1 Ne mpindiewu biakalua ne mu tshidimu tshia makumi muanda muteketa ne tshibidi tshia dikôkesha dia balumbuluishi makokangana akavulangana, mua ne kuvua mvita mu bulaba bonsu munkatshi mua bantu ba Nefi.

2 Ne tshisumbu tshia musokoku tshia banyengi etshi ki tshivua tshienza mudimu ewu wa dibutuka ne wa bubi. Ne mvita eyi ivuaku tshidimu tshionsu atshi; ne mu tshidimu tshia makumi muanda muteketa ne tshisatu ivuaku kabidi.

3 Ne biakalua ne mu tshidimu etshi Nefi wakabila kudi Mukalenga, wamba ne:

4 Ô Mukalenga, kulekedi ne bantu aba babutuka ku muela wa mvita to; kadi Ô Mukalenga, kadi lekela kuikala tshiyola mu bulaba, bua kubasonsola ku divuluka dia Mukalenga Nzambi wabu, ne pamuapa nebakudimuna mutshima ne balua kûdi.

5 Ne biakenzeka nanku, bilondeshila ku mêyi a Nefi. Ne kuvua tshiyola tshinena pa bulaba, munkatshi mua bantu bonsu ba Nefi. Ne nanku mu tshidimu tshia makumi muanda muteketa ne tshinayi tshiyola tshiakatungunuka, ne mudimu wa lufu ku muela wa mvita wakajika kadi wakalua mukola bua tshiyola.

6 Ne mudimu wa lufu ewu wakatungunuka kabidi mu tshidimu tshia makumi muanda muteketa ne tshitanu. Buloba buvua butûtshibua bua ne buvua bûma, ne kabuakela nteta mu tshikondu tshia nteta to; ne buloba bujima buvua butûtshibua, mena munkatshi mua Bena Lamana ne munkatshi mua Bena Nefi, butûtshibua bua ne bakafua mu binunu mu bitupa bia bulaba bivua bantu bapita bubi.

7 Ne biakalua ne bantu bakamona ne bavua pabuipi ne kufua bua tshiyola, ne bakabanga kuvuluka Mukalenga Nzambi wabu; ne bakabanga kuvuluka mêyi a Nefi.

8 Ne bantu bakabanga kusengelela balumbuluishi banena ne balombodi babu, ne bambila Nefi ne: Mona, tudi bamanya ne udi muntu wa Nzambi, ne bua nanku, bila kudi Mukalenga Nzambi bua atumbushila tshiyola etshi, bua mêyi onsu awuvua mutuambila bitangila dibutuka dietu kayilu kuenzeka to.

9 Ne biakalua ne balumbuluishi bakambila Nefi, bilondeshila ku mêyi avua majingibua. Ne biakalua ne pakamona Nefi ne bantu bavua bakudimuna mutshima ne bakadipuekesha bavuala bikunyi, wakabila kudi Mukalenga, wamba ne:

10 Ô Mukalenga, mona bantu aba bakudimunyi mutshima; ne bakombi tshisumbu tshia Gadiantona munkatshi muabu mua ne babutuki, ne bajîki malongolola abu a musokoku mu buloba.

11 Mpindiewu, Ô Mukalenga, suaku umbusha tshiji tshieba bua didipuekesha diabu edi, ne tshiji tshieba tshitudijibua bua dibutuka dia bantu babi aba bawukadi mumana kubutula.

12 Ô Mukalenga, suaku ulekela tshiji tshieba, eyowa, tshiji tshieba tshikola, ne wenza ne tshiyola etshi tshijika mu bulaba ebu.

13 Ô Mukalenga, suaku uteleja kundi, ne wenza ne bienzeka bilondeshila ku mêyi anyi, ne utuma mvula pa mpala wa buloba, bua bukuama bimuma buabu, ne nebuela nteta yabu mu tshikondu tshia nteta.

