1 Ne biakalua ne kuakenzeka ditapulukangana munkatshi mua bantu, mua ne bakatapulukangana eku ne eku ne bakaya njila mishilangana, bashiya Nefi nkayenda, pavuaye muimana munkatshi muabu.

2 Ne biakalua ne Nefi wakaya wenda njila mutangila ku nzubu kuenda, unana meji bua bintu bivua Mukalenga mumuleja.

3 Ne biakalua pavuaye unana meji nanku—ne uvua muteketa bikola munda muenda bua bubi bua bantu ba Bena Nefi, midimu yabu ya musokoku ya mîdima, ne kushipa kua bantu kuabu, ne kupawula kua bintu kuabu, ne mishindu yonsu ya malu mabi—ne biakalua pavuaye unana meji mu mutshima wenda nanku, monayi, wakumvua dîyi diamba ne:

4 Udi mubeneshibua, Nefi, bua bintu abi biwudi muenza; bualu ndi mumona mûdi mumanyisha dîyi dianyi, dindi mukupesha, kudi bantu aba, kuyi utshioka to. Ne kuena mubatshina to, ne kuena mukeba moyo weba nkayawu to, kadi udi mukeba disua dianyi, ne bua kulama mikenji yanyi.

5 Ne mpindiewu, bualu udi muenza nanku kuyi utshioka to, mona, nenkubenesha bua kashidi; ne nenkuvuija wa ngulu mu muaku ne mu bienzedi, mu ditabuija ne mu midimu; eyowa, mena bua ne bintu bionsu nebikuenzekela bilondeshila ku muaku weba, bualu kuakulomba tshidi tshishilangana ne disua dianyi to.

6 Mona, udi Nefi, ne ndi Nzambi. Mona, ndi nkumanyisha kumpala kua banjelu banyi, ne newikala ne bukôkeshi pa mutu pa bantu aba, ne neutûta buloba ne tshiyola, ne ne tshipupu, ne dinyanguka, bilondeshila ku bubi bua bantu aba.

7 Mona, ndi nkupesha bukôkeshi, bua ne tshionsu tshiwasuika pa buloba netshisuikibua mu diûlu; ne tshionsu tshiwasulula pa buloba netshisuludibua mu diûlu; ne nanku newikala ne bukola munkatshi mua bantu aba.

8 Ne nanku, pawambila ntempelo ewu ne neapandika pankatshi-nkatshi, nebienzeka.

9 Ne pawambila mukuna ewu ne, Kuluka panshi ne ulua bula bumua ne buloba budi panshi, nebienzeka.

10 Ne mona, bu wewa bua kuamba ne Nzambi neatûta bantu aba, nebilua.

11 Ne mpindiewu mona, ndi nkutuma, ne uya ne umanyisha bantu aba, ne Mukalenga Nzambi udi wa Bukitu Bonsu udi wamba nanku: Pa kumbusha nuenu bakudimuna mutshima nenutûtshibua, mena tô ne ku dibutuka.

12 Ne monayi, mpindiewu biakalua ne pakamba Mukalenga mêyi â kudi Nefi, wakimana ne kakaya ku nzubu wenda to, kadi wakapingana kudi misumba ya bantu bavua batangalaka konsu pa mpala wa bulaba, ne wakabanga kuyisha dîyi dia Mukalenga divua dimuambila, bitangila dibutuka diabu bu bobu kabayi bakudimuna mutshima to.

13 Mpindiewu monayi, nansha muvuaku tshishima tshinena tshivua Nefi muenza tshia kubambila bitangila lufu lua mulumbuluishi munena, bakapapisha mitshima yabu ne kaba kumvuila mêyi a Mukalenga to.

14 Bua nanku Nefi wakabayisha dîyi dia Mukalenga, wamba ne: Mukalenga udi wamba ne, pa kumbusha nuenu bakudimuna mutshima, nenutûtshibua tô ne ku dibutuka.

15 Ne biakalua ne pakabayisha Nefi dîyi, monayi, batshivua bapapisha mitshima yabu ne bakabenga kuteleja mêyi enda; bua nanku bakamupenda, ne bakakeba bua kumukuata bua kumuelabu mu buloko.

16 Kadi monayi, bukola bua Nzambi buvua nenda, ne kabavua mua kumuela mu buloko to, bualu wakumbushibua kudi Nyuma ne wakapatudibua munkatshi muabu.

17 Ne biakalua ne wakaya nanku mu Nyuma, ku musumba wa bantu ne ku musumba wa bantu, uyisha dîyi dia Nzambi, mena tô ne pakayishaye bantu bonsu, anyi pakaditumaye munkatshi mua bantu bonsu.

18 Ne biakalua ne bakabenga kuteleja mêyi enda; ne kuakabanga kuikala makokangana, mua ne bakabulukangana kabidi ne bakabanga kushipangana ne muela wa mvita.

19 Ne tshidimu tshia makumi muanda muteketa ne tshia kumpala tshia dikôkesha dia balumbuluishi pa mutu pa bantu ba Nefi tshiakajika nanku.