Shapita 4
Moloni udi upeta mukenji bua kukanga mifundu ya muanabu ne Yalede wa baluma—Kayakumanyishibua to tô ne papeta bantu ditabuija bu muvua dia muanabu ne Yalede wa baluma—Kilisto udi upesha bantu mukenji bua kuitabuija miaku yenda ne ya bayidi benda—Bantu badi bapeta mukenji bua kukudimuna mutshima, kuitabuija lumu luimpa, ne kupandishibua.
1 Ne Mukalenga wakapesha muanabu ne Yalede wa baluma mukenji bua kutuluka ku mukuna kumpala kua Mukalenga, ne bua kufunda bintu bivuaye mumona; ne bivua bikandikibua bua kuluabi kudi bana ba bantu tô ne kunyima kua pâbandishibuaye pa mutshi mutshiamakana; ne bua bualu ebu mfumu Mosiya wakabilama, bua ne kabilu kudi ba pa buloba to tô ne kunyima kua pâdileja Kilisto kudi bantu benda.
2 Ne kunyima kua Kilisto bulelela mudileja kudi bantu benda wakabapesha mukenji ne babipatula.
3 Ne mpindiewu, kunyima kua nanku, badi bashinguluka bonsu mu dipanga dia ditabuija; ne kakuena muntu nansha umua amu pakumbusha Bena Lamana, ne bavua babenga lumu luimpa lua Kilisto; bua nanku ndi mupeta mukenji ne mbisokoka kabidi mu buloba.
4 Monayi, mvua mufunda pa bitata ebi bintu bina bivua muanabu ne Yalede wa baluma mumona; ne kakuvua kuanji kuikala bintu binena bilejibua kupita bivua Mukalenga muleja muanabu ne Yalede wa baluma to.
5 Bua nanku Mukalenga udi mumpesha mukenji wa kubifunda; ne ngabifundi. Ne wakampesha mukenji ne mbikanga; ne udi mumpesha kabidi mukenji ne nkanga buandamunyi bua miakulu buabi; bua nanku ndi mukanga biandamunyi bia miakulu, bilondeshila ku mukenji wa Mukalenga.
6 Bualu Mukalenga wakangambila ne: Kabiakuya kudi Bena Bisamba bia Benda to tô ne dituku diakudimunabu mutshima ku malu mabi abu, ne kulua ne mankenda kumpala kua Mukalenga.
7 Mukalenga udi wamba ne, ne mu dituku dienzelabu ditabuija kundi, mena bu muakenza muanabu ne Yalede wa baluma, bua ne bavuijibua bajidila kundi, pashisha, nnebamuenesha malu a kamona muanabu ne Yalede wa baluma mena ne ku dibunzuluila mabuluila anyi onsu, mudi Yezu Kilisto, Muana wa Nzambi, Tatu wa diûlu ne wa buloba wamba, ne malu onsu adi mu.
8 Ne waluisha muaku wa Mukalenga, atshipibua; ne wavila malu â, atshipibua; bualu kudibu tshiakuleja malu matamba bunena to, mudi Yezu Kilisto wamba; bualu mmema udi wakula.
9 Ne ku mukenji wanyi diûlu didi diunzuluka ne didi didikanga; ne ku dîyi dianyi, buloba nebunyungana; ne ku mukenji wanyi benamu nebafua, mena nanku bu ku kapia.
10 Ne udi kayi witabuija miaku yanyi to kena witabuija bayidi banyi to; ne bikalabi ne ntshiena ngakula to, jingululayi; bualu nenumanya ne mmema udi wakula, ku dituku dia ndekelu.
11 Kadi udi witabuija bintu bingambi ebi, yeya nemmukumbula ne mamueneka a Nyuma wanyi, ne neamanya ne neajadika. Bua bualu Nyuma wanyi, neamanya ne bintu ebi bidi bilelela; bualu bidi bitabujija bantu bua kuenza bimpa.
12 Ne tshionsu kayi tshidi tshitabujija bantu bua kuenza buimpa tshidi tshia kundi; bualu bimpa kabiena bifumina kudi nansha umua to amu bikalabi kundi. Ndi wa momumua udi ulombola bantu ku buimpa bonsu; wabenga kuitabuija miaku yanyi kakungitabuija to—ne ndiku; ne wabenga kungitabuija kakuitabuija Tatu udi muntuma to. Bualu monayi, ndi Tatu, ndi bukenka, ne moyo, ne bulelela bua ba pa buloba.
13 Luayi kundi, Ô nuenu Bena Bisamba bia Benda, ne nenuleja bintu bipita bunena, dimanya didi disokoka bua bualu bua dipanga ditabuija dienu.
14 Luaku kundi, Ô nzubu wa Isalele, ne nenkumuenesha bunena bua bintu bivua Tatu mukutekela, katshia ku tshishimikidi tshia buloba; ne kabivua bilua kûdi to bua bualu bua dipanga ditabuija.
15 Mona, pawapanda tshibuikilu tshia dipanga ditabuija tshidi tshikushadisha mu ngikadilu weba wa bubi udi utshinyisha bikola, ne wa bupapa bua mutshima, ne wa bumpofu bua meji, pashisha nenumanya bintu binena ne bia dikema bivua bikala bisokoka kûdi katshia ku tshishimikidi tshia buloba—eyowa, pawabikila Tatu mu dîna dianyi, mutshima mutshibuluka ne nyuma munyingalala, pashisha neumanya ne Tatu wavuluki tshipungidi tshidiye muenza ne batatueba, Ô nzubu wa Isalele.
16 Ne pashisha mabuluila anyi andi mufundisha kudi musadidi wanyi Yone ajinguludibua ku mesu a bantu bonsu. Vuluka, pawamona bintu ebi, neumanya ne diba dikadi pabuipi bimueshibuabi bulelela.
17 Bua nanku, pawapeta mifundu eyi neumanya ne mudimu wa Tatu watuadiji pa mpala onsu wa bulaba.
18 Bua nanku, kudimunayi mutshima nuenu bonsu ndekelu ya buloba, ne luayi kundi, ne itabuijayi lumu luimpa luanyi, ne tambuishibuayi mu dîna dianyi; bualu udi witabuija ne udi mutambuishibua neapandishibua; kadi udi kayi witabuija to neapîshibua; ne bimanyinu nebilonda badi bitabuija mu dîna dianyi.
19 Ne mubeneshibua ngudi usanganyibua ne lulamatu ku dîna dianyi ku dituku dia ndekelu, bualu neabandishibua bua kusomba mu bukalenga budi bulongolola buenda katshia ku tshishimikidi tshia buloba. Ne monayi mmema udi wambi nanku. Amena.