milagrosta.

36 Cheqamanta niykichis, paykuna ukhupi mana pipis rikorqacu kay chhika allin kajkunata, imatachus qankuna rikorqankichis; mnataj uyarerqankuchu kay chhika allin kajkunata, mayqenkunatachus qankuna uyarerqankichis.