1 Cunan ñuca, Moroni, catini tucuchingapa ñuca quilcashcata llactapuracunapaj tucurinamanda maijancunamanda ñuca quilcajushcani.

2 Riqui, paicuna na cazurca tucui Éterpaj shimicunata; pai ciertopacha nirca paicunaman tucui cuzascunamanda, runapaj callarimanda; cai alpa jahuallamanda yacucuna anchurishca jipa cai tigrarca shuj ajllashca alpaman tucui cutishuj alpacunamanda yali, shuj ajllashca alpa Apunchijpaj; chaimanda Apunchij munan paita sirvichun tucui runacuna picuna causan cai jahuallapi;

3 Cai carca Mushuj Jerusalénpaj pushtu, cai jahua pachamanda uriajumunga, Apunchijpaj achil pushtu.

4 Riqui, Éter ricurca Cristopaj punllacunata, pai parlarca shuj Mushuj Jerusalénmanda cai alpapi.

5 Pai parlarcapash Israelpaj huasimandapash, Jerusalénmanda maimanda Lehi shamugrijta—cai tucurishca jipa cutin cai shayachishca canga, shuj achil llacta Apunchijpa; chaimanda, cai na shuj mushuj Jerusalén caita ushan punda punllapi tiashca caimanda; ashtahuangari cutin shayachishca canga, Apunchijpaj shuj achil llactaman tigranga; cai shayachishca canga Israelpaj huasipa—

6 Chai Mushuj Jerusalén shayachishca canga cai alpapi, Josépaj puchu cati aillucunapa, cai cuzascunapa tiashca shuj ricuhi.

7 Imashna José paipaj taitata aparca Egipto alpaman, shina pai chaipi huañurca; chaimanda, Apunchij apamurca shuj Josépaj puchu cati aillucunata Jerusalénpaj alpamanda llujchishpa, pai shungumanda llaquingapa Josépaj cati aillucunata paicuna ama huañuchun, imashna pai shungumanda llaquishca carca Josépaj taitata shinamanda pai na huañurca.

8 Chaimanda, Josépaj huasipaj puchu shayachishca canga cai alpapi; cai canga shuj alpa paicunapaj chasquinapacha; paicuna shayachinga shuj achil llactata Apunchijpa, rucu Jerusalén laya; paicuna ashtahuan na pandachishca cangachu, tucuri chayamungacaman, imaura alpa yalishca saquirijpi.

9 Tianga shuj mushuj jahua pacha, shuj mushuj alpa; pundacunashnallata canga, rucu cuzascuna tucurishca canga, tucui cuzascuna mushujman tigrashca canga.

10 Shina shamun Mushuj Jerusalén; achilyachishca can maijanguna chaipi causan, cai can maijanba churajunacuna yurajyachishca can Llamagupaj yahuarhuan; paicuna can yupai tucushca Josépaj puchu cati aillucunapi, picuna carca Israelpaj huasi.

11 Shina shamunga rucu Jerusalénpash; chaipi causajcuna, achilyachishca can, tajshashcacuna can Llamagupaj yahuarpi; paicuna can maijanguna caiman chaiman chajchurishca, tandachishca alpamanda chuscundi ladocunamanda, vichai llactacunamanda, conveniopaj pactachita chasquijcuna imata Dios rurarca paicunapaj taitahuan, Abraham.

12 Imaura cai cuzascuna shamujpi, yalichun apamunga achil quilcashcacuna ima nin, tianga maijan callaripi cashcacuna, jipa canga; maijan jipa cashca, callaripi canga.

13 Ñuca ña ashtahuan quilcagrijurcani, ashtahuangari na saquihuarca; ashtahuangari jatun, juyailla carca Éterpaj achil villashcacuna; ashtahuangari nimapi churashpa, paita calpachirca; pai pacajurca punlla shuj rumi utujupi, tuta pai llujshirca ricungapa cuzascunata ima llactapuracunapaj jahuaman shamunata.

14 Shuj rumi utujupi causajujpi pai yarirca cai quilcashcata, ricushpa tucuricunata ima llactapuracunapa jahuaman shamurca, tutapi.

