2 Capítulo
Jareditacuna prepararin ringapa cushapacha nishca pambaman—Cai can shuj ajllashca alpa maipi runacuna Cristota sirvinapacha nacashpa tucuchishca canga—Apunchij parlan Jaredpaj huauquihuan quimsa horascunata—Jareditacuna ruran barcocunata—Apunchij tapun Jaredpaj huauquita ima laya barcocuna punchayachishca canata nichun.
1 Yalishca jipa Jared paipaj huauquipash, paicunapaj aillucunapash, Jaredpaj ali rijsicunapash, paipaj huauqui paicunapaj aillucunapash, urai rirca pugru alpaman cai carca vichaipi, (pugru alpapaj shuti carca Nimrod, ninan cazadorpaj shutimanda japishca) paicunapaj ataju llamacunahuan imata paicuna tandachirca, jari, huarmi, tucui laya.
2 Paicuna trampacunata churarca japingapa jahuata rij alas-huan aminalcunata; prepararcapash shuj vasijata, caipi paicunahuan aparca yacucunamanda pijicunata.
3 Paicuna aparcapash paicunahuan deseret, cai shuj shimiman tigrachishpa can mishqui balun; shina aparca paicunahuan ashtacapacha mishqui chuspicunata, tucui laya ima cai alpa jahuapi tiajta, tucui laya muyucunata.
4 Yalishca jipa imaura paicuna urai shamujpi Nimrodpaj pugru alpaman Apunchij urai shamurca parlarcapash Jaredpaj huauquihuan; pai carca shuj fuyupi, Jaredpaj huauqui na ricurcachu.
5 Yalishca jipa Apunchij paicunata mandarca richun jichushca pambaman, ari, chai pushtuman maipi maijan runa nimaurapash chaipi cashcapi. Yalishca jipa Apunchij paicunata ñaupashpa rirca, paicunahuan parlarca imashna shuj fuyupi cashpa, curcapash ricuchicunata maita paicuna rinata.
6 Yalishca jipa paicuna purirca jichushca pambapi, rurarca barcocunata, imapi paicuna huambushpa rirca acha yacucunata, ricuchishca cashpa catilla Apunchijpaj maquihuan.
7 Apunchij na saquirca caru jatun mama cocha jichushca pambapi, ashtahuangari pai munarca paicuna shamuchun cushapacha nishca alpacaman, ima carca ajllashca tucui cutishuj alpacunamanda, imata Apunchij Dios alchishpa charishca carca alita ruraj llactapuracunaman.
8 Pai jurashca carca paipaj fiñaipi Jaredpaj huauquiman, maijanguna chasquin cai cushapacha nishca alpata, chaimandapacha mana tucurinacaman, paita sirvina carca, ciertopacha shujlla Diosta, nacashpa paicuna tucurishca canga imaura paicuna jahuapi tucuilla paipaj fiñai urmajpi.
9 Cunan, ñucanchi ricui ushanchi Diospaj mandashcacunata cai alpamanda, chai can shuj cushapacha nishca alpa; maijan jatun llacta charishpa Diosta sirvinga, nacashpa paicuna tucuringa imaura paipaj tucuilla fiñai paicunapaj jahuaman shamujpi. Paipaj tucuilla fiñai paicunapaj jahuaman shamunga imaura na ali ruraicunapi fucujpi.
10 Riqui, cai can shuj alpa ima ajllashca can tucui cutishuj alpacunamanda; chaimanda maijan japin caita Diosta sirvinga nacashpa tucuringa; cai can mana tucurina Diospaj mandashca. Cai na cangachu, imaura na alita ruraicuna jundangacaman alpapaj huahuacunapi, chaicuna tucuchishcacuna can.
11 Cai shamun cangunapaman, Oh Gentilcuna, yachachun Diospaj mandashcacunata—arrepentiringuichi, ama catinguichi cangunapaj na ali ruraicunapi imaura jundangacaman, ama shamuchinguichi tucuilla Diospaj fiñaita cangunapaj jahuaman imashna cunangaman alpapi causajcuna rurashca.
12 Riqui, cai can shuj ajllashca alpa, maijan jatun llacta charinga cai canga libre esclavitudmanda, huatai tucushcashnamanda, tucui cutishuj jatun llactacunamanda jahua pacha ucumanda, paicuna sirvishpalla alpapaj Diosta, pimi can Jesucristo, pimi ricurimushca can cuzascunamanda ima quilcashcanchi.
13 Cunan ñuca catini ñuca tandachishca quilcaihuan; riqui, yalishca jipa Apunchij apamurca Jaredta paipaj huauquitapash cai jatun jatun mama cochacaman ima alpacunata chaupin. Jatun mama cochaman chayamushpa paicunapaj facha huasicunata shayachirca; paicuna shutichirca chai pushtuta Moriáncumer; paicuna facha huasicunapi causarca, causarca facha huasicunapi jatun cocha manñapi chuscu huatacunata.
