1 Issa kien hemm fil‑liġi ta’ Mosija li kull raġel li kien imħallef tal‑liġi, jew dawk li ġew maħtura biex ikunu mħallfin, kellhom jirċievu l‑ħlas tagħhom skont il‑ħin li jgħaddu jagħmlu ħaqq minn dawk li jinġiebu quddiemhom.

2 Issa jekk xi ħadd kellu jagħti lil ħaddieħor, u hu ma jroddlux lura dak li kellu jagħtih, hu kien jittieħed quddiem l‑imħallef; u l‑imħallef jeżerċita l‑awtorità tiegħu, u kien jibgħat uffiċjali biex dak il‑bniedem ikun jista’ jittieħed quddiemu; u hu kien jagħmel ħaqq minnu skont il‑liġi u l‑evidenzi li kienu jinġabu kontrih, u b’hekk hu kien jiġi mġiegħel irodd lura dak li kellu jagħti, jew jitteħidlu dak li kellu, jew jiġi mkeċċi minn qalb il‑poplu bħala bniedem ħalliel u brigant.

3 U l‑ħlas li l‑imħallef kien jingħata kien ikun skont ħinu—senina tad‑deheb għal ġurnata, jew senum tal‑fidda, li tiswa daqs senina tad‑deheb; u dan skont il‑liġi li ngħatat.

4 Issa dawn huma l‑ismijiet tal‑biċċiet differenti tad‑deheb, u l‑fidda tagħhom, skont il‑valur tagħhom. U l‑ismijiet ġew mogħtija min‑Nefiti, għax ma kinux ikejlu kif kienu jkejlu l‑Lhud li kienu f’Ġerusalemm; lanqas il‑kejl tagħhom ma kien bħall‑kejl tal‑Lhud; iżda huma bidlu l‑kalkolu tagħhom u l‑kejl tagħhom, skont l‑opinjoni u ċ‑ċirkustanzi tal‑poplu, f’kull ġenerazzjoni, sas‑saltna tal‑imħallfin, wara li dawn ġew stabbiliti mis‑sultan Mosija.

5 Issa l‑kejl tagħhom kien hekk—senina tad‑deheb, seon tad‑deheb, sum tad‑deheb, u limna tad‑deheb.

6 Senum tal‑fidda, amnor tal‑fidda, eżrom tal‑fidda, u onti tal‑fidda.

7 Senum tal‑fidda kienet tiswa daqs senina tad‑deheb, u t‑tnejn li huma daqs sea xgħir, kif ukoll daqs sea qamħ ta’ kull għamla.

8 Issa l‑kwantità ta’ seon tad‑deheb kienet id‑doppju tal‑valur ta’ senina.

9 U sum tad‑deheb kienet tiswa d‑doppju ta’ seon.

10 U limna tad‑deheb kienet tiswa daqshom kollha.

11 U amnor tal‑fidda kienet tiswa daqs żewġ senumi.

12 U eżrom tal‑fidda kienet tiswa daqs erba’ senumi.

13 U onti kienet tiswa daqshom kollha.

14 Issa dan hu l‑valur tal‑kejl iż‑żgħir tagħhom—

15 Siblon hija nofs senum; għalhekk, Siblon għal nofs sea xgħir.

16 U siblum hija nofs Siblon.

17 U lija hija nofs siblum.

18 Issa dan hu l‑għadd tagħhom, skont il‑kejl tagħhom.

19 Issa antjon tad‑deheb tiswa daqs tliet sibloni.

20 Issa, l‑uniku għan ta’ dan kollu kien biex huma jimlew bwiethom, għaliex huma kienu jingħataw il‑ħlas tagħhom skont xogħolhom, għalhekk, huwa bdew jinstigaw lin‑nies biex jirvellaw, u jagħmlu kull tip ta’ storbju u ħażen, biex b’hekk ikun jista’ jkollhom aktar xogħol, ħalli jkunu jistgħu jakkwistaw aktar flus skont il‑kawżi li kienu jinġiebu quddiemhom; għalhekk huma bdew jinstigaw lin‑nies kontra Alma u Amuleki.

