1 Tan natan agawa dia ed komapitomplo tan dua a taon ya oley na saray okom say baliñgaan so dinmakel, a dia ed saya wala so saray bakal ed amin a lapag na dalin ed limog na amin a totoo nen Nephi.

2 Tan saraman so maamot ya olop na saray matatakew so mañgikokurang ed saya a kimey na panagderal tan karelmeñgan. Tan saya a bakal so nampatuloy ed loob na saman a taon; tan dia ed komapitomplo tan talo a taon saya so nampatuloy met ni.

3 Tan agawa a dia ed saya a taon si Nephi nannañgis ed Katawan, a nankuan:

4 O Katawan, ag mo aabuloyan a saya a totoo so naderal ed panamegley na espada; balet O Katawan, magmaong ni a wala so eras ed lapag na saya a dalin, pian sikara so ongalaw ed pakanunot ed Katawan a Dios da, tan ag la piga sikara so mambabawi tan ompawil ed sika.

5 Tan saya so agawa, unong ed saray salita nen Nephi. Tan wala so baleg ya eras ed dalin, ed amin a limog na saray totoo nen Nephi. Tan dia ed onia ed komapitomplo tan apat a taon say eras so nampatuloy, tan say kimey na kadederal so tinmonda ed panamegley na espada balet nanmaliw ya ansakit makaseñgeg ed eras.

6 Tan saya a kimey na kadederal so nampatuloy ed komapitomplo tan lima a taon. Tan say dalin so abakbak kanian amagaan, tan ag nambuñga ed panaon na dawa; tan say lapag na dalin so abakbak, anga ed limog na saray Lamanite tan ontan met ed limog na saray Nephite, sikara so abakbak kanian nilibo ed sikara so inaatey dia ed saray lalo a marelmeng a pasen na dalin.

7 Tan agawa a saray totoo anengneng da a ñgalñgali la ra ompatey lapu ed eras, tan ginapoan da a nanunotan so Katawan a Dios da; tan ginapoan da met ya anunotan so saray salita nen Nephi.

8 Tan saray totoo ginapoan da so mikasi ed pañgulo ya okom tan saray manañgipañgulo ra, pian sikara so mañgikuan ed kinen Nephi: Nia, kabat mi a sika so too na Dios, tan dia ed ontan kerew ka ed Katawan a Dios tayo ya iarawi to la ed sikatayo so saya ya eras, ompano amin a salita ya imbalikas mo nipaakar ed kaderal mi so nasumpal.

9 Tan agawa a saray okom imbaga ra ed si Nephi, so saray salita a pilalek da. Tan agawa sanen anengneng nen Nephi a saