11 Capítulo
Macanajuicuna, ninanda fiñarishpa rimarinacuna, na ali ruraicuna mishan Jareditacunapaj causaita—Achil villachijcuna yachachin Jareditacunapaj tucuilla tucurinata imashpapash paicuna arrepentirijllapi na—Llactapuracuna achil villachijcunapaj shimicunata na cazun.
1 Compaj punllacunapi tauca achil villachijcuna shamurca, achil villachirca tucurinata chai jatun llactapuracunata imashpapash paicuna arrepentirijllapi na, Apunchijman tigrarijpi, paicunapaj huañuchicunata, na ali ruraicunatapash saquishpa.
2 Yalishca jipa llactapuracuna achil villachijcunata na cazurca, paicuna calparca Compaman huacaichiringapa, imashpa llactapuracuna paicunata tucuchingapa munarca.
3 Paicuna achil villachirca Comman tauca cuzascunata; pai achilyachishca carca paipaj tucui puchu punllacunapi.
4 Pai causarca ali rucuyangacaman, charircapash Shiblomda; Shiblom paipaj pushtupi reinarca. Shiblompaj huauqui na cazurca, callarirca shuj ninan jatun macanajuita tucui alpapi.
5 Yalishca jipa Shiblompaj huauqui huañuchichirca tucui achil villachijcunata maijan achil villachirca llactapuracunapaj tucurinata;
6 Jatun llaqui tiarca tucui alpapi, testificashca carca shuj jatun llaqui shamuna alpa jahuaman, llactapuracunapaj jahuamanbash, tiagrijta shuj ninan tucuri paipuracunapi, imaurapash alpa jahuapi na tiashcashna, paicunapaj tullucuna canga alpa tandachishcashna alpa jahuallapi imashpapash paicuna arrepentirijllapi paicunapaj na ali ruraicunamanda.
7 Paicuna na uyarca Apunchijpaj shimita, paicunapaj na ali rurai tandanajushcacunamanda; chaimanda, tiai callarirca macanajuicuna, randimanda plituricuna tucui alpapi, tauca ninan yarjaicunapash, jatun unguicunapash, shinashpa tiarca shuj jatun tucuri, imaurapash cai alpa jahuallapi na yachashca; tucui caicuna yalirca Shiblompaj punllacunapi.
8 Llactapuracuna arrepentiri callarirca paicunapaj na ali ruraicunamanda; shinashpa imashna paicuna rurarca Apunchijca paicunata shungumanda llaquirca.
9 Yalishca jipa Shiblom huañuchi tucurca, Set apamushca carca huatashcashnaman, huatashcashnapi causarca tucui paipaj punllacunata.
10 Yalishca jipa Ahah, paipaj churi, reinota chasquirca; pai reinarca llactapuracunata tucui paipaj punllacunata. Pai rurarca tucui laya na ali ruraicunata paipaj punllacunapi, caihuan ashtaca yahuarta jichachirca; paipaj punllacuna ashalla carca.
11 Etem, Ahahpaj cati aillu cashpa, reinota chasquirca; paipash rurarca na ali ruraicunata paipaj punllacunapi.
12 Yalishca jipa Etempaj punllacunapi shamurca tauca achil villachijcuna, llactapuracunaman cutin achil villachirca; ari, paicuna achil villachirca Apunchij tucuillata tucurinata cai alpa jahuallamanda imashpapash paicunapaj na ali ruraicunamanda arrepentirijllapi na.
13 Yalishca jipa llactapuracuna shinlliyachirca paicunapaj shungucunata na uyanayachirca paicunapaj shimicunata; achil villachijcuna llaquirirca anchurircapash llactapuracunapamanda.
14 Yalishca jipa Etem rurarca ricushpa chasquichinata na ali ruraicunapi paipaj punllacuna; charirca Morónda. Yalishca jipa Morón reinarca paipaj pushtupi; Morón rurarca ima na alicunata Apunchijpaj ñaupapi.
15 Yalishca jipa jatarirca shuj na cazuicuna llactapuracunapi, pacalla tandanajunacunamanda ima carca shayachishca ushaita charingapa, charijyangapapash; jatarirca shuj shinlli runa paipuracunapi na ali ruraicunapi, Morónman macanajuita curca, maipi chaupi reinota misharca; pai charirca chaupi reinota tauca huatacunata.
16 Yalishca jipa Morón misharca, cutin reinota chasquirca.
17 Yalishca jipa jatarirca cutishuj shinlli runa; pai carca Jaredpaj huauquipaj cati aillu.
18 Yalishca jipa pai misharca Morónda reinota chasquircapash; chaimanda, Morón causarca huatashcashnapi tucui paipaj puchu punllacunata; pai charirca Coriantorta.
19 Yalishca jipa Coriantor causarca huatashcashnapi tucui paipaj punllacunata.
20 Coriantorpaj punllacunapi tauca achil villachijcuna shamurca, achil villachirca jatun, juyailla cuzascunamanda, yachachirca arrepentimientota llactapuracunaman, imashpapash paicuna arrepentirijllapi Apunchij Dios ruranga ricushpa chasquichinata paicunapaj contra tucuilla tucuchingacaman;
21 Apunchij Dios canchanga nacashpa apamunga cutishuj llactapuracunata cai alpata chasquichun, paipaj ushaihuan, cai laya imahuan pai apamurca paicunapaj taitacunata.
22 Paicuna na cazurca achil villachijcunapaj tucui shimicunata, paicunapaj pacalla tandanajushpa causaicunamanda, na ali rurai millanayaicunamandapash.
23 Yalishca jipa Coriantor charirca Éterta, pai huañurca, causashpa huatashcashnapi tucui paipaj punllacunata.