1 Yalishca jipa imaura Coriántumr alilla tucushpa paipaj chugrishcacunamanda, pai yari callarirca shimicunata imata Éter paiman parlashca carca.

2 Pai ricurca espadahuan huañuchishca carca ñalla ishcai millones paipaj llactapuracuna, pai llaquiri callarirca paipaj shungupi; ari, huañuchishca carca ishcai millones shinlli runacuna, paicunapaj huarmicunapash, paicunapaj huahuacunapash.

3 Pai arrepentiri callarirca ima na alita pai rurashcata; pai yari callarirca shimicunata imata parlashca carca tucui achil villachijcunapaj shimihuan, pai ricurca cunangaman tucui pactashca carca, tucui uchillacunacaman; paipaj alma llaquirirca, cushijushca cangapa na munarca.

4 Yalishca jipa pai quilcarca shuj cartata Shizman, mañashpa llactapuracunata perdonachun, pai reinota saquingapa llactapuracunapaj causaicunamanda.

5 Yalishca jipa imaura Shiz paipaj cartata chasquishpa pai shuj cartata quilcarca Coriántumrman, paimanda cujrijpica, paipaj propio espadahuan huañuchingapa, pai llactapuracunapaj causaita perdonanga.

6 Yalishca jipa llactapuracuna na arrepentirirca paicunapaj na ali ruraicunamanda; Coriántumrpaj llactapuracuna tangachirca fiñachun Shizpaj llactapuracunata; Shizpaj llactapuracuna tangachirca fiñachun Coriántumrpaj llactapuracunata; chaimanda, Shizpaj llactapuracuna Coriántumrpaj llactapuracunahuan macanajurca.

7 Imaura Coriántumr ricurca paipaj ñalla urmaita pai calparca Shizpaj llactapuracunapaj ñaupamanda.

8 Yalishca jipa pai Ripliáncumpaj yacucunaman chayamurca, ima, shuj shimiman tigrachishpa, jatun can, nacashpa tucuita yali; chaimanda, imaura cai yacucunaman chayamushpa paicunapaj facha huasicunata shayachirca; Shizpash paipaj facha huasicunata shayachirca paicunapaj ladollapi; chaimanda caya punlla paicuna macanajurca.

9 Yalishca jipa paicuna macanajurca ninan manllanayai macanajuita, chaipi Coriántumr cutin chugrishca carca, pai juizu chingarca yahuarta jichaimanda.

10 Yalishca jipa Coriántumrpaj macanajuj runacuna huashamanda macanajurca Shizpaj macanajuj runacunata; shina paicunata misharca, calpachirca paicunapaj ñaupamanda; paicunata uraiman calpachirca, shayachirca paicunapaj facha huasicunata shuj pushtu imami Ogat shuti carca.

11 Yalishca jipa Coriántumrpaj macanajuj runacuna paicunapaj facha huasicunata shayachirca Rama urcu ladopi; cai carca chai urcullata maipi ñuca taita Mormón pacarca tandachishpa quilcashcacunata Apunchijman, ima achil carca.

12 Yalishca jipa paicuna tandachinajurca tucui llactapuracuna tucui alpa jahuallamanda, maijan na huañushcacuna, Éterlla na.

13 Yalishca jipa Éter ricurca tucui llactapuracunapaj rurashcacunata; pai ricurca llactapuracuna maijan Coriántumrpa carca tandanajurca Coriántumrpaj macanajuj runacunahuan; llactapuracuna maijan Shizpaj carca tandanajurca Shizpaj macanajuj runacunahuan.

14 Chaimanda, chuscu huatacunata paicuna tandachinajurca llactapuracunata, tandachingapa tucuilla maijan alpa jahuallapi cajcunata, paicuna chasquichun tucui shinllicaita imashna chasqui ushashcata.

15 Yalishca jipa imaura paicuna tucuilla tandanajurca, tucuilla maijan macanajuna runacunahuan munashcahuan, paicunapaj huarmicunahuan, paicunapaj huahuacunahuan—jaricuna, huarmicuna, huahuacunapash macanajunahuan cashpa macanajungapa armacunahuan, charishpa escudocuna, pecho jirrucuna, uma jirrucuna, churajushpa cashpa tucui laya macanajuipa—paicuna rirca shuj macanajuimanda cutishuj macanajuiman; paicuna macanajurca chai tucui punlla, na misharca.

