1 Kunantaj niykichis, yachayninman jina, Señorqa allinña kasqanta rikojtin kay parlaykuna, nisqanman jina, gentilesman jamonqanku. Chaypachataj yachankichis Tataj Israelpa wawasninwan tratochasqanta, paykuna chayaqe jallp’ankumana pusachisqas kanankupaj, chay tratochasqan junt’akuyta qallarisqantaña.

2 Tukuy Señorpa parlasqasnin, mayqenkunachus llimphuchasqa profetasnejta willarqa, chaykuna junt’asqas kanankuta yachayta atinkichis. Manataj ninaykichischu tiyan Señorqa amaraj jamuchunchu Israelpa wawasninman.

3 Sonqosniykichispi mana yuyanaykichischu tiyan parlasqaña willaykuna llanqhalla kasqankuta. Imaraykuchus Señorqa Israelpa wawasninmanta llajtanwan tratochasqanta yuyarikonqa.

4 Maypachachus kay parlaykuna qankuna ukhuman chayamojta rikunkichis, chaypacha manaña Señorpa ruwayninta qhesachanaykichischu tiyan, imaraykuchus justician espada paña makimpi kashan. Jinataj chay p’unchaypichus ruwayninta qhesachankichis chayqa, espadawan taripachisonqachis.

5 Ay Señorpa ruwasqasninta qhesachajmanta; arí, ay Cristota, ruwasqasnintawan negajmanta.

6 Arí, ay Señorpa rikuchisqasninta negajmanta, pichus nin Señor manaña rikuchiykunawan, sut’inchaykunawan, qoykunawan, parlaykunawan, thañichiykunawan, manataj Santo Espiritoj atiyninwampis llank’asqantañachu.

7 Arí, ay chay p’unchaypi nejmanta, qolqechakunampaj ninman Jesucristo milagrota mana ruwayta atinchu nispa. Kayta ruwajqa chinkanampaj churasqa wawa jinaman tukun, paypajtaj khuyay mana kanchu, Cristoj parlasqanman jina.

8 Arí, manaña judiosta, nitaj Israelpa wawasninmanta puchunta pisichanaykichischu tiyan, nitaj qhesachanaykichischu tiyan, nitaj asipayanaykichischu tiyan. Imaraykuchus Señor yuyarin paykunawan tratochasqanta, junt’anqataj imatachus jurarqa ruwanampaj chayta.

9 Chayrayku mana yuyanaykichischu tiyan Señorpa paña makinta lloq’eman tijrayta atinaykichista, juzganan jark’asqa kanampaj, Israelpa wawasninwan tratochasqanta mana junt’anampaj.