1 Ne biakalua ne pakapanda Koliantumela ku mputa yenda, wakabanga kuvuluka ku mêyi avua Etele mumuambila.

2 Wakamona ne kuvua pabuipi ne mbombo ibidi ya bantu benda ikavua mimana kushipibua ku muela wa mvita, ne wakabanga kunyingalala mu mutshima wenda; eyowa, kuvua mbombo ibidi ya bantu ba bukitu ivua mishipibua, ne bakaji babu ne bana babu kabidi.

3 Wakabanga kukudimuna mutshima ku bubi buvuaye muenza; wakabanga kuvuluka mêyi avua mamba kudi mukana wa bambi bonsu, ne wakayimona ne avua makumbajibua tô ne mpindiewu, kaleta konsu; ne anyima wenda wakadila ne wakabenga bua kusambibua.

4 Ne biakalua ne wakafundila Shize mukanda, ujinga ne epelesha bantu, ne wamba ne nealekela bukalenga bua bualu bua mioyo ya bantu.

5 Ne biakalua ne pakapeta Shize mukanda wenda wakafundila Koliantumela mukanda, ne yeya mudifila bua ne amushipa ne muela wenda wa mvita, ne epelesha mioyo ya bantu.

6 Ne biakalua ne bantu kabakakudimuna mutshima ku malu mabi abu to; ne bantu ba Koliantumela bavua basonsodibua bua kufîkilabu bantu ba Shize tshiji; ne bantu ba Shize bavua basonsodibua bua kufîkilabu bantu ba Koliantumela tshiji; bua nanku, bantu ba Shize bakela bantu ba Koliantumela mvita.

7 Ne pakamona Koliantumela ne uvua pabuipi ne kupona wakanyema kabidi kumpala kua bantu ba Shize.

8 Ne biakalua ne wakalua ku mâyi a Lipaliankuma, tshidi mu diandamuna dia miakulu tshiamba ne tshialabala, anyi kupita bionsu; pananku, pakaluabu ku mâyi â bakâsa ntenta yabu; ne Shize wakâsa penda ntenta yenda pabuipi nabu; ne nanku pakatshiabu bakalua kuluangana mvita.

9 Ne biakalua ne bakaluangana mvita mikola menamena, muakatapika Koliantumela mputa kabidi, ne muakakulukaye mujimija meji bua dijimija dia mashi.

10 Ne biakalua ne misumba ya basalayi ya Koliantumela yakasumpakaja misumba ya basalayi ya Shize bua ne yakayitamba, bua ne yakayinyemesha kumpala kuayi; ne yakanyemena ku sude, ne yakâsa ntenta yayi mu muaba uvua ubikidibua ne: Ogata.

11 Ne biakalua ne musumba wa basalayi wa Koliantumela wakâsa ntenta wayi pabuipi ne kakuna ka Lama; ne kavua kakuna kina aku kuakasokoka tatuanyi Molomo mifundu bua Mukalenga, bualu ivua mikala ya tshijila.

12 Ne biakalua ne bakakunguija bantu bonsu bavua kabayi bashipibua to pamua pa mpala onsu wa bulaba, amu pa kumbusha Etele.

13 Ne biakalua ne Etele wakamona midimu ya bantu yonsu; ne wakamona ne bantu bavua bikala bua Koliantumela bavua basangisha pamua ku musumba wa basalayi wa Koliantumela; ne bantu bavua bikala bua Shize bavua badisangisha pamua ku musumba wa basalayi wa Shize.

14 Pananku, bakasangisha bantu pamua bua mutantshi wa bidimu binayi, bua ne bapeta bonsu bavua bikala pa mpala wa bulaba, ne bua ne bapeta makanda onsu avuabu bakumbana mua kupeta.

15 Ne biakalua ne pakadisangishabu bonsu pamua, muntu yonsu ku musumba wa basalayi uvuaye musua, ne bakaji babu ne bana babu—baluma, bakaji ne bana bikala bambula biluilu bia mvita, ne bikala ne ngabu, ne bibuikilu bia pa tshiadi, ne bifulu bia mvita, ne bikala bavuala ku mushindu wa mvita—bakaya kuluishangana mvita; ne bakaluangana dituku adi dionsu, ne kabakatshimunangana to.

16 Ne biakalua ne pakila butuku bavua batshioka, ne bakapingana bitudidi biabu; kunyima kua kupinganabu ku bitudidi biabu bakabanga kuela mikunda ne kudilakana bua dijimija dia ba ku bantu babu bavuabu bashipa; ne mbila yabu, ne mikunda yabu, ne didilakana diabu bivua bipita bukola, bua ne bakapanda kapepela menamena.

