1 Ne biakalua ne muanabu ne Yalede wa baluma, (mpindiewu bungi bua bibeya bivuabu balongolola buvua muanda mukulu) wakaya ku mukuna, uvuabu babikila ne mukuna wa Shelema, bua bula buawu bupita, ne wakengulula mabua makesa dikumi ne asambombo ku lubuebua; ne avua matoka ne makezuka, mena amuesha munda bu mudi tshilangilangi; ne waka’ambula mu bianza bienda tô ne pa musongu wa mukuna, ne wakabila kabidi kudi Mukalenga, wamba ne:

2 Ô Mukalenga, uvua muamba ne mâyi a nkoka adi ne tshia kutunyungulula ku nseka yonsu. Mpindiewu mona, Ô Mukalenga, ne kufîkidi musadidi weba tshiji bua buteketa buenda kumpala kueba to; bualu tudi bamanya ne udi munsantu, ne udi usomba mu diûlu, ne katuena bakumbana kumpala kueba to; bualu buikadi buetu budi bulua bubi diba dionsu bua dipona dia Adama; nansha nanku, Ô Mukalenga, udi mutupesha mukenji ne tukubikila, bua ne tupeta kuwudi bilondeshila ku majinga etu.

3 Mona, Ô Mukalenga, udi mututûta bua malu mabi etu, ne udi mutuipata, ne bidimu bia bungi ebi tuvua bikala mu tshipela; nansha nanku, uvua ne lusa kutudi. Ô Mukalenga, ntangila ne mesu a lusa, ne umbusha tshiji tshieba kudi bantu beba aba, ne kulekedi ne basabuka mâyi mondoka a mavuala adi afuna â mu mîdima to; kadi mona bintu ebi bindi muengulula ku lubuebua.

4 Ne ndi mumanya, Ô Mukalenga, ne udi ne bukola bonsu, ne udi mua kuenza tshionsu tshiwudi musua bua diakalenga dia muntu; bua nanku lenga mabua â, Ô Mukalenga, ne munu weba, ne walongolola bua ankenka mu mîdima; ne neatukenkela munda mua bibeya bitudi balongolola, bua ne tupeta bukenka patuikala tusabuka pa mbuwa.

5 Mona, Ô Mukalenga, udi mua kuenza nanku awu. Tudi bamanya ne udi bua kuleja bukola bua bungi, budi bumueneka bukesa mu ngumvuilu wa bantu.

6 Ne biakalua ne pakamba muanabu ne Yalede wa baluma mêyi â, monayi, Mukalenga wakôlola tshianza ne wakalenga mabua ku dimua ku dimua ne munu wenda. Ne tshibuikilu tshiakumbushibua ku mesu a muanabu ne Yalede wa baluma, ne wakamona munu wa Mukalenga; ne uvua muikala bu mudi munu wa muntu, mufuanangana ne wa musunyi ne mashi; ne muanabu ne Yalede wa baluma wakapona panshi kumpala kua Mukalenga, bualu bôwa buakamukuata.

7 Ne Mukalenga wakamona muanabu ne Yalede wa baluma uvua mupona pa buloba; ne Mukalenga wakamuambila ne: Juka, bua tshinyi waponyi?

8 Ne wakambila Mukalenga ne: Ndi mumona munu wa Mukalenga, ne ndi mutshina ne kalu kuntûta: bualu ntshivua mumanya ne Mukalenga uvua ne musunyi ne mashi to.

9 Ne Mukalenga wakamuambila ne: Bua ditabuija dieba wamonyi ne nengikala ne musunyi ne mashi; ne muntu katu muanji kulua kumpala kuanyi ne ditabuija dipita nanku bu mûdi mulua to; bualu bu kabivua nanku to kuvua mua kumona munu wanyi to. Wamonyi kupita ebi anyi?

10 Ne wakamuandamuna ne: To; Mukalenga, dileja kundi.

11 Ne Mukalenga wakamuambila ne: Udi witabuija mêyi angakuambila anyi?

12 Ne wakandamuna ne: Eyowa, Mukalenga, ndi mumanya ne udi wamba bulelela, bualu udi Nzambi wa bulelela, ne kuena mua kushima to.

13 Ne pakambaye mêyi â, monayi, Mukalenga wakadileja kudiye, ne wakamba ne: Wasungidibu ku dipona dia Adama bualu wamanyi bintu ebi; bua nanku ngakupingaji ku mpala kuanyi; bua nanku ndi ndileja kuwudi.

14 Mona, mema ki uvua mulongolola katshia ku tshishimikidi tshia buloba bua kusungila bantu banyi. Mona ndi Yezu Kilisto. Ndi Tatu ne Muana. Bukua bantu bonsu nebupeta moyo buanyi, ne nanku tshiendelela, mena aba bitabuija mu dîna dianyi; ne nebalua bana banyi ba baluma ne bana banyi ba bakaji.

15 Ne tshitu nansha mudileja kudi muntu undi mufuka, bualu muntu katu nansha mungitabuija bu wewa to. Udi umona ne udi mufukibua ku tshimfuanyi tshianyi anyi? Eyowa, mena bantu bonsu bavua bafukibua ku mbangilu ku tshimfuanyi tshianyi.

16 Mona, mubidi ewu, ûdi umona mpindiewu, udi mubidi wa nyuma wanyi; ne ndi mufuka muntu bilondeshila ku mubidi wa nyuma wanyi; ne mena bu mundi mmueneka kûdi muikala mu nyuma nemmueneka kudi bantu banyi mu musunyi.

17 Ne mpindiewu, bu mumvua mema, Moloni, ntshiyi mua kufunda mulubu mujima wa bintu bidi bifundibua ebi to, bua nanku bidi bikumbana bua mema kuamba ne Yezu wakadileja kudi muntu ewu mu nyuma, mena ku mushindu ne ku difuanangana dia mubidi wa momomua mena bu muakadilejaye kudi Bena Nefi.

18 Ne wakamusadila mena bu muakasadilaye Bena Nefi; ne bionsu ebi, bua ne muntu ewu amanya ne uvua muikala Nzambi, bua midimu ya bungi ivua Mukalenga mumuleja.

19 Ne bua bualu bua dimanya dia muntu ewu, kavua mua kupangishibua bua kumona munda mua tshibuikilu to; ne wakamona munu wa Yezu, ne pakawumonaye, wakapona bua bôwa; bualu uvua mumanya ne uvua munu wa Mukalenga; ne katshivua kabidi ne ditabuija to, bualu uvua mumanya, kayi ne mpata nansha.

20 Bua nanku, muikala ne dimanya dijima edi dia Nzambi, kavua mua kupangishibua bua kumona munda mua tshibuikilu to; bua nanku wakamona Yezu; ne Yezu wakamusadila.

21 Ne biakalua ne Mukalenga wakambila muanabu ne Yalede wa baluma ne: Mona, kuakulekela ne bintu ebi biwudi mumona ne mumvua ebi biya kudi ba pa buloba to, tô ne palua diba dingatumbisha dîna dianyi mu musunyi; bua nanku, ubutshila bintu biwamonyi ne biwumvu, ne kubileji muntu nansha umua to.

22 Ne mona, pawalua kundi, neubifunda ne neubikanga, bua ne muntu nansha umua kamonyi mua kubiandamuna miakulu to; bualu neubifunda mu muakulu udi kawuyi mua kubadibua to.

23 Ne mona, nenkupesha mabua abidi â, ne neuakanga pamua ne bintu biwafunda.

24 Bualu mona, ndi mubuejakaja muakulu uwafunda; bua nanku nengenzeja pakumbana dianyi diba ne mabua â aleja patoka bintu biwafunda ebi ku mesu kua bantu.

25 Ne pakamba Mukalenga mêyi â, wakaleja muanabu ne Yalede wa baluma bena pa buloba bonsu bavuaku, ne kabidi bonsu bikalaku, ne kakabapala ku mesu enda to, mena tô ne ku ndekelu ya buloba.

26 Bualu uvua muamba kudiye misangu mishala ne, biamuitabuijaye ne uvua mua kumuleja malu onsu—nealejibua kudiye; bua nanku Mukalenga kavua mua kumupala bualu nansha bumua to, bualu uvua mumanya ne Mukalenga uvua mua kumuleja malu onsu.

27 Ne Mukalenga wakamuambila ne: Funda bintu ebi ne ubikanga; ne nembileja kudi bana ba bantu pakumbana dianyi diba.

28 Ne biakalua ne Mukalenga wakamupesha mukenji ne, akanga mabua abidi avuaye mupeta, ne ka’aleji to, tô ne pa’aleja Mukalenga kudi bana ba bantu.