14 Ô Mukalenga, wakateleja mêyi anyi pangakamba ne, Lekela kuikala tshiyola, bua tshipupu tshia muela wa mvita tshijika; ne ndi mumanya ne, nansha musangu ewu, neuteleja mêyi anyi, bualu wakamba ne: Bantu aba bobu bakudimuna mutshima, nembepelesha.

15 Eyowa, Ô Mukalenga, ne udi mumona ne bakudimunyi mutshima, bua tshiyola ne tshipupu ne dibutuka bivua bibavuila.

16 Ne mpindiewu, Ô Mukalenga, udi muakusua kulekela tshiji tshieba, ne kutêta kabidi bua kumona bialuabu kukusadila anyi? Ne pikalabu benza nanku, Ô Mukalenga, udi mua kubabenesha bilondeshila ku mêyi eba awuvua muamba.

17 Ne biakalua ne mu tshidimu tshia makumi muanda muteketa ne tshisambombo Mukalenga wakalekelela bantu tshiji tshienda, ne wakalokesha mvula pa buloba, mua ne buakakuama bimuma biabu mu tshikondu tshia bimuma biabu. Ne biakalua ne buakela nteta yabu mu tshikondu tshia nteta yabu.

18 Ne monayi, bantu bakasanka ne kutumbisha Nzambi, ne mpala mujima wa bulaba uvua muwula ne disanka; ne kabakakeba kabidi bua kushipa Nefi to, kadi bakamubala bu muambi munena, ne muntu wa Nzambi, muikala ne bukola ne bukôkeshi bimupesha kudi Nzambi.

19 Ne monayi, Lehi, muanabu wa baluma, kavua mushadila panyima penda nansha kakesa to bua malu adi matangila buakana.

20 Ne nanku bifikila ne bantu ba Nefi bakabanga kulubuluka kabidi mu buloba, ne bakabanga kuibakulula miaba yabu ivua mishala bikulu, ne bakabanga kuvulangana ne kutangalaka, mena tô ne pakabuikilabu mpala mujima wa bulaba, ku node ne ku sude, kufuma ku mbuwa wa ku wesete tô ne ku mbuwa wa ku esete.

21 Ne biakalua ne tshidimu tshia makumi muanda muteketa ne tshisambombo tshiakajika mu ditalala. Ne tshidimu tshia mukumi muanda muteketa ne muanda muteketa tshiakabanga mu ditalala; ne ekelezia wakatangalaka pa mpala wa buloba bonsu; ne tshitupa tshinena tshia bantu, ku Bena Nefi ne ku Bena Lamana, tshiakabuela mu ekelezia; ne bavua ne ditalala dipita bunena mu bulaba; ne tshidimu tshia makumi muanda muteketa ne muanda muteketa tshiakajika nanku.

22 Ne bavua ne ditalala kabidi mu tshidimu tshia makumi muanda muteketa ne muanda mukulu, pa kumbusha bua makokangana makesa bitangila bitupa bia dilongesha divua bambi bateka.

23 Ne mu tshidimu tshia makumi muanda muteketa ne tshinayi kuakabanga kuikala luntûta lua bungi. Kadi biakalua ne Nefi ne Lehi, ne bangi ba ku balombodi nabu ba mu ekelezia bavua bamanya bitangila malu malelela a dilongesha, muvuabu bapeta mabuluila a bungi dituku dionsu, bua nanku bakayisha kudi bantu, mua ne bakajikija luntûta luabu mu tshidimu tshia momumua atshi.

24 Ne biakalua ne mu tshidimu tshia makumi muanda mukulu tshia dikôkesha dia balumbuluishi pa mutu pa bantu ba Nefi, kuvua bungi kampanda bua ku batapuluki ba ku bantu ba Nefi, bavua bimua bidimu bishala baya kudi Bena Lamana, ne badiangatshila dîna dia Bena Lamana, ne kabidi bungi kampanda buvua buikala tunkanunuina tulelela tua Bena Lamana, bikala basonsodibua ku tshiji kudibu, anyi kudi batapuluki abu, bua nanku bakatuadija mvita ne bana babu.

