1 Мөн үүнчлэн, Алма би, Амюлекийг авч мөн яваад, дахин энэ хүмүүст буюу Аммонайха хотод байсан хүмүүст номлохыг Бурханаар зарлигдуулсан учир, улиран тохиох дор намайг тэдэнд номлож эхлэхэд тэд надтай ийн маргаж эхлэв, өгүүлсэн нь:

2 Чи хэн билээ? Бид нэг хүний гэрчлэлд, тэрээр бидэнд дэлхий оршин тогтнохоо болино хэмээн номлож байхад ч гэсэн итгэнэ хэмээн чи бодно уу?

3 Эдүгээ тэд өөрсдийн ярьсан үгсээ ойлгосон нь үгүй; учир нь тэд дэлхий тогтнохоо болино гэдгийг мэдсэнгүй.

4 Мөн тэд түүнчлэн хэлэв: Хэрэв чи энэ агуу хот нэг өдрийн дотор устгагдах болно хэмээн бошиглосон ч бид чиний үгсэд итгэхгүй.

5 Эдүгээ тэд Бурхан тийм гайхамшигт ажлуудыг хийж чаддагийг мэдсэнгүй, учир нь тэд зүрх сэтгэл нь хатуу мөн гөжүүд хүмүүс байв.

6 Мөн тэд хэлэв: Энэ хүмүүсийн дунд тийм агуу бөгөөд гайхамшигт зүйлсийн үнэнийг тэдэнд тунхаглуулахаар нэг хүнээс илүү эрх мэдэлтнийг үл илгээгч, Бурхан гэгч хэн бэ?

7 Мөн тэд надад гар хүрэхээр урагш дөхөв; гэвч болгоогтун, тэд тэгсэнгүй. Мөн би тэдэнд тунхаглахаар зоригтойгоор зогсов, тийм ээ, би тэдэнд зоригтойгоор гэрчилж, хэлсэн нь:

8 Болгоогтун, ай ёс бус мөн тэрс үеийнхэн та нар, эцэг өвгөдийнхөө уламжлалыг та нар хэрхэн мартав; тийм ээ, та нар Бурханы зарлигуудыг хэчнээн хурдан мартав аа.

9 Та нар бидний өвөг болох Лихай, Бурханы мутраар Иерусалимаас гарган авчрагдсаныг санахгүй байна гэж үү? Тэд бүгд аглаг буйд дундуур түүгээр удирдагдсаныг та нар санахгүй байна гэж үү?

10 Мөн тэрээр хэчнээн удаа бидний эцэг өвгөдийг дайснуудынх нь гараас чөлөөлж, мөн тэднийг бүр ах дүүсийнх нь гараар устгагдахаас хадгалан хамгаалсныг ийм хурдан мартсан гэж үү, та нар?

11 Тийм ээ, мөн хэрэв түүний зүйрлэшгүй хүч, мөн түүний нигүүлсэл, мөн бидэнд хандах түүний тэсвэр тэвчээр байгаагүйсэн бол, бид энэ цаг үеэс хамаагүй урьд дэлхийн гадаргуу дээрээс зайлшгүй арчигдах байсан, мөн төгсгөлгүй зовлон мөн гаслангийн байдалд оноогдох нь болзошгүй байх байсан ажгуу.

12 Болгоогтун, эдүгээ тэрээр наманчлахыг та нарт зарлиглаж байна хэмээн би та нарт хэлж байна; мөн та нар наманчлахгүй аваас та нар Бурханы хаант улсыг яасан ч өвлөж чадахгүй. Гэвч болгоогтун, энэ нь бүгд биш—тэрээр та нарт наманчлахыг зарлигласан, эсвээс тэр та нарыг дэлхийн гадаргуу дээрээс бүрмөсөн устгах болно; тийм ээ, тэрээр та нарт уур хилэндээ зочлох болно, мөн догшин хилэнгээ тэрээр орхихгүй байх болно.

13 Болгоогтун, тэрээр Лихайд ярьж: Та нар миний зарлигуудыг сахихынхаа хэрээр уг нутагт дэгжих болно хэмээсэн үгсийг та нар санахгүй байна гэж үү? Мөн үүнчлэн: Та нар миний зарлигуудыг сахихгүй байхынхаа хэрээр Их Эзэний оршихуйгаас тусгаарлагдах болно гэж хэлэгдсэн байдаг билээ.

