4 Capítulo
Moroni mandai tucushca can sellachun Jaredpaj huauqui quilcashcacunata—Caicuna na achil ricuchishca canga imaura runacuna Jaredpaj huauqui laya feta charingacaman—Cristo mandan runacunata paipaj shimicunapi crichun maijan paipaj discípulocunata—Runacuna mandai tucushca can arrepentirichun, crichun quishpiringapa villaicunata, quishpirichunbash.
1 Apunchij Jaredpaj huauquita mandarca uriajumuchun urcumanda Apunchijpaj ñaupamanda, quilcachun cuzascunata imata pai ricushca carca; caicuna na saquishca can cuchun runacunapaj huahuacunaman pai cruzpi vichai alsai tucushca jipacaman; caimanda jatun mandaj Mosíah alichirca, caicuna na cushca canga cai pachaman Cristo cai llactapuracunapaman ricurimushca jipacaman.
2 Cristo ciertopacha paipaj llactapuracunaman ricurimushca jipa mandarca caicuna ricuchishca cachun.
3 Cunan, cai jipa, tucuilla na crishpa asha asha chingarirca; pipash na tian ashtahuangari Lamanitacunalla, paicuna na cazushca Cristopaj quishpiringapa villaicunata; chaimanda ñucata mandashca caicunata alpapi cutin pacachun.
4 Riqui, ñuca quilcashcani cai jirru fangacunapi ashalla cuzascunata imata Jaredpaj huauqui ricurca; nimaura na tiashca cashna jatun cuzascuna Jaredpaj huauquiman ricuchishca.
5 Chaimanda Apunchij mandahuarca caicunata quilcachun; ñuca quilcashcani. Pai mandahuarca caicunata sellachun; pai mandahuarcapash sellachun yalichishcacunata; chaimanda ñuca sellashcani yalichinacunata imashna Apunchijpaj rurachunbacha saquishcahuan.
6 Apunchij nihuarca: Caicuna na ringachu Gentilcunapaman imaura paicunapaj na ali ruraicunamanda arrepentiringacaman, mapa illa tigrangacaman Apunchijpaj ñaupapi.
7 Chai punllapi ñucapi feta churajpi Apunchij nin, imashna Jaredpaj huauqui rurarca, ñucapi achilyachun, shina ñuca ricuchisha cuzascunata imata Jaredpaj huauqui ricurca, paicunaman yachaj chayachingacaman tucui ñucapaj achil ricuchicunata, nin Jesucristo, Diospaj Churi, Taita jahua pachacunapaj, cai pachapaj, tucui cuzascuna caicunapi tian.
8 Maijan fiñanajun Apunchijpaj shimipaj contra, llaquichishca canga; maijan cai cuzascunata negan, llaquichishca canga; paicunaman jatun cuzascunata na ricuchisha, Jesucristo nin; ñuca cani pimi parlani.
9 Ñuca mandajpi jahua pachacuna pascashca can, vichashcapash can; ñuca shimihuan alpapash chujchunga; ñuca mandajpi causanajujcuna yalinga, ninahuanshna.
10 Maijan ñuca shimicunata na crijca ñuca discípulocunata na cringa; ñuca na parlajpica, ricushpa chasquichi; imashpa chai tucuri punllapi canguna yachanguichi cai can ñuca parlashca.
11 Ashtahuangari maijan cai cuzascunapi crin imata ñuca parlashcani, paita ricuj shamusha ñuca Espíritupaj ricuchicunahuan, pai yachanga testimoniota cungapash. Ñuca Espíritumanda pai yachanga cai cuzascuna ciertopacha can; imashpa cai cumbidan runacunata alita rurachun.
12 Ima cuzas runacunata cumbidan alita rurachun ñucapaj can; alica na pipamandapash shamun ashtahuangari ñucapaj can. Ñucallata cani pimi runacunata pushani tucui aliman; maijan ñuca shimicunata na crin ñucata na cringa—Ñuca cajta; maijan ñucata na cringa Taitata na cringa pimi ñucata cachamuhuarca. Riqui, ñuca cani Taita, ñuca cani micha, causaipash, cai pachamanda ciertopachapash.
13 Shamuichi ñucapaman, Oh Gentilcuna, ñuca ricuchisha cangunaman jatun cuzascunata, yachaita imami pacashca can na crimanda.
14 Shamuichi ñucapaman, Oh Israelpaj huasi, cai ricuchishca canga mashna jatun cuzascunata Taita alichishca cangunaman, cai pachata rurashcamanda; cai na cangunapaman shamushca, na crimanda.
15 Riqui, imaura canguna anchuchinguichi chai na crina velota ima cangunata charin na ali rurana manllanayai canapi, shungucunapaj shinlli, yuyaicunapaj ñausa, shina jatun, juyailla cuzascuna imata cangunapamanda pacashca cashca cai pachata rurashcamanda—ari, imaura Taitata mañanguichi ñuca shutipi, shuj faquirishca shunguhuan shuj cazuj amujlla espírituhuan, shinashpa yachanguichi Taita yarijta conveniota imata pai rurarca cangunapa taitacunaman, Oh Israelpaj huasi.
16 Shina ñuca achil ricuchishcacuna yachaj chayachishca canga tucui llactapuracunapaj ñavicunapi imata ñuca quilcachishcani ñuca sirvij runa Juanda. Yarichi, imaura ricushpa cai cuzascunata, yachanguichi punlla caipi can imaura ciertopacha ricuchishcapacha canga.
17 Chaimanda, imaura cai tandachishpa quilcashcata chasquishpa yachanguichi Taitapaj rurai callarishca can tucui alpa jahuallapi.
18 Chaimanda, arrepentirichi tucui alpa tucurinacaman, ñucapaman shamuichi, ñuca quishpiringapa villaicunapi crichi, bautizarichi ñuca shutipi; maijan crin, bautizarin quishpirishca canga; ashtahuangari maijan na crin llaquichi tucushca canga; señalcunapash catinga maijan crijta ñuca shutipi.
19 Achilyachishca can maijan fielta tarishca ñuca shutipi chai tucuri punllapi, pai vichai alsashca canga causachun paiman preparashca reinopi cai pachata rurashcamandapacha. Riqui ñuca cani pimi parlashcani. Shinacapashcachun.