6 Capítulo
Jaredita yacupi huanbujcuna huairacunahuan tangashca can cushapacha nishca alpaman—Llactapuracuna Apunchijta alaban paipaj alicaimanda—Oríah ajllashca can jatun mandaj cachun—Jared, paipaj huauquipash huañun.
1 Cunan ñuca, Moroni, catini cushpa Jaredpaj, paipaj huauquipajpash tandachishpa quilcashcata.
2 Yalishca jipa Apunchij rumicunata imata Jaredpaj huauqui urcuman apashcata preparashca jipa, Jaredpaj huauqui uriajumurca urcumanda, churarca rumicunata barcocunapi imata preparashca carca, shujta tucuricunapi; riqui, caicuna curca michata barcocunaman.
3 Shina Apunchij rumicunata punchayachirca yanapi, michata cuchun runacunaman, huarmicunaman, huahuacunaman, ama yalichun jatun yacucunata yanapi.
4 Yalishca jipa imaura paicuna preparashpa tucui laya micunata, caicunahuan causangapa yacu jahuapi, paicunapaj ataju llamacunapaj, jihua micuj animalcunapaj micunatapash, tucui laya sacha animalcunapaj, nacashpa animalcuna, nacashpa animal jahuata rij alascunahuan animalcunapaj paicunahuan apanajushcacunapa—yalishca jipa imaura paicuna rurashpa tucui cai cuzascunata paicunapaj barcocunaman nacashpa yacupi huanbujcunapi yaicurca, jatun mama cochaman rirca, paicuna mingarishpa Apunchij Diosman.
5 Yalishca jipa Apunchij Dios shuj millai huairata fucuchirca yacucuna jahuapi, cushapacha nishca alpaman; shina paicuna shitai tucurca jatun mama cochapaj caiman chaiman cuyurij huairahuan.
6 Yalishca jipa paicuna tauca viaje jatun mama cochapaj ucu ucupi pambai tucurca, ninan jatun caiman chaiman cuyuchijcunamanda imami paicunapaj jahuapi faquirirca, jatunbacha, manllanayai tamiacunapash imami carca manllanayai huairamanda.
7 Yalishca jipa imaura paicuna yacu ucu ucupi pambarishca cajpica na yacu tiarca paicunata chugrichi ushaj, paicunapaj barcocuna ninan quimishca carca shuj vasoshna, ninan quimishcapash carca Noépaj arca laya; chaimanda imaura paicuna acha yacucunahuan pillui tucushca cashpaca Apunchijta mañarca, pai paicunata cutin llujchirca yacucunapaj jahuaman.
8 Yalishca jipa huaira nimaura na saquirca fucuita cushapacha nishca alpacaman imaura paicuna yacucunapi cajpi; shina paicuna pushai tucurca huairahuan.
9 Paicuna alabanzacunata cantarca Apunchijman; ari, Jaredpaj huauquica alabanzacunata cantarca Apunchijman, pagui nirca, alabarcapash Apunchijta tucui punlla; imaura tuta shamujpipash, paicuna na saquirca Apunchijta alabaita.
10 Shina paicuna ñaupaman tangashca carca; jatun mama cochapaj nima manllanayai animalpash na paicunata faqui usharca, nima ballenapash na chugrichi usharca; paicuna punllan punllan michata charirca, yacu jahualla cashpapash, yacu ucuman cashpapash.
11 Shina paicuna yacu jahuata apai tucurca, quimsa patsaj chuscu chunga chuscu punllacunata.
12 Paicuna barcomanda llujshimurca cushapacha nishca alpa manñaman. Imaura paicunapaj chaquicunata cushapacha nishca alpa manñapi churashpa urai cumurirca alpacaman, paicunallata Apunchijpaj ñaupapi humillarirca, cushijuimanda viquicunata jicharca Apunchijpaj ñaupapi, paicunata ashtacapacha paipaj shungumanda llullu llaquishcacunamanda.
13 Yalishca jipa paicuna alpaman rirca, alpata tarpui callarirca.
14 Jared chuscu churicunata charirca; paicuna shutichishca carca Jacom, Gilga, Maha, Oríah.
15 Jaredpaj huauquipash churicunata, ushicunatapash charirca.
16 Jaredpaj ali rijsicuna, paipaj huauquicunapash carca ishcai chunga chuscu almacuna; paicunapash charirca churicunata, ushicunatapash nara cushapacha nishca alpaman chayamushpallata; chaimanda paicuna taucacuna cai callarirca.
17 Yachachishca carca humildemente purichun Apunchijpaj ñaupapi; jahuamanda yachachi tucushcapash carca.
18 Yalishca jipa paicuna chajchuri callarirca alpa jahuallapi, mirari, alpata tarpui; paicuna shinllicunaman tigrai callarirca.
19 Jaredpaj huauqui rucuyai callarirca, ricurca ña pambana pushtuman rinata; chaimanda Jaredta nirca: Tandachishun ñucanchi llactapuracunata yupangapa, yachangapa imatami munan ñucanchimanda nara ñucanchi pambana pushtuman nara rijllapita.
20 Chaimanda llactapuracunata tandachirca. Cunan Jaredpaj huauquipaj churicuna, ushicuna carca ishcai chunga ishcai almacuna; Jaredpaj churicuna, ushicuna carca chunga ishcai, pai charirca chuscu churicunata.
21 Yalishca jipa paicuna yuparca paicunapaj llactapuracunata; yupashca jipa, paicuna munarca yachangapa ima cuzascunata rurachun munajta nara paicunapaj pambana pushtucunaman rishpallata.
22 Yalishca jipa llactapuracuna munarca paicunapaj churicunamanda shujta ungichun paicunapaj jatun mandaj cachun.
23 Cunan riqui, paicunapaj cai llaqui carca. Jaredpaj huauqui paicunaman nirca: Ciertopacha cai cuzas huatashcashnaman pushan.
24 Ashtahuangari Jared nirca paipaj huauquiman: Saqui paicuna shuj jatun mandajta charichun. Chaimanda pai nirca paicunaman: Ajllaichi ñucanchipaj churicunamanda shuj jatun mandajta, maijanda munashpapash.
25 Yalishca jipa paicuna ajllarca Jaredpaj huauquipaj callari churita; paipaj shuti carca Pagag. Yalishca jipa pai na nirca, na munarca paicunapaj jatun mandaj cangapa. Llactapuracuna munarca paipaj taita caipacha nichun, ashtahuangari paipaj taita na mandarca; mandarca paicuna maijan runatapash na munai na munai paicunapaj jatun mandaj cachun.
26 Yalishca jipa ajllarca Pagagpaj tucui huauquicunata, paicuna na munarca.
27 Yalishca jipa Jaredpaj churicunapash na munarca, tucuilla shinapash shujlla ari, Oríah ungishca carca llactapuracunapaj jahuapi jatun mandaj cachun.
28 Pai reinai callarirca, llactapuracuna ali mirai callarirca; ninanbacha charijcunaman tigrarca.
29 Yalishca jipa Jared huañurca, paipaj huauquipash.
30 Yalishca jipa Oríah humildemente purirca Apunchijpaj ñaupapi, yarirca mashna jatun cuzascunata Apunchij paipaj taitamanda rurashca cashca, yachachircapash paipaj llactapuracunata mashna jatun cuzacunata Apunchij rurashca carca paicunapaj taitacunamanda.