1 Ne mpindiewu, mema Moloni, ndi ntungunuka ne kufunda kua mifundu ya Yalede ne muanabu wa baluma.

2 Bualu biakalua ne pakalongolola Mukalenga mabua avua muanabu ne Yalede wa baluma muya nawu pa mukuna, muanabu ne Yalede wa baluma wakatuluka ku mukuna, ne wakateka mabua munda mua mâtu avua malongolodibua, dimua mu lusongu luawu lonsu; ne monayi, akafila bukenka munda mua mâtu.

3 Ne nanku Mukalenga wakakenkeshisha mabua mu mîdima nanku, bua kupesha bukenka kudi bantu baluma, bantu bakaji ne bana, bua kabasambuki mâyi manena mu mîdima to.

4 Ne biakalua ne pakalongololabu mishindu yonsu ya biakudia, nanku bua badidisha pa mutu pa mâyi, ne biakudia kabidi bua bisumbu bia bimuna bikesa ne binena biabu, ne nyama ya muitu yonsu anyi nyama mimuna yonsu, anyi nyunyi yonsu biayabu nabi—ne biakalua ne pakenzabu bintu bionsu ebi bakabuela mu mâtu abu anyi mu bibeya biabu, ne bakâsa luendu mu mbuwa bikala badishiya kudi Mukalenga Nzambi wabu.

5 Ne biakalua ne Mukalenga Nzambi wakajudisha lupepela lukola pa mpala wa mâyi, lutangila ku bulaba bulaya; ne ki muakabatenkakaja mavuala a mbuwa kumpala kua tshipepela.

6 Ne biakalua ne bakajîkibua misangu ya bungi mu ndondu ya mbuwa, bua mikuna ya mavuala ivua ibakulukila, ne kabidi bipepela binena ne bitshinyisha bivua bifumina ku bukola bua lupepela.

7 Ne biakalua ne pakajîkibuabu muinshi kakuvua mâyi avua mua kubenzela bibi to, bualu mâtu abu avua mikala malamakana bu mudi dilongu, ne kabidi avua malamakana bu mudi buatu bua Noa; bua nanku pakabanyungulula mâyi a bungi bakabila kudi Mukalenga, ne wakabatuala kabidi pa mutu pa mâyi.

8 Ne biakalua ne lupepela kalua kalekela kupepa lutangila ku bulaba bulaya patshivuabu pa mutu pa mâyi nansha; ne ki muakabasaka lupepela kumpala nanku.

9 Ne bakimba misambu bua kusamuna Mukalenga; eyowa, muanabu ne Yalede wa baluma wakimba misambu bua kusamuna Mukalenga, ne wakasakidila ne wakasamuna Mukalenga dituku dionsu dijima; ne pakalua butuku, kabakalekela kusamuna Mukalenga to.

10 Ne ki muakasakibuabu kumpala nanku; ne tshikulukuku tshia mu mbuwa nansha tshimua katshivua mua kuatshibula to, anyi mushipa munena wa mu mâyi nansha umua kawuvua mua kubenzela bibi to; ne bavua ne bukenka diba dionsu, ne bivua bikala pa mutu pa mâyi anyi muinshi mua mâyi.

11 Ne ki muakasakibuabu kumpala nanku, matuku nkama isatu ne makumi anayi ne anayi pa mâyi.

12 Ne bakafika ku muelelu wa mâyi a bulaba bulaya. Ne pakadiatabu makasa abu pa muelelu wa mâyi a bulaba bulaya bakinama pa mpala wa bulaba, ne bakadipuekesha kumpala kua Mukalenga, ne bakamatshisha binsonji bua disanka kumpala kua Mukalenga, bua bungi bua midimu mimpa ya lusa luenda kudibu.

13 Ne biakalua ne bakaya pa mpala wa bulaba, ne bakabanga kudima buloba.

14 Ne Yalede wakapeta bana ba baluma banayi; ne bavua babikidibua ne Yakoma, ne Giliga, ne Maha, ne Oliha.

15 Ne muanabu ne Yalede wa baluma wakalela penda bana ba baluma ne bana ba bakaji.

16 Ne balunda ba Yalede ne ba muanabu wa baluma bavua bungi bua pabuipi ne bantu makumi abidi ne inayi; ne bavua pabu balela bana ba baluma ne bana ba bakaji kumpala kua kuluabu ku bulaba bulaya; ne bua nanku bakabanga kuikala ba bungi.

17 Ne bakabalongesha mua kuenda mu didipuekesha kumpala kua Mukalenga; ne bakabalongesha kabidi kumbukila mu kulu.

18 Ne biakalua ne bakabanga kutangalaka pa mpala wa bulaba, ne kuvulangana ne kudima buloba; ne bakakolakana mu bulaba.

19 Ne muanabu ne Yalede wa baluma wakabanga kulua mununu, ne wakamona ne uvua katataka ne tshia kubuela mu lukita; bua nanku wakambila Yalede ne: Tusangishayi bantu betu bua ne tubabala, bua ne tumanya tshidibu bajinga kutudi kumpala kua tuetu kubuela mu nkita yetu.

20 Ne bakasangisha bantu pamua nanku awu. Mpindiewu bungi bua bana ba baluma ne bana ba bakaji ba muanabu ne Yalede wa baluma bavua bantu makumi abidi ne ibidi; ne bungi bua bana ba baluma ne bana ba bakaji ba Yalede bavua dikumi ne babidi, bu muvuaye ne bana ba baluma banayi.

21 Ne biakalua ne bakabala bantu babu; ne kunyima kua kubabalabu, bakajinga kudibu bintu bivuabu basua ne benza kumpala kua bobu kubuela mu nkita yabu.

22 Ne biakalua ne bantu bakajinga kudibu ne balâba umua wa ku bana babu ba baluma manyi bua kuikala mfumu ku mutu kuabu.

23 Ne mpindiewu monayi, etshi tshivua tshikola kudibu. Ne muanabu ne Yalede wa baluma wakabambila ne: Bushuwa tshintu etshi tshidi tshibalombola ku bukuatshibu.

24 Kadi Yalede wakambila muanabu wa baluma ne: Anyisha ne bikala ne mfumu. Ne bua nanku wakabambila ne: Sungulayi mfumu munkatshi mua bana ba baluma betu, mena unudi basua.

25 Ne biakalua ne bakasungula muana wa kumpala wa muanabu ne Yalede wa baluma; ne dîna dienda divua Pagaga. Ne biakalua ne kakasua to, ne wakabenga kuikala mfumuabu. Ne bantu bakasua ne tatuenda amuenzeja ku bukola, kadi tatuenda wakabenga; ne wakabapesha mukenji ne kabenzeji muntu nansha umua ku bukola bua kuikala mfumuabu to.

26 Ne biakalua ne bakasungula bana babu ne Pagaga ba baluma bonsu, ne bakabenga.

27 Ne biakalua ne nansha bana ba baluma ba Yalede bakabenga pabu, bonsu mena amu pa kumbusha umua; ne muanabu ne Yalede wakalâba Oliha manyi bua kuikala mfumu pa mutu pa bantu.

28 Ne wakabanga kukôkesha, ne bantu bakabanga kulubuluka; ne bakalua babanji menamena.

29 Ne biakalua ne Yalede wakafua, ne muanabu wa baluma penda.

30 Ne biakalua ne Oliha wakenda ne didipuekesha kumpala kua Mukalenga ne wakavuluka bunena bua malu avua Mukalenga muenzela tatuenda, ne wakalongesha kabidi bantu benda bunena bua malu avua Mukalenga muenzela batatuabu.