1 Ne mpindiewu, mema, Moloni ndi ntuadija kujikija mifundu yanyi bitangila dibutuka dia bantu bamvua muikala mfunda bualu buabu.

2 Bualu monayi, bakabenga mêyi onsu a Etele; bualu bulelela wakabambila bitangila bintu bionsu, kumbukila ku mbangilu wa muntu; ne wakabambila ne kunyima kua mâyi makepela pa mpala wa bulaba buakalua bulaba bua disungula ku mutu kua malaba makuabu onsu, bulaba busungula bua Mukalenga; bua nanku Mukalenga uvua musua ne bantu bonsu badi basomba pa mpala wabu bamusadila;

3 Ne buvua muaba wa Yelushalema Mupia-mupia, wapueka panshi ufumina mu diûlu, ne muaba wa tshitendelelu wa tshijila wa Mukalenga.

4 Monayi, Etele wakamona matuku a Kilisto, ne wakakula bitangila Yelushalema Mupia-mupia pa mutu pa bulaba ebu.

5 Ne wakakula kabidi bitangila nzubu wa Isalele, ne Yelushalema kualuila Lehi—kunyima kua kubutukayi neashibua kabidi, tshimenga tshia tshijila bua Mukalenga; bua nanku, kavua mua kuikala Yelushalema mupia-mupia to bualu uvuaku mu diba dia ku kala; kadi neashibua kabidi ne nealua tshimenga tshia tshijila tshia Mukalenga; ne neashibua bua nzubu wa Isalele—

6 Ne ne Yelushalema Mupia-mupia neashibua pa mutu pa bulaba ebu, bua tshishadi tshia ndelanganyi ya Yosefe, kudi kuikala ne tshifuanyikiji bua bintu ebi.

7 Bualu bu muakaluisha Yosefe tatuenda mu bulaba bua Ejipitu, mena muakafuilaye; pananku, Mukalenga wakapatuisha tshishadi tshia ndelanganyi ya Yosefe mu bulaba bua Yelushalema, bua ikala ne lusa kudi ndelanganyi ya Yosefe bua ne kabafu to, mena bu muvuaye ne lusa kudi tatuenda wa Yosefe bua ne kafu to.

8 Pananku, tshishadi tshia nzubu wa Yosefe netshiasa pa mutu pa bulaba ebu; ne nebuikala bulaba bua bupianyi buatshi; ne nebashila Mukalenga tshimenga tshia tshijila, tshifuanangana ne Yelushalema wa kala; ne kabakubuejakajibua kabidi to, tô ne mualua nshikidilu, pâjimina buloba.

9 Ne nekuikala diûlu dipia-dipia ne buloba bupia-bupia; nebikala bifuanangana ne bia kala amu pa kumbusha ne bia kala nebikala bijimina, ne bintu bionsu nebikala bilua bipia-bipia.

10 Ne pashisha Yelushalema Mupia-mupia nealua; ne badi babeneshibua bobu badi bikadilamu, bualu bobu bena bilamba bidi bitoka ku njila wa mashi a Muana wa Mukoku; ne bobu badi babadibua munkatshi mua tshishadi tshia ndelanganyi ya Yosefe, bavua bikala ba ku nzubu wa Isalele.

11 Ne pashisha kabidi Yelushalema wa kala nealua; ne benamu, badi babeneshibua, bualu badi bikala basukudibua mu mashi a Muana wa Mukoku; ne bobu bavua batangalajibua ne basangishibuamu kumbukila ku matengu anayi a buloba, ne kumbukila ku matunga a ku node, ne badi bapetshi ba mabenesha adi afumina ku dikumbajibua dia tshipungidi tshidi Nzambi muenza ne tatuabu, Abalahama.

12 Ne palua bintu ebi, nebikumbana mufundu wa Nzambi udi wamba ne, kudi aba bavua ba kumpala, bikala ba ndekelu; ne kudi bavua ba ndekelu, bikala ba kumpala.

13 Ne mvua pabuipi ne kufunda bipita, kadi ngakandikibu kudi Mukalenga; kadi mambi a Etele adi manena ne a dikema; kadi bakamuangata tshianana, ne bakamuipata; ne uvua usokoma munda mua lubuebua mu munya, ne butuku uvua uya kutangila bintu bialuila bantu.

14 Ne pavuaye musomba munda mua lubuebua wakafunda tshishadi tshia mifundu eyi, muikala utangila dibutuka divua diluila bantu, butuku.

