1 Ne mpindiewu kuakabanga kuikala mutshipu munena pa mutu pa bulaba bonsu bua bualu bua malu mabi a bantu, mu mushindu wa ne pavua muntu uteka tshiamu tshienda tshia mudimu anyi muela wenda wa mvita pa tshitanda tshienda, anyi pa muaba onsu uvuaye musua kutshiteka, monayi, pakatshiabu, kavua mua kutshisangana to, bualu mutshipu uvua munena pa mutu pa bulaba.

2 Bua nanku muntu yonsu uvua mulamatangana ne tshivua tshikala tshienda, mu bianza bienda, ne kavua usomba anyi usombesha to; ne muntu yonsu uvua mulama tshilabi tshia muela wenda wa mvita mu tshianza tshia baluma, bua kusungidila tshintu tshienda ne moyo wenda ne wa bakaji benda ne wa bana benda.

3 Ne mpindiewu, kunyima kua mutantshi wa bidimu bibidi, ne kunyima kua lufu lua Shalede, monayi, muanabu ne Shalede wa baluma wakajuka ne wakela Koliantumela mvita, yakamutamba Koliantumela ne kumulondakaja tô ne ku tshipela tshia Akishi.

4 Ne biakalua ne muanabu ne Shalede wa baluma wakamuela mvita mu tshipela tshia Akishi; ne mvita yakalua mikola menamena, ne binunu bia bungi biakapona ku muela wa mvita.

5 Ne biakalua ne Koliantumela wakanyungulula tshipela; ne muanabu ne Shalede wakapatuka mu tshipela butuku, ne wakashipa tshitupa tshia musumba wa basalayi wa Koliantumela, pavuatshi tshikuatshika mâluvu.

6 Ne wakalua ku bulaba bua Molona, ne wakaditeka mu nkuasa wa bukalenga wa Koliantumela.

7 Ne biakalua ne Koliantumela wakasomba ne musumba wenda wa basalayi mu tshipela bua mutantshi wa bidimu bibidi, muakapetaye makanda a bungi bua musumba wenda wa basalayi.

8 Mpindiewu muanabu ne Shalede wa baluma, uvua ne dîna ne Gilada, wakapeta penda makanda a bungi bua musumba wenda wa basalayi, bua bipungidi bia mu musokoku.

9 Ne muakuidi wenda munena wakamushipa pavuaye musomba pa nkuasa wenda wa bukalenga.

10 Ne biakalua ne umua wa ku bipungidi bia mu musokoku wakamushipa mu muaba wa mu musokoku, ne wakadiangatshila bukalenga; ne dîna dienda divua dikala Libi; ne Libi uvua muntu wa mubidi munena, kupita muntu mukuabu yonsu munkatshi mua bantu bonsu.

11 Ne biakalua ne mu tshidimu tshia kumpala tshia Libi, Koliantumela wakalua ku bulaba bua Molona, ne wakela Libi mvita.

12 Ne biakalua ne wakaluisha Libi mvita, muakamutûta Libi pa diboku, bua ne wakatapika mputa; nansha nanku, musumba wa basalayi wa Koliantumela wakasumpakaja Libi, bua ne wakanyemena ku mikalu ku muelelu wa mbuwa.

13 Ne biakalua ne Koliantumela wakamulondakaja; ne Libi wakamuela mvita ku muelelu wa mbuwa.

14 Ne biakalua ne Libi wakatûta musumba wa basalayi wa Koliantumela, bua ne wakanyemena kabidi ku tshipela tshia Akishi.

15 Ne biakalua ne Libi wakamulondakaja tô ne muakaluaye ku mpata ya Agoshe. Ne Koliantumela uvua muangata bantu bonsu pavuaye unyema kumpala kua Libi mu tshitupa tshia bulaba atshi kuakanyemenaye.

16 Ne pakaluaye ku mpata ya Agoshe wakela Libi mvita, ne wakamutûta tô ne pakafuaye; nansha nanku, muanabu ne Libi wa baluma wakaluila Koliantumela pa muaba wa Libi, ne mvita yakalua mikola menamena, yakanyema Koliantumela kumpala kabidi kua musumba wa basalayi wa muanabu ne Libi wa baluma.

