1 Jinataj Jesus ajllasqasninta kamacherqa t’antata, vinotawan apamunankuta.

2 Paykuna t’antata, vinotawan apamojtinkutaj, runasta kamacherqa pampapi tiyakunankuta.

3 Maypachachus ajllasqasnin t’antata, vinotawan apamorqanku, chaypacha Jesus t’antata jap’ispa chayta parterqa, bendicerqataj. Ajllasqasninman chayta qorqataj mikhunankuta kamachispa.

4 Mikhusqankutawan sajsasqas karqanku, Jesustaj paykunata kamacherqa tukuy runasman jaywanankuta.

5 Maypachachus tukuy runas mikhorqanku, sajsasqa karqankutaj, chaypacha ajllasqasninman nerqa: Uyariychis, qankunamanta ujnin wajyasqa kanqa, paymantaj atiyta qosaj t’antata partinampaj, bendecinampajtaj, iglesiaymanta runasman jaywanampaj, pikunachus creenku, sutiypi bautizakunkutaj, paykunaman.

6 Kayta wiñaypaj ruwankichis, imaynatachus ñoqa ruwarqani, imaynatachus ñoqa t’antata parterqani, bendicerqanitaj, qankunaman qorqanitaj ajinata.

7 Kayta ruwankichis cuerpoyta yuyarinaykichispaj, mayqentachus qankunaman rikucherqani. Kayta ruwaspa Tataman rikuchinkichis ñoqata yuyarisqaykichista. Qankunachus ñoqata yuyarikuspalla kankcihis chayqa, ñoqaj Espirituy qankunawan kanqa.

8 Jinataj chayta niytawampacha, Jesus ajllasqasninta kamacherqa vino copata jap’inankuta ujyanankupaj. Kamachillarqataj tukuy runasman jaywanankuta paykunapis ujyanankupaj.

9 Jinataj paykuna ajinata ruwarqanku, ujyarqanku, sajsarqankutaj. Tukuy runasman jaywajtinkutaj, runasqa ujyarqanku, sajsarqankutaj.

10 Maypachachus ajllasqasnin chayta ruwarqanku, chaypacha Jesus paykunaman nerqa: Kusikuyniyoj kankichis kayta ruwasqaykichisrayku. Imaraykuchus kayta ruwaspa kamachisqasniyta junt’ankcihis, Tataman rikuchinkichistaj, imatachus kamacherqaykichis, chayta ruwayta munasqaykichista.

11 Kayta ruwankichispuni, pikunachus Diosman kutirikunku, sutiypi bautizakunkutaj, paykunapaj. Kayta ruwankichis yawarniyta yuyarinaykichispaj, mayqen yawarchus qankunapaj jich’arqani, Tataman willanaykichispaj ñoqata wiñaypaj yuyarinaykichista. Qankunachus wiñaypaj yuyarikuwankichis chayqa, ñoqaj Espirituy qankunawan kanqa.

12 Kamachiykichistaj kaykunata ruwanaykichista. Qankunachus kaykunata ruwankichis chayqa, kusikuyniyoj kankichis ñoqaj rumiy patapi sayachisqa kasqaykichisrayku.

13 Pillapis qankunamanta asqan pisita, mana chayqa astawanraj kaykunamanta ruwan, payqa mana rumiy patapi sayasqachu, astawanqa t’iyu patapi sayasqa. Paramojtin, mayus chayrayku apasqa kanqa, ukhu pachaj punkusinintaj kicharisqas kanku payta jap’inankupaj.

14 Chayrayku kusikuyniyoj kankichis kamachisqasniyta junt’aspa, mayqen kamachisqastachus Tata kamachiwarqa qankunaman qonaypaj.

15 Cheqamanta, cheqamanta niykichis, qhawaychis, Diosmanta mañakuykichistaj mana supay tentasunaykichispaj, pay mana presochasunaykichispajtaj.

16 Imaynatachus qankuna ukhupi Diosmanta mañakorqani kikillantaj qankuna iglesiaypi Diosmanta mañakunkichis, pikunachus Diosman kutirikunku, sutiypi bautizakunkutaj, paykunawan. Qhawariychis ñoqa k’anchayqa kani, ñoqa ruwarqani, qankunapis ñoqa jina ruwanaykichispaj.

17 Jinataj maypachachus Jesus ajllasqasninman kayta nerqa, chaypacha watejmanta ashkha runasman kutirikorqa paykunamana nispa:

18 Cheqamanta, cheqamanta niykichis, qhawaychis, diosmanata mañakuykichistaj mana juchaman urmanaykichispaj. Imaraykuchus Satanasqa qankunata munan jap’iyta trigota jina suysusunaykichispaj.