16 Yalishca jipa imaura tutayajpi shayajushca carca, paicunapaj causanacunaman anchurirca; paicunapaj causanacunaman anchurishca jipa huacashpa callarirca, llaquirircapash paicunapaj llactapuracuna huañushpa chingashcamanda; shina jatun carca paicunapaj caparicuna, paicunapaj huacaicuna, llaquiricunapash, shina faquirca huairata ninandapacha.

17 Yalishca jipa caya punlla paicuna cutin rirca macanajungapa, jatun manllanayaipash carca chai punlla; shina cajpipash, paicuna na misharca, imaura cutin tutayajpi paicuna faquirca huairata paicunapaj caparicunahuan, paicunapaj huacaicunahuan, llaquiricunahuanbash, chingashcamanda paicunapaj llactapuracunamanda huañushca.

18 Yalishca jipa Coriántumr cutin quilcarca shuj cartata Shizman, munashpa ama cutin macanajungapa shamuchun, ashtahuangari reinota pai japichun, llactapuracunapaj causaita perdonachun.

19 Ashtahuangari, Apunchijpaj Espíritu paicunahuan macanajuita saquirca, Satanás tucui ushaita charirca llactapuracunapaj shungucupa jahuapi; paicuna curishca carca paicunapaj shungucunapaj shinlliyaiman, ñausayaiman paicunapaj yuyaicunapaj, tucuchi tucushca cangapa; chaimanda paicuna cutin rirca macanajungapa.

20 Yalishca jipa paicuna macanajurca tucui chai punlla, tutayajpi paicunapaj espadacunapaj jahuapi puñurca.

21 Caya punlla paicuna macanajurcara tutayangacaman.

22 Tutayai shamujpi paicuna fiñaihuan machashca carca, imashna shuj runa pimi machashca can vinohuan; paicuna cutin puñurca paicunapaj espadacuna jahuapi.

23 Caya punlla paicuna cutin macanajurca; tutayai shamujpi tucuilla urmashca carca espadahuan picha chunga ishcai Coriántumrpaj llactapuracunalla na, sujta chunga iscun Shizpaj llactapuracuna.

24 Yalishca jipa chai tuta paicuna puñurca paicunapaj espadacuna jahuapi, caya tutamanda paicuna cutin macanajurca, paicuna randimanda pliturirca paicunapaj ushaihuan paicunapaj espadacunahuan, paicunapaj escudocunahuan, tucui punlla.

25 Tutayai shamujpi tiarca quimsa chunga ishcai Shizpaj llactapuracuna, ishcai chunga canchis Coriántumrpaj llactapuracuna.

26 Yalishca jipa paicuna micurca, puñurcapash, caya punlla huañungapa prepararirca. Paicuna jatun, shinllipash runacuna carca runacunapaj shinllicaihuan.

27 Yalishca jipa paicuna macanajurca quimsa horascunata, paicuna juizu chingachirca yahuarta jichaimanda.

28 Yalishca jipa Coriántumrpaj runacuna puringapa minishtirishca shinllicaita chasquishca jipa, paicuna ñalla calparca paicunapaj causaicunamanda; ashtahuangari riqui, Shiz jatarirca, paipaj runacunapash, jurarca paipaj fiñaipi huañuchingapa Coriántumrta, nacashpa espadahuan huañuna.

29 Chaimanda, paicunata catirca, caya punlla paicunata japirca; paicuna cutin macanajurca espadahuan. Yalishca jipa tucuilla espadahuan urmashca cashpa, Coriántumrlla, Shizlla na, riqui Shiz juizu chingarca yahuarta jichaimanda.

30 Yalishca jipa Coriántumr paipaj espada jahuapi taunarishca jipa, ashata samarca, Shizpaj umata cuchurca.

31 Yalishca jipa Shizpaj umata cuchushca jipa, Shiz jatarirca paipaj maquicunapi, urmarca; samaita aisangapa munashpa na ushashpa, huañurca.

32 Yalishca jipa Coriántumr alpaman urmarca, huañushcashna saquirirca.

33 Apunchij Éterman parlarca, paiman nirca: Ri. Pai rirca, riqui Apunchijpaj shimicuna tucui pactashca carca; pai tucuchirca paipaj quilcaita; (patsajmanda shujllatapash ñuca na quilcashcanichu) pacarca shuj layapi Limhipaj llactapuracuna caicunata tarirca.

34 Cunan tucuri shimicuna imacuna Éter quilcashcacuna cai can: Apunchijpaj munajpica ñuca apai tucushca cachun nacashpa ñuca llaquirisha Apunchijpaj munaita aichapi, na shina cajpipash alicanga, ñuca quishpirishca casha Diospaj reinopi. Shinacapashcachun.