1 Ajinataj escribisqasniykuman jina, ñoqaykutaj yachayku escribisqasniyku cheqa kasqankuta, imaraykuchus llimphu runa chaykunata waqaycharqa. Imaraykuchus ashkha milagrosta ruwarqa Jesuspa sutimpi, manataj pipis milagrosta Jesuspa sutimpi ruwayta aterqachu mana ima juch’uy juchasninmanta llimphuchasqa kaspa.

2 Jinataj sichus chay runa mana pantarqachu yupaspa tukuy pasasqa watasta, kinsa chunka kinsayoj wata pasarqaña.

3 Llajtataj mana samaspa qhawayta qallarerqanku señal rikhurimunampaj, mayqen señaltachus lamanita Samuel sutiyoj profeta qorqa. Arí, chay señal junt’akojtin kinsa p’unchaypaj laqhayanman kay jallp’a patapi.

4 Jinataj runas ukhupi ashkah iskayrayay, phiñanakuytaj karqa ashkha señales qosqos kajtinkupis.

5 Jinataj kinsa chunka tawayoj watapi, ñawpaj kaj killapi, killaj tawa kaj p’unchaynimpi, sinchi para wayra oqharikamorqa mana pipis chay jina wayrata rikorqarajchu.

6 May chhikata paramorqa, wayramorqataj. Jatun qhon qhon nimusqanrayku kay pacha kharkatiterqa t’aqakoj jinamana rijch’akuspa.

7 Ancha lliphipiyniyoj lliuj lliuj nimullarqataj, chay jina lliuj lliujta mana pipis rikorqarajchu.

8 Zarahemla llajtataj ninawan ruphachisqa karqa.

9 Moroni nisqa llajtatataj jatun qhocha p’amparqa, chaypi tiyakojkunataj yaku ukhupi p’ampasqas karqanku.

10 Jallp’ataj suchorqa Moronihah nisqa llajta pataman. Chayrayku llajta chaypi kanantaqa, jatun orqo rikhurimorqa.

11 Ura jallp’apitaj may jatun thunikuy karqa.

12 Chaywampis ura jallp’amanta pata jallp’apeqa astawan thunikuy karqa. Imaraykuchus tukuy jallp’a waj jinayasqa karqa sinchita paramusqanrayku, muyoj wayras kasqanrayku, qhon qhon, lliuj lliuj nimusqanraykutaj, tukuy kay pacha kharkatitisqanraykutaj.

13 Jatun ñankuna t’aqasqas karqanku, pampa purinastaj thunisqas karqanku. Ashkha llamp’u jallp’astaj rumiraraman tukorqanku.

14 Ashkha jatun allin rejsisqa llajtastaj yakusman urmarqanku, ashkhastaj ruphachisqas karqanku, ashkhastaj thunisqas karqanku tukuy chaypi wasis urmanankukama. Chay llajtaspi tiyakojkunataj wañuchisqas karqanku, chayrayku ch’in pachalla karqanku.

15 Wakin llajtastaj kawsallarqankuraj. Jina kajtimpis, ashkha thunikuy karqa. Ashkha runastaj chaypi wañorqanku.

16 Wakinkunataj apasqa karqanku muyoj wayrawan. Mana pipis yachanchu maymanchus apasqa kasqankuta. Chinkasqa kasqankullata yachakun.

17 Chay jinata tukuy kay pacha waj jinaman kutichisqa karqa, sinchi paramusqanrayku, wayramusqanrayku, qhon qhon, lliuj lliuj nimusqanrayku, kay pacha kharkatitisqanraykutaj.

18 Rumistaj p’akirakorqanku, tukuy kay jallp’a patapi p’akisqa karqanku. Ajinamanta t’unasqas karqanku tukuy kay pachaj t’oqosnimpi, qaqasnimpipis.

19 Jinataj qhon qhon, lliuj lliuj nimuy, paramuy, wayramuy, kay pacha kharkatitiytaj, chaykunas manaña karqachu. Kinsa horaspaj qhon qhon, lliuj lliuj nimorqa, paramorqa, wayramorqa, kay pacha kharkatiterqataj. Wakenqa ninku kinsa horasmanta astawan kasqanta. Chaywampis tukuy chay thunikuykunas kinsa horaspi jina tukukorqanku. Chaymantapacha tukuy jallp’a patapi laqhalla karqa.

20 Jinataj tukuy jallp’a patapi sinchi laqha karqa. Chayrayku chaypi tiyakojkunaqa, mayqenkunachus mana wañorqankuchu, paykuna yacharqanku laqha phuyu kasqanta, chayta sientesqankurayku.

21 Manataj k’anchaymuyta aterqachu, laqha kasqanrayku. Mana velasta, ni ninastapis jap’ichiyta aterqankuchu. Manataj ninata jap’ichiyta aterqankuchu ancha ch’aki llant’awampis. Chayrayku manapuni k’anchay karqachu.

22 Manataj uj k’anchaytapis rikorqankuchu, nitaj lawrayta, nitaj lliphipiyta, nitaj intita, nitaj killata, nitaj ch’askasta, ashkha phuyu jina laqha kasqanrayku jallp’a patapi.

23 Jinataj kinsa p’unchaypaj mana k’anchayta rikorqankuchu. Runastaj anchata phutikorqanku, qhaparikorqanku, waqarqankutaj mna samarispa. Arí, runasqa anchata waqarqanku laqha kasqanrayku, thunikuy kasqanraykutaj, mayqenkunachus paykunaman urmarqanku.

24 Uj llajtapi qhaparisqanku uyarisqa karqa, nispa: O Diosman kutirikusunman karqa manaraj kay jatun millay p’unchay chayamushajtin. Chaymantaqa hermanosninchis kawsallankuman karqa, manataj ruphachisqa kankumanchu karqa jatun Zarahemla nisqa llajtapi.

25 Waj llajtapitaj qhaparejta, waqajtawan uyarerqanku nispa: O Diosman kutirikusunman karqa manaraj chayamushajtin kay millay p’unchay, manataj profetasta rumiswan ch’anqaspa wañuchisunmanchu karqa, manataj paykunata wijch’usunmanchu karqa. Jiná mamasninchis, k’acha warmi wawasninchiswan mana p’ampasqaschu kankumana karqa jatun Moronihah nisqa llajtapi. Chay jinata llajtaj waqaynin ancha jatun, phutichinapajtaj karqa.