15 Ne biakalua ne mu tshidimu tshia momumua tshivuaye muipatshibua munkatshi mua bantu atshi, kuakabanga kuikala mvita minena munkatshi mua bantu, bualu kuvua ba bungi bakajuka, bavua bikala bantu ba bukitu, ne bakakeba bua kushipa Koliantumela ku malongolola abu a mu musokoku a bubi, avua makala mamba.

16 Ne mpindiewu Koliantumela, muvuaye mulonga, yeya muina, mishindu yonsu ya dimanya dia mvita ne budimu bonsu bua ba pa buloba, bua nanku wakela bavua bakeba bua kumushipa mvita.

17 Kadi kakakudimuna mutshima to, anyi bana benda ba baluma balenga anyi bana benda ba bakaji balenga; bana ba baluma balenga ne bana ba bakaji balenga ba Koholo; anyi bana ba baluma balenga ne bana ba bakaji ba Koliholo balenga; ne mu tshikosu, kakuvua nansha umua wa ku bana ba baluma balenga bana ba bakaji balenga pa mpala wa buloba bujima wakakudimuna mutshima ku mibi yabu to.

18 Pananku, biakalua ne mu tshidimu tshia kumpala tshivua Etele musomba munda mua lubuebua, kuvua bantu ba bungi bavua bashipibua ku muela wa mvita wa bipungidi bia mu musokoku abi, bikala baluisha Koliantumela bua ne bapeta bukalenga.

19 Ne biakalua ne bana ba baluma ba Koliantumela bakaluangana bikola ne bakapatuka mashi a bungi.

20 Ne mu tshidimu tshibidi dîyi dia Mukalenga diakalua kudi Etele, bua ne aya ne amba ku Nyuma kudi Koliantumela ne, pikalaye mukudimuna mutshima, ne bena mu nzubu wenda bonsu, Mukalenga neamupesha bukalenga buenda ne neepelesha bantu—

21 Tshianana nebabutuka, pamua ne bena mu nzubu wenda bonsu amu pa kumbusha yeya nkayenda. Ne neashala ne moyo amu bua kumona dikumbajibua dia mambi avua mamba bitangila bantu bakuabu bâpeta bulaba ebu bu bupianyi buabu; ne Koliantumela neajîkibua kudibu; ne anyima yonsu neashipibua amu pa kumbusha Koliantumela.

22 Ne biakalua ne Koliantumela kakakudimuna mutshima to, anyi bena mu nzubu wenda, anyi bantu; ne mvita kayakajika to; ne bakakeba bua kushipa Etele, kadi wakanyema kumpala kuabu ne wakasokoma kabidi munda mua lubuebua.

23 Ne biakalua ne Shalede wakajuka, ne wakela penda Koliantumela mvita; ne wakamutamba, mua ne mu tshidimu tshisatu wakamutuala mu bukuatshibu.

24 Ne bana ba baluma ba Koliantumela, mu tshidimu tshinayi, bakatamba Shalede, ne bakangatshila kabidi tatuabu bukalenga.

25 Mpindiewu kuakabanga kuikala mvita pa mpala onsu wa bulaba, muntu yonsu ne tshisumbu tshienda uluangana bua tshivuaye ujinga.

26 Ne kuvua banyengi, ne mu tshikosu, mishindu yonsu ya bubi pa mpala onsu wa bulaba.

27 Ne biakalua ne Koliantumela wakafîkila Shalede tshiji menamena, ne wakamuluangisha mvita ne misumba yenda ya basalayi; ne bakasambakena bikala ne tshiji tshikola, ne bakasambakena mu tshibanda tshia Gilegala; ne mvita yakalua mikola menamena.

28 Ne biakalua ne Shalede wakamuluisha bua mutantshi wa matuku asatu. Ne biakalua ne Koliantumela wakamutamba, ne wakamulondakaja tô ne pakaluaye ku mpata ya Heshelona.

29 Ne biakalua ne Shalede wakamuela kabidi mvita mu mpata; ne monayi, wakatamba Koliantumela, ne wakamupingaja kabidi ku tshibanda tshia Gilegala.

30 Ne Koliantumela wakela Shalede kabidi mvita mu tshibanda tshia Gilegala, yakatambaye Shalede ne kumushipaye.

31 Ne Shalede wakatapa Koliantumela mputa ku tshibelu, bua ne kakaya kabidi kuluangana mvita to bua mutantshi wa bidimu bibidi, diba dîna adi bantu bonsu pa mpala wa bulaba bavua bamatshisha mashi, ne kakuvua muntu nansha umua bua kubakandi to.