14 Эдүгээ леменчүүд Бурханы зарлигуудыг сахиагүйнхээ хэрээр, тэд Их Эзэний оршихуйгаас тусгаарлагдаад байгаа гэдгийг та нар санаасай хэмээнэ би. Эдүгээ Их Эзэний үг энэ зүйлд нотлогдож, мөн леменчүүд уг нутаг дахь зөрчлүүдийнхээ эхлэлээс л түүний оршихуйгаас тусгаарлагдаад буйг бид харж байна.

15 Гэсэн хэдий ч би та нарт хэлнэ, хэрэв та нар нүглүүддээ үлдвэл шүүлтийн өдөр тэдний хувьд та нарынхаас илүү тэвчиж болмоор байх болно, тийм ээ, мөн та нар наманчлахаас бусдаар бол, бүр энэ амьдралд ч тэдний хувьд та нарынхаас илүү тэвчиж болмоор байх болно.

16 Учир нь леменчүүдэд өгөхөөр сунгагдсан олон амлалт байдаг; учир нь тэдний эцэг өвгөдийн уламжлалуудын улмаас тэд үл мэдэх байдалд үлдэхэд хүрчээ; тиймийн тул Их Эзэн тэдэнд нигүүлсэнгүй хандаж мөн уг нутагт тэдний оршихыг нь уртасгах болно.

17 Мөн тэд хэзээ нэгэн цагт түүний үгсэд итгэхэд, эцэг өвгөдийнх нь уламжлалууд нь зөв бус гэдгийг мэдэхэд авчрагдана; мөн тэдний олон нь аврагдах болно, учир нь Их Эзэн өөрийнх нь нэрийг дууддаг тэд бүгдэд нигүүлсэнгүй хандах болно.

18 Гэвч болгоогтун, хэрэв та нар ёс бус байдалдаа хэвээр үлдвэл энэ нутаг дахь та нарын өдрүүд уртасгагдах нь үгүй гэдгийг би та нарт хэлнэ, учир нь леменчүүд та нарын дээр илгээгдэх болно; мөн хэрэв та нар наманчлахгүй аваас тэд та нарын мэдээгүй үед чинь ирэх болно, мөн та нар бүрмөсөн устгагдах устгалаар зочлогдох болно; мөн энэ нь Их Эзэний догшин хилэнгийн дагуу байх болно.

19 Учир нь алдастаа амьдраад өөрийнх нь хүмүүсийг устгахыг тэрээр та нарт үл зөвшөөрөх болно. Би та нарт хэлнэ, Үгүй; Их Эзэн Бурханаас нь тийм их гэрэл мөн тийм их мэдлэг тэдэнд өгөгдсөний дараа, тэд нүгэлд мөн зөрчилд унана гэж байх аваас, тэрээр Нифайн хүмүүс гэж нэрлэгдсэн өөрийнх нь бүх хүнийг устгахыг леменчүүдэд зөвшөөрөх нь дээр гэж үзэх болно;

20 Тийм ээ, Их Эзэний их тааллыг хүртсэн хүмүүс байсны дараа; тийм ээ, бусад бүх үндэстэн, ястан, хэлтэн болон ард түмнээс илүүтэйгээр тааллыг хүртсэний дараа; өөрсдийнх нь хүсэл, өөрсдийнх нь итгэл, мөн залбирлуудын дагуу, байсан, байгаа, мөн байх тэдгээр бүх зүйл өөрсдөд нь мэдүүлэгдсэний дараа;

21 Бурханы Сүнсээр зочлогдсоны; тэнгэр элч нартай ярилцсаны дараа, мөн Их Эзэний дуу хоолой өөрсдөд нь ярьсны дараа; мөн бошиглолын суу билиг, илчлэлийн суу билиг, мөн түүнчлэн олон бэлэг, хэлнүүдээр ярих бэлэг, номлох бэлэг, мөн Ариун Сүнсний бэлэг, мөн орчуулгын бэлгийг авсны дараа;

22 Тийм ээ, Их Эзэний мутраар Иерусалим нутгаас Бурханаар гаргагдсаны дараа; өлсгөлөнгөөс, мөн өвчнүүдээс, мөн бүх төрлийн зүйл бүрийн эмгэгээс аврагдсаны дараа; мөн тэд устгагдахгүй байж болохын тулд тулаанд хүчтэй болсны дараа; цагаас цагт боолчлолоос гарган авчрагдсаны дараа, мөн эдүгээг хүртэл хамгаалагдаж мөн хадгалагдсаны дараа; мөн тэд бүх төрлийн зүйлээр баян болтлоо дэгжээгдсэний дараа—

23 Мөн эдүгээ болгоогтун би та нарт хэлнэ, хэрэв Их Эзэний мутраас ийм олон адислалыг хүлээн авсан энэ хүмүүс, тэдэнд байх гэрэл мөн мэдлэгийн эсрэг зөрчил үйлдэх аваас, би та нарт хэлнэ, хэрэв энэ байдал тохиовол, хэрэв тэд зөрчилд унах аваас, тэднийг бодвол леменчүүдийн хувьд илүү тэвчиж болмоор байх болно.