21 U dan Żeżrom beda jinterroga lil Amuleki u jgħidlu: Lest twieġeb għal xi ftit mistoqsijiet li se nagħmillek? Issa Żeżrom kien raġel espert fl‑istrateġiji tax‑xitan, ħalli b’hekk ikun jista’ jeqred dak kollu li hu tajjeb; għalhekk, huwa qal lil Amuleki: Lest twieġeb il‑mistoqsijiet li jiena se nagħmillek?

22 U Amuleki qallu: Iva, jekk dan iseħħ skont l‑Ispirtu tal‑Mulej, li jinsab fija; għax jien m’jien se ngħid xejn li jmur kontra l‑Ispirtu tal‑Mulej. U Żeżrom qallu: Ara, dawn huma sitt ontijiet tal‑fidda, u dawn kollha jien lest nagħtik jekk inti tiċħad l‑eżistenza ta’ xi Esseru Suprem.

23 Issa Amuleki qal: Ja iben l‑infern, għalfejn qed tipprova ġġarrabni? Ma tafx inti li min hu twajjeb ma jaqax għal dan it‑tip ta’ tiġrib?

24 Temmen inti li m’hemm l‑ebda Alla? Jien ngħidlek, Le, inti taf li hemm Alla, iżda inti tħobb il‑flus aktar minnu.

25 U issa inti gdibt miegħi quddiem Alla. Int lili għidtli—Qed tara dawn is‑sitt ontijiet, li jiswew ħafna, jien lest nagħtihomlok—meta f’qalbek int taf li ma kontx se tagħtihomli; u l‑unika xewqa tiegħek kienet li jiena niċħad lil veru Alla ħaj, biex ikollok raġuni għalfejn teqridni. U issa ara, inti għad trid tħallas għal dan il‑ħażen daqstant kbir.

26 U Żeżrom qallu: Allura inti trid tgħid li hemm Alla veru u ħaj?

27 U Amuleki qal: Iva, hemm Alla veru u ħaj.

28 Issa Żeżrom qal: Hemm aktar minn Alla wieħed?

29 U huwa wieġbu, Le.

30 Issa Żeżrom reġa’ qallu: Allura inti kif taf dawn il‑ħwejjeġ?

31 U huwa qallu: Kien anġlu li għarrafni bihom.

32 U Żeżrom reġa’ qal: Min huwa dak illi għandu jiġi? L‑Iben ta’ Alla?

33 U huwa qallu, Iva.

34 U Żeżrom reġa’ qallu: Allura huwa sejjer isalva lill‑poplu tiegħu fi dnubietu? U Amuleki wieġbu u qallu: Jiena ngħidlek li le, għaliex hija ħaġa impossibbli li huwa jmur kontra kelmtu.

35 Issa Żeżrom qal lin‑nies: Araw li intom tiftakru dawn il‑ħwejjeġ; għax huwa qal li hawn biss Alla wieħed; madankollu huwa qed jgħid li Bin Alla għandu jiġi, iżda mhuwiex se jsalva lill‑poplu tiegħu—bħallikieku hu għandu xi awtorità li jikkmanda lil Alla.

36 Issa Amuleki reġa’ qallu: Ara, li qed tgħid huwa gidba, għax inti qed tgħid li jien tkellimt bħallikieku għandi xi awtorità li nikkmanda lil Alla u dan għax għidt li huwa mhuwiex se jsalva lill‑poplu tiegħu fi dnubietu.

37 U jien ngħidlek għal darb’oħra li hu ma jistax jifdihom fi dnubiethom; għax jien ma nistax niċħad kelmtu, u huwa qal li l‑ebda ħaġa mniġġsa ma tista’ tiret is‑saltna tas‑smewwiet; għalhekk, tistgħu intom issalvaw, jekk ma tirtux is‑saltna tas‑smewwiet? Għalhekk, intom ma tistgħux issalvaw fi dnubietkom.

38 Issa Żeżrom reġa’ qallu: Allura l‑Iben ta’ Alla huwa l‑veru Missier Etern?

39 U Amuleki qallu: Iva, huwa l‑veru Missier Etern tas‑sema u tal‑art, u ta’ dak kollu li hemm fihom; huwa l‑bidu u t‑tmiem, l‑ewwel u l‑aħħar;

40 U huwa sejjer jiġi fid‑dinja biex jifdi lill‑poplu tiegħu; u huwa se jieħu fuqu t‑trasgressjonijiet ta’ dawk li jemmnu f’ismu; u dawn huma dawk li se jkollhom il‑ħajja ta’ dejjem, u ħadd aktar ma jikseb is‑salvazzjoni ħliefhom.

41 Għalhekk il‑ħżiena se jibqgħu daqslikieku ma kien hemm l‑ebda fidwa, ħlief għall‑ħelsien mill‑irbit tal‑mewt; għax ara, għad jasal il‑jum meta kulħadd se jqum mill‑mewt u se jieqaf quddiem Alla, biex isir ħaqq minnu skont għemilu.

42 Issa, hemm mewt li tissejjaħ il‑mewt temporali; u l‑mewt ta’ Kristu sejra tħoll l‑irbit ta’ din il‑mewt temporali, biex kulħadd ikun jista’ jqum minn din il‑mewt temporali.

43 L‑ispirtu u l‑ġisem sejrin jingħaqdu flimkien mill‑ġdid fil‑forma perfetta tagħhom; kemm ir‑riġel u kemm il‑ġog se jerġa’ lura għall‑istruttura tal‑ġisem proprja tiegħu, sewwasew kif aħna bħalissa; u aħna se nittieħdu sabiex nieqfu quddiem Alla, bl‑għarfien li għandna bħalissa, u b’mod mill‑aktar ċar niftakru ħtijietna kollha.

44 Issa din ir‑restawrazzjoni se jgawdi minnha kulħadd, kemm ix‑xiħ u kemm iż‑żgħir, kemm l‑ilsir u kemm il‑ħieles, kemm ir‑raġel u kemm il‑mara, kemm il‑ħażin u kemm it‑twajjeb; u lanqas xagħra waħda minn rashom mhi se tintilef; iżda kollox se jerġa’ lura għall‑istruttura tal‑ġisem naturali tiegħu, kif inhu bħalissa, jew kif inhu fil‑ġisem mortali, u huma se jinġiebu u jitressqu quddiem l‑iżbarra ta’ Kristu, li hu Alla wieħed Għal Dejjem, biex isir ħaqq minnhom skont l‑għemejjel tagħhom, sew jekk kienu tajbin u sew jekk ħżiena.

45 Issa, ara, jien kellimtek dwar il‑mewt tal‑ġisem mortali, kif ukoll dwar il‑qawmien mill‑imwiet tal‑ġisem mortali. Jiena ngħidlek li dan il‑ġisem mortali se jitqajjem għal ġisem immortali, jiġifieri se jitqajjem mill‑mewt, sewwasew mill‑ewwel mewt għall‑ħajja, biex huma ma jmutu qatt aktar; u l‑ispirti tagħhom se jingħaqdu ma’ ġisimhom, u ma jinfirdu qatt aktar; b’hekk il‑ġisem kollu jsir ġisem wieħed spiritwali u immortali, li ma jitħassar qatt aktar.

46 Issa, meta Amuleki temm jgħid dan il‑kliem in‑nies reġgħu bdew jistagħġbu, u Żeżrom beda wkoll jitriegħed. U b’hekk kliem Amuleki ġie fi tmiemu, jew aħjar dan hu dak kollu li kelli x’nikteb.