17 Ne biakalua ne pakatshiabu bakaya kabidi kuluangana mvita, ne dituku adi divua dikola ne ditshinyisha; nansha nanku, kabakatshimunangana to, ne pakila butuku kabidi bakapanda kapepela ne mbila yabu, ne mikunda yabu, ne madilu abu, bua bualu bua dijimija dia ba ku bantu babu bavuabu bashipa.

18 Ne biakalua ne Koliantumela wakafundila Shize mukanda kabidi, ujinga ne Shize kalu kabidi kuluangana mvita to, kadi angata bukalenga, ne epelesha mioyo ya bantu.

19 Kadi monayi, Nyuma wa Mukalenga uvua mulekela kuenda nabu, ne Satana uvua ne bukola bonsu pa mitshima ya bantu; bualu bavua badifila ku bupapa bua mitshima yabu, ne ku bumpofu bua meji abu bua ne babutuka; bua nanku bakaya kabidi bua kuluangana mvita.

20 Ne biakalua ne bakaluangana dituku adi dionsu, ne pakila butuku bakaladila miela yabu ya mvita.

21 Ne pakatshiabu bakaluangana mena tô ne pakila butuku.

22 Ne pakila butuku bavua bakuatshika ne tshiji, mena bu mudi muntu udi mukuatshika ne mvinyo; ne bakaladila kabidi miela yabu ya mvita.

23 Ne pakatshiabu bakaluangana kabidi; ne pakila butuku bavua bonsu bapona ku muela wa mvita amu pa kumbusha makumi atanu ne babidi ba ku bantu ba Koliantumela, ne makumi asambombo ne tshitema ba ku bantu ba Shize.

24 Ne biakalua ne bakaladila miela yabu ya mvita butuku abu, ne pakatshiabu bakaluangana kabidi, ne bakakokangana ne bukitu buabu ne miela yabu ya mvita ne ne ngabu yabu, dituku adi dionsu.

25 Ne pakila butuku kuvua makumi asatu ne babidi ba ku bantu ba Shize, ne makumi abidi ne muanda muteketa ba ku bantu ba Koliantumela.

26 Ne biakalua ne bakadia ne bakalala, ne bakadilongolola bua kufua patshiabu. Ne bavua bantu ba banena ne ba bukitu bu mudi ku makanda a bantu.

27 Ne biakalua ne bakaluangana bua mutantshi wa meba asatu, ne bakakuluka bajimija meji bua dijimija dia mashi.

28 Ne biakalua ne pakapeta bantu ba Koliantumela makanda makumbana bua ne bavua mua kuenda, bakavua pabuipi ne kunyema bua mioyo yabu; kadi monayi, Shize wakajuka, ne bantu benda pabu, ne wakaditshipa mu tshiji tshienda ne neashipa Koliantumela anyi neafua ku muela wa mvita.

29 Bua nanku, wakabalondakaja, ne pakatshiabu wakabakuata; ne bakaluangana kabidi ne muela wa mvita. Ne biakalua ne pakaponabu bonsu ku muela wa mvita, amu pa kumbusha Koliantumela ne Shize, monayi Shize uvua mukuluka mujimija meji bua dijimija dia mashi.

30 Ne biakalua ne pakeyemena Koliantumela pa muela wenda wa mvita, bua ne ikisha kakesa, wakakosa mutu wa Shize.

31 Ne biakalua ne pakakosaye mutu wa Shize, Shize wakajuka pa bianza bienda ne wakapona; ne kunyima kua kuluangana bua kupuyakana, wakafua.

32 Ne biakalua ne Koliantumela wakapona pa buloba, ne wakalua bu ne kavua ne moyo to.

33 Ne Mukalenga wakakula kudi Etele, ne wakamuambila ne: Ndâku. Ne wakaya, ne wakamona ne mêyi a Mukalenga avua makumbajibua onsu; ne wakajikija mifundu yenda; (ne ntshiena mufunda tshitupa tshia lukama tshia mifundu ya Etele to); ne wakayisokoka mu mushindu wa ne bantu ba Limihi bakayisangana.

34 Mpindiewu miaku ya ndekelu idi Etele mufunda nyoyi eyi; Mukalenga newasua ne nkudimunyibua, anyi ne mmona disua dia Mukalenga mu musunyi, kabiena ne bualu to, bikalabi ne nempandishibua mu bukalenga bua Nzambi. Amena.