24 Учир нь болгоогтун, Их Эзэний амлалтууд леменчүүдэд өгөгдөхөөр сунгагдсан байдаг, гэвч хэрэв та нар зөрчил үйлдвэл тэдгээр нь та нарт хүртээлгүй; учир нь хэрэв та нар түүнийг эсэргүүцвэл та нар дэлхийн гадаргуу дээрээс бүрмөсөн устгагдах болно хэмээн Их Эзэн тодорхойгоор амлаж мөн чандлан тогтоосон биш гэж үү?

25 Мөн эдүгээ та нар устгагдахгүй байж болох энэхүү шалтгааны учир, Их Эзэн өөрийн хүмүүсээс олонд нь зочлуулахаар тэнгэр элчээ илгээж, мөн тэд явж мөн энэ хүмүүст хүчтэйгээр ийн хашхирах ёстой хэмээн тэдэнд зарласан болой, өгүүлсэн нь: Наманчлагтун та нар, учир нь тэнгэрийн хаант улс ойрхон байна;

26 Мөн үүнээс олон бус өдрийн дараа Бурханы Хүү сүр жавхландаа ирэх болно; мөн түүний алдар суу нь ач ивээл, тэгш эрх, мөн үнэнээр дүүрэн, тэвчээр, нигүүлсэл, мөн тэсвэрээр дүүрэн, өөрийн хүмүүсийн гуйлтыг сонсохдоо мөн тэдний залбирлуудад хариулахдаа түргэн, Эцэгийн Төрсөн Ганцын алдар суу байх болно.

27 Мөн болгоогтун, тэрээр өөрийнх нь нэрэнд итгэх итгэлээр наманчлалын төлөө баптисм хүртэх тэднийг гэтэлгэхээр ирэх болно.

28 Тиймийн тул, та нар Их Эзэний замыг бэлтгэцгээ, учир нь бүх хүмүүн өөрсдийн ажлын шагналыг хадан авах тэр цаг ойрхон байна, тэдгээр нь ямар байсны дагуу—хэрэв тэдгээр нь зөв шударга байсан бол тэд Есүс Христийн хүч мөн чөлөөлөлтийн дагуу, сүнсэндээ авралыг хадан авах болно; мөн хэрэв тэдгээр нь хилэнцэт байсан бол тэд чөтгөрийн хүч мөн боолчлолын дагуу, бодгальдаа ялыг хадан авах болно.

29 Эдүгээ болгоогтун, энэ бол хүмүүст хашхирах тэнгэр элчийн захиас билээ.

30 Мөн эдүгээ, хайрт ах дүү нар минь, учир нь та нар миний ах дүүс, мөн та нар хайрт гэгдвэл зохино, мөн та нар наманчлалд нийцэх тэр үйлүүдийг гаргавал зохино, яагаад гэвэл та нарын зүрх сэтгэл Бурханы үгийн эсрэг дэндүү хатуурсан байна, мөн та нар алдагдсан мөн унасан хүмүүс байгаа учир болой.

31 Эдүгээ улиран тохиох дор Алма намайг эдгээр үгийг ярихад, болгоогтун, өөрсдөд нь тэд бол хатуу зүрх сэтгэлтэй мөн гөжүүд хүмүүс хэмээн хэлсний учир уг хүмүүс надад хилэгнэсэн бөлгөө.

32 Мөн түүнчлэн би өөрсдөд нь тэд бол алдагдсан мөн унасан хүмүүс байсныг хэлсэн учир тэд надад уурлаж, мөн тэд намайг шоронд хаяж болохын тулд надад гар хүрэхийг оролдов.

33 Гэвч улиран тохиох дор Их Эзэн тэр цагт намайг барьж мөн шоронд хийхийг тэдэнд зөвшөөрсөнгүй.

34 Мөнхүү улиран тохиох дор Амюлек явж мөн урагшлан зогсож, мөн түүнчлэн тэдэнд номлож эхлэв. Мөн эдүгээ Амюлекийн үгс бүгд бичигдээгүй, гэсэн хэдий ч түүний үгсийн нэг хэсэг нь энэ номд бичиглэгдсэн болой.