19 Chayrayku Tatamanta mañakunaykichis tiyan ñoqaj sutiypi.

20 Ima cheqa kajtachus Tatamanta mañakunkichis ñoqaj sutiypi, chayta jap’inaykichista creespa, chayta jap’inkcihis.

21 Familiasniykichiswan Tatamanta mañakuychis, ñoqaj sutiypi, warmisniykichis, wawasniykichiswan bendecisqas kanankupaj.

22 Qankunataj sapa kuti tantakunkichis. Amataj uj runatapis jark’ankichischu qankunawan tantakojta. Saqeychis paykuna qankunaman jamojta, amataj jark’aychischu.

23 Paykunapaj Diosmanta mañapunkichis, amataj paykunata qharqoychischu. Sichus sapa kuti qankunaman jamunku chayqa, paykunapaj Tatamanta mañapunkichis ñoqaj sutiypi.

24 Chayrayku k’anchayniykichista oqharikuychis tukuy mundoman k’anchanampaj. Qhawariychis, ñoqa kani chay k’anchayniykichis, mayqentachus oqharinaykichis tiyan — imatachus ñoqata rikuwarqankichis ruwajta. Qankunataj qhawawarqankichis Tatamanta mañakojta, chayta tukuyniykichis qhawawarqankichis.

25 Qhawawarqankichistaj kamachejta mana pipis qankunamanta llojsinaykichistam astawanqa kamacherqaykichis ñoqaman jamunaykichista, llankhanawaykichispaj, rikunawaykichispajtaj; kikillantataj mundopaj ruwankichis. Pitajchus kay kamachiyta p’akin, payqa juchaman urmachikun.

26 Jinataj maypachachus Jesus kaykunata parlayta tukucharqa, chaypacha kutirikorqa yachachisqasninman, mayqenkunatachus pay ajllarqa, paykunaman nerqataj:

27 Cheqamanta, cheqamanta niykichis, ujtawan kamachiykichis, chantá Tatayman ripunay tiyan waj kamachisqasta junt’anaypaj, mayqenkunatachus pay qoearqa.

28 Kunantaj ajinata kamachiykichis, Maypachachus santa cenata jaywankichis, chaypacha ama saqenkichischu pillapis juchapi aychayta, yawarniytawan jap’ejta.

29 Pikunachus juchapi aychayta mikhunku, yawarniyta ujyankutaj, juchachasqa kanankupaj mikhunku, ujyankutaj. Chayrayku yachankichis chayqa, uj runa mana aychayta mikhunampaj jina, mana yawarniyta ujyanampaj jinataj kasqanta chayqa, payta jark’aychis.

30 Chaywampis ama payta qankuna ukhumanta qharqonkichischu, astawanqa payta yachachinkichis, paypaj Diosmanta mañapunkichis, ñoqaj sutiypi. Paychus Diosman kutirikun, sutiypi bautizakunataj chayqa, payta jap’inkichis, payman jaywankichistaj ñoqaj aychayta, yawarniytawan.

31 Paychus mana Diosman kutirikun chayqa, payta jap’inkichis, payman jaywankichistaj ñoqaj aychayta, yawarniytawan.

32 Chaywampis amapuni sinagogasniykichismanta, yupaychana wasisniykichismantawan payta qharqoychischu, imaraykuchus payman yachachinaykichis tiyan. Mana yachankichischu ichapis Diosman kutirikunankuta, ñoqaman jamuspa, junt’a sonqoyoj kaspa, paykunatataj ñoqaqa thañichisaj. Qankunaraykutaj salvakunkuman.

33 Chayrayku qhawaychis, imatachus kamachiykichis chayta, mana juchachasqa kanaykichispaj. Imaraykuchus, ay pimantachus Tata juchachan.

34 Ajinata kamachiykichis qankuna ukhupi phiñanakusqaykichisrayku. Kusikuyniyoj kankichis mana qankuna ukhupi phiñanakuspa.

35 Kunantaj Tataman ripushani imaraykuchus Tataman ripunay tiyan qankunapaj munakuyniyrayku.

36 Jinataj maypachachus Jesus kaykunata parlayta tukucharqa, chaypacha yachachisqasninta makinwan llankharqa, mayqen yachachisqasnintachus pay ajllarqa. ujmanta ujta llankharqa tukuyninkuta llankhanankama. Paykunamantaj parlarqa llankhashaspa.

37 Runastaj mana uyarerqankuchu parlasqanta, chayrayku mana willarqankuchu. Ajllasqasnintaj willarqanku paykunaman atiyta qosqanta Santo Espirituta jap’ichinankupaj. Ñoqataj ujpiwan qhawachisqaykichis kaykuna cheqa kasqankuta.

38 Jinataj Jesus q’alitunkuta llankhasqantawampacha, uj phuyu tukuy runasta tapaykorqa, chayrayku mana Jesusta rikuyta aterqankuchu.

39 Chay phuyu tapaykushajtintaj, Jesus paykunamanta llojserqa, janaj pachaman wicharispa. Ajllasqasnintaj rikusqankurayku willarqanku watejmanta janaj pachaman wicharisqanta.