17 Mpindiewu dîna dia muanabu ne Libi wa baluma divua Shize. Ne biakalua ne Shize wakalondakaja Koliantumela, ne wakatonkola bimenga bia bungi, ne wakashipa bakaji ne bana, ne wakôsha bimenga.

18 Ne kuvua bôwa bua Shize mu bulaba bonsu; eyowa, lubila luakaya mu bulaba bonsu ne—Nganyi udi mua kuimana kumpala kua musumba wa basalayi wa Shize? Monayi, udi ukomba buloba kumpala kuenda!

19 Ne biakalua ne bantu bakabanga kudisangisha pamua mu misumba ya basalayi, bua pa mpala onsu wa bulaba.

20 Ne bavua bâbuluka; ne tshitupa tshiabu tshimua tshiakanyemena kudi musumba wa basalayi wa Shize, ne tshitupa tshiabu tshikuabu tshiakanyemena kudi musumba wa basalayi wa Koliantumela.

21 Ne mvita ivua mipita bukola ne yakanenga bikola, ne bualu bua dimatshisha dia mashi ne ne dishipangana dikola buakanenga, bua ne mpala mujima wa bulaba uvua muwula ne mibidi ya bafua.

22 Ne mvita ivua mikala mipita buipi ne ya lubilu bua ne kakuvua muntu nansha umua mushala to bua kujîka bafua to, kadi bakaya ku dimatshisha dia mashi ne ku dimatshisha dia mashi, bashiya mibidi ya baluma, bakaji, ne bana bitangalaka pa mpala wa bulaba, bua kuluabi tshiakudia tshia bikusu bitu bidia musunyi.

23 Ne mupuya wayi wakatangalaka pa mpala wa bulaba, mena pa mpala onsu wa bulaba; bua nanku bantu bakatatshishibua munda munya ne butuku, bua mupuya wayi.

24 Nansha nanku, Shize kakalekela kulondakaja Koliantumela to, bualu uvua muditshipa bua kudisombuela kudi Koliantumela bua mashi a muanabu wa baluma, uvua Koliantumela mushipa, ne bua dîyi dia Mukalenga diakalua kudi Etele ne Koliantumela kakupona ku muela wa mvita to.

25 Ne nanku tudi tumona ne Mukalenga wakabakumbula mu tshiwudi tshia tshiji tshienda, ne bubi buabu ne malu mapita bubi abu bivua bilongolola njila bua dibutuka diabu dia kashidi.

26 Ne biakalua ne Shize wakalondakaja Koliantumela ku esete, mena tô ne ku mikalu ya pabuipi ne ku muelelu wa mbuwa, ne aku wakela Shize mvita bua mutantshi wa matuku asatu.

27 Ne lufu luvua lutshinyisha bikola munkatshi mua misumba ya basalayi ya Shize bua ne bantu bakabanga kuikala ne bôwa, ne bakabanga kunyema kumpala kua misumba ya basalayi ya Koliantumela; ne bakanyemena ku bulaba bua Koliholo, ne bakakomba benamu kumpala kuabu, bonsu bavua babenga kudisangisha nabu.

28 Ne bakâsa ntenta yabu mu tshibanda tshia Koliholo; ne Koliantumela wakâsa ntenta yenda mu tshibanda tshia Shulu. Mpindiewu tshiabanda tshia Shulu tshivua pabuipi ne kakuna ka Komenolo; bua nanku, Koliantumela wakasangisha misumba yenda ya basalayi pa kakuna ka Komenolo, ne wakela mpungi kudi misumba ya basalayi ya Shize bua kubabikila bua kuluangana mvita.

29 Ne biakalua ne yakalua, kadi bakayipingaja panyima kabidi; ne yakalua musangu muibidi, ne bakayipingaja panyima kabidi musangu muibidi. Ne biakalua ne yakalua kabidi musangu muisatu, ne mvita yakalua mikola menamena.

30 Ne biakalua ne Shize wakatûta Koliantumela bua ne wakamutapa mputa miondoka ya bungi; ne bu muvua Koliantumela mujimija mashi enda, uvua mukuluka mujimija meji, ne wakambudibua bu ne uvua mufua.

31 Mpindiewu dijimija dia baluma, bakaji ne bana ku nseka yonsu ibidi divua dipita bunena bua ne Shize wakapesha bantu benda mukenji ne kabalondakaji misumba ya basalayi ya Koliantumela to; bua nanku, bakapingana ku tshitudidi tshiabu.