25 Ne bakashipa bantu ne bakapawula bintu; ne pashisha bavua bapingana mu mikuna, ne mu tshipela ne miaba ya musokoku, badisokoka bua kababajandudi to, ne bavua bapeta bakuabu balua kudisangisha kudibu dituku dionsu, monsu muvuaku batapuluki baya kudibu.

26 Ne nanku panyima, eyowa, mena mu mutantshi wa bidimu bikesa, bakavua tshisumbu tshinena menamena tshia banyengi; ne bakakebakeba malongolola a musokoku a Gadiantona onsu; ne bakalua banyengi ba Gadiantona.

27 Mpindiewu monayi, banyengi aba bakatuala tshinyangu tshinena, eyowa, mena lufu lunena munkatshi mua bantu ba Nefi, ne kabidi munkatshi mua bantu ba Bena Lamana.

28 Ne biakalua ne bivua bikengedibua ne mudimu wa lufu ewu wimanyikibua; bua nanku bakatuma musumba wa basalayi ba makanda mu tshipela ne ku mikuna bua kukebakeba tshisumbu tshia banyengi etshi, ne bua kubabutula.

29 Kadi monayi, biakalua ne mu tshidimu tshimuetshimua atshi bakabapingaja ku malaba abu nkayabu. Ne tshidimu tshia makumi muanda mukulu tshia dikôkesha dia balumbuluishi pa mutu pa bantu ba Nefi tshiakajika nanku.

30 Ne biakalua ne ku ntuadijilu wa tshidimu tshia makumi muanda mukulu ne tshia kumpala bakaya kabidi kuluisha tshisumbu tshia banyengi etshi, ne bakashipa ba bungi; ne bakakumbudibua pabu ne lufu lua bungi.

31 Ne bavua benzejibua kabidi bua kulopoka mu tshipela ne mu mikuna bua kupingana ku malaba abu nkayabu, bua bualu bua bungi bupita bua banyengi abu bavua buwula mu mikuna ne tshipela.

32 Ne biakalua ne tshidimu tshiakajika nanku. Ne banyengi batshivua amu bavulangana ne bakakolakana, mua ne bakatshimuna misumba mijima ya basalayi ya Bena Nefi, ne ya Bena Lamana kabidi; ne bakapesha bantu ba Nefi bôwa pa mpala onsu wa bulaba.

33 Eyowa, bualu bakaya mu bitupa bia bungi bia bulaba, ne bakababutula bikola; eyowa, bakashipa ba bungi, ne bakaya ne bakuabu bakuatshibu mu tshipela, eyowa, ne nangananga bakaji babu ne bana babu ba bungi.

34 Mpindiewu bubi bunena ebu, buvua buvuila bantu bua malu mabi abu, buakabasonsola bua kuvulukabu Mukalenga Nzambi wabu.

35 Ne tshidimu tshia makumi muanda mukulu ne tshia kumpala tshia dikôkesha dia balumbuluishi tshiakajika nanku.

36 Ne mu tshidimu tshia makumi muanda mukulu ne tshibidi bakabanga kabidi kupua Mukalenga Nzambi wabu moyo. Ne mu tshidimu tshia makumi muanda mukulu ne tshisatu bakabanga kukolakana mu malu mabi. Ne mu tshidimu tshia makumi muanda mukulu ne tshinayi kabakalongolola ngikadilu yabu to.

37 Ne biakalua ne mu tshidimu tshia makumi muanda mukulu ne tshitanu bakatamba kukolakana mu diditambisha diabu, ne mu bubi buabu; ne nanku bakavua baboba nanku kabidi bua dibutuka.

38 Ne tshidimu tshia makumi muanda mukulu ne tshitanu tshiakajika nanku.