15 Yalishca jipa chai huatallata imaura pai shitashca carca llactapuracunapi tiai callarirca shuj jatun macanajui llactapuracunapi, tiarca taucacuna picuna jatarirca, shinlli runacuna carca, ricurcapash Coriántumr tucurita paicunapaj pacalla na ali ruraicunamanda, imamanda parlashcani.

16 Cunan Coriántumr, yachajushca cashpa, paimandallata, tucui imashna macanajunacunata, tucui cai pachapaj na alipa yachashca, chaimanda pai macanajurca maijan paita tucuchingapa munajcunahuan.

17 Ashtahuangari pai na arrepentirirca, paipaj juyailla churicuna, ushicunapash; Cohorpaj juyailla churicuna, ushicunapash; Corihorpaj juyailla churicuna, ushicunapash; tucuripipash, na tiarca nipipash juyailla churicuna, ushicunapash tucui alpa jahuallapi maijan arrepentirij paicunapaj juchacunamanda.

18 Chaimanda, yalishca jipa callari huata Éter causarca shuj rumi utujupi, tiarca tauca llactapuracuna picuna huañushca carca chai pacalla tandanajucunapaj espadacunahuan, macanajushpa Coriántumrpaj contra reinota mishangapa.

19 Yalishca jipa Coriántumrpaj churicuna ashtacata macanajurca, ashtacata yahuarta jicharca.

20 Cati huatapi Apunchijpaj shimi Éterpaman shamurca, pai richun achil villachichun Coriántumrman, pai arrepentirijpica, tucui paipaj aillucunapash, Apunchij reinota paiman cunga, llactapuracunatapash perdonanga—

21 Nacashpaca paicuna tucuchishca canga, tucui paipaj aillucunapash pailla na. Pai cashcalla causanga achil villachishcacuna pactajta ricungapa imata parlashca cashca cutishuj llactapuracunamanda chasquijrijta alpata paicunapaj chasquinapacha cachun; Coriántumr paicunahuan pambai tucunga; tucui alma tucuchishca canga Coriántumrlla na.

22 Yalishca jipa Coriántumr na arrepentirirca, paipaj aillucunapash na, llactapuracunapash na; macanajuicuna na tucurirca; paicuna Éterta huañuchingapa munarca, ashtahuangari pai calparca paicunapaj ñaupamanda cutin pacajurcapash rumi utujupi.

23 Yalishca jipa Shared jatarirca, paipash Coriántumrhuan macanajurca; paita misharca, shinashpa quimsa huatapi paita huatashcashnaman apamurca.

24 Coriántumrpaj churicuna, chuscu huatapi, Sharedta misharca, paicunapaj taitapa cutin reinota chasquirca.

25 Cunan tiai callarirca shuj macanajui alpa jahuallapi, tucui runa paipaj tandanajushcacunahuan macanajushpa paicuna munashcamanda.

26 Tiarca shuhuacuna, tucuripipash, tucui laya na ali rurajcuna tucui alpa jahuallapi.

27 Yalishca jipa Coriántumr carca ninan fiñashca Sharedhuan, paipaj contra rirca macanajungapa macanajuj runacunahuan; paicuna tuparirca jatun fiñaipi, tuparirca Gilgal pugru pambapi; ninan manllanayai macanajuiman tigrarca.

28 Yalishca jipa Shared paipaj contra macanajurca quimsa punllacunata. Yalishca jipa Coriántumr paita misharca, paita catirca Heslón pugru pambaman chayangacaman.

29 Yalishca jipa Shared cutin macanajurca pugru pambapi; riqui, pai Coriántumrta misharca, paita tigrachirca Gilgalpaj pugru pambaman.

30 Coriántumr Sharedhuan cutin macanajurca Gilgal pugru pambapi, maipi Sharedta misharca, huañuchircapash.

31 Shared Coriántumrta chugrichirca paipaj racu changapi, pai na macanajungapa rirca ishcai huatacunata, chai punllacuna tucui llactapuracuna alpa jahuallapi yahuarta jichashca carca, pipash na tiarca chaicunata jarcaj.