14 Yalishca jipa chuscu huatacuna tucuripi Apunchij cutin shamurca Jaredpaj huauquipaman, shayarirca shuj fuyupi paihuan parlarcapash. Quimsa horascunata Apunchij parlarca Jaredpaj huauquihuan, tacuri tucurca pai na yarishcamanda Apunchijpaj shutita mañanata.
15 Jaredpaj huauqui arrepentirirca na alita rurashcamanda imata pai rurashca carca, mañarca Apunchijpaj shutipi paipaj huauquicunamanda picuna paihuan carca. Apunchij paita nirca: Ñuca perdonasha quiquinba, quiquinba huauquipaj juchacunatapash; ashtahuangari ama ashtahuan juchata rurai, yarina canguichi ñuca Espíritu na punllan punllan runahuan macanajungachu; chaimanda, canguna juchata rurashpaca imaura canguna fucushcapacha canguichi canguna anchuchi tucushca canguichi Apunchijpaj ñaupamanda. Caicuna can ñuca yuyaicuna alpamanda imata ñuca cusha cangunaman cangunapaj chasquishca cachun; cai canga shuj ajllashca alpa tucui cutishuj alpacunamanda.
16 Apunchij nirca: Trabajai callarichi, ruraichipash barcocunata imashna cunangaman rurashcanguichi. Yalishca jipa Jaredpaj huauqui trabajai callarirca, paipaj huauquipash, rurarca barcocunata imasha paicuna rurashca layata, Apunchijpaj villashcacunahuan. Uchillacuna carca, fangalla carca yacu jahuapi, imashna alas-huan jahuata rijcuna yacu jahuapi.
17 Caicuna rurarirca ninan quimishca laya, shina yacuta chari ushaj shuj vaso laya; ucu lado ninan quimishca carca vasoshna; ladocunapash shinallata quimishca carca shuj vasoshna; tucuricuna filolla carca; jahuapash quimishca carca shuj vasoshna, largo carca shuj quirushna; caipaj pungu, vicharijpi, quimirishca carca shuj vasoshna.
18 Yalishca jipa Jaredpaj huauqui mañarca Apunchijta, nishpa: Oh Apunchij, ñuca rurashcani imata quiquin mandahuashcata, ñuca rurashcani barcocunata imashna quiquin yachachihuashcangui.
19 Riqui, Oh Apunchij, caicunapi na micha tian; maimanshi ñucanchi rishunchi? Ñucanchi huañushunbash, caicunapi ñucanchi na samaita aisaita ushashun, ashtahuangari chaipi tiaj samaitalla; chaimanda ñucanchi huañushun.
20 Apunchij nirca Jaredpaj huauquita: Riqui, rurai shuj utujuta jahuapi, ucu ladomanbash; imaura samai illarijujpi utujuta pascangui, samaita chasquinguichi. Imashpapash yacu yaicujpi, riqui, utujuta vichangui, canguna ama huañunguichi yacu jundajpi.
21 Yalishca jipa Jaredpaj huauqui rurarca shina, imashna Apunchij mandashca laya.
22 Pai cutin mañarca Apunchijta nishpa: Oh Apunchij, riqui ñuca rurashcani imashna quiquin mandahuashcangui; ñuca preparashcani barcocunata ñuca llactapuracunaman, riqui caicunapi na micha tian. Riqui, Oh Apunchij, saquigringuichu ñucanchi yalichun cai jatun yacuta yanapi?
23 Apunchij nirca Jaredpaj huauquita: Imata munangui ñuca rurachun michata charichun cangunapaj barcocunapi? Riqui, ventanacunata na chari ushanguichichu, pedazocuna tucunga; ninatapash cangunahuan na apanguichichu, na ringuichichu ninapaj michahuan.
24 Riqui, canguna canguichi ballena laya jatun mama cocha chaupipi; ninan jatun caiman chaiman cuyuchijcuna cangunapaman huajtamunga. Shina cajpipash, ñuca cangunata cutin llujchisha jatun mama cocha ucu ucumanda; huairacuna ñuca shimimanda llujshishca, tamiacunapash, yacu jundaicunapash ñuca cachamushcani.
25 Riqui, ñuca preparani cai cuzascunapaj contra; na yali ushanguichi cai jatun ucu ucuta imashpapash ñuca cangunata preparajpilla jatun mama cochapaj caiman chaiman cuyujcunapaj contra, huairacuna llujshishcacuna, yacu jundaicuna ima shamunga. Chaimanda imata munanguichi cangunaman preparachun, michata charichun imaura canguna pambai tucujpi jatun mama cochapaj ucu ucupi?