1 Jinataj payqa kamacherqa escribinankuta Tataj Malaquiasman qosqa nisqanta, imatachus paykunaman willanman. Jinataj chaykunata escribisqankutawampacha chaykunata sut’incharqa. Kayta nerqataj nispa: Ajinata Tata Malaquiasman nerqa — Qhawariy, willajniyta kachasaj, paytaj ñawpaqeypi ñanta wakichenqa. Mask’asqaykichis Señortaj, tratochasqamanta willajpis, pipichus kusikunkichis, payqa ujllata templonman jamonqa. Jamonqa pay, Angelespa Señornin jinata nin.

2 Jina kajtimpis, ¿Pitaj awantanman jamunan p’unchaypi? ¿Pitaj sayarinman rikhurimushajtin? Imaraykuchus payqa allinchajpa ninan jina, p’acha t’ajsajpa jabonnin jinataj.

3 Tiyakonqataj qolqeta allinchaj jina, llimphuchaj jinataj; Levij wawasninta llimphuchanqataj, qori jinata, qolqe jinatataj paykunata llimphuchanqa, allin ruwaypi ofrendata Señorman jaywanankupaj.

4 Chaypachataj Judahj, Jerusalempawan jaywasqanku allin kanqa Señorpaj, unay p’unchaykunapi jina, pasasqa wataspi jinataj.

5 Qankunaman chimpamusqaykichis juzgaj; apuray willajtaj kasaj layqa runaspa contrankuta, qhenchachakojkunajtapis, llanqhalla jurajkunajtapis, mink’asqa runasta mana pagajkunajtapis, mana qosayojta, mana tatayojtawan llakichejkunajtapis, mana rejsisqanta qhesachajtapis, ñoqata mana kasojkunatapis paykunaj contrankupaj kasaj, Angelespa Señornin nin jinata.

6 Imaraykuchus ñoqaqa kani Señor, mana waj jinaman kutinichu; chayrayku qankuna, Jacobpa qhari wawasnin, mana ruphasqaschu kankichis.

7 Tatasniykichispa p’unchayninkunamantapacha kamachisqasniymanta t’aqakunkichis, chaykunata mana junt’ankichischu. Ñoqaman kutirikuwaychis, ñoqataj qankunaman kutirikusaj, Angelespa Señornin jinata nin. Chaywampis ninkichis: ¿Imapi kutirikusajku?

8 ¿Runachu Diosmanta suwanman? Chaywampis qankuna ñoqamanta suwankichis. Tapuwankichistaj: ¿Imapi qanmanta suwarqayku? Diezmospi, ofrendaspitaj suwawasnkichis.

9 Qankuna maldicionwan juchachasqa kankichis, suwawasqaykichisrayku, tukuy kay llajtantimpis.

10 apamuychis tukuy diezmosta pirwaman, mikhuna wasiypi kanampaj. Kaypi qhawawaychistaj, nin Angelespa Señornin, manachus ñoqaqa janaj pachapi kaj ventanasta kicharisaj, qankunaman bendicionta jich’asajtaj mana lugar kanankama chayta jap’inaykichispaj.

11 Qanraykutaj tukuchej runata k’amisaj, paytaj mana tukuchenqachu chajraykej poqoyninkunata. Manataj uvasniykichispis manaraj poqoy tiempopi poqoyninkuta chajrapi qonqankuchu, nin Angelespa Señornin.

12 Tuy llajtastaj bendecisqa sutichasonqachis, sumaj jallp’ayoj kasqaykichisrayku, Angelespa Señornin jinata nin.

13 Parlasqaykichisqa ñoqaj contraypaj sinchi kanku, nin Señor. Chaywampis niwankichis: ¿Ima nerqaykutaj qampa contraykipaj?

14 Nerqankichis: Qhasipaj Diosta sirviy, ¿Imatataj jap’isunman ruwayninta junt’aspari, Angelespa Señornimpa ñawpaqempi phutiyniyoj purispataj?

15 Kunantaj orgulloso kajkunata kusiyniyoj wajyanchis; arí, sajrata ruwajkuna jatunchasqa kanku, Diosmanta iskayrayajkunapis kacharisqas kanku.

16 Chaypacha Señorta kasojkunaqa sapa kuti parlanakorqanku, Señortaj uyarerqa. Paypa ñawpaqempi yuyarina libro escribisqa karqa Señorta kasojkunapaj, Señorpa sutinta yuyajkunapajpis.

17 Maypachachus qorisniyta tantasaj, chay p’unchaypi paykuna ñoqaypata kanqaku, nin Angelespa Señornin. Imaynatachus uj runa kasoj wawanta waqaychan, jinallatataj paykunata waqaychasaj.

18 Chaypacha kutirimunkichis, sumaj ruwajkunata, sajra ruwajkunamanta rejsinkichis, Diosta sirvejkunata, payta mana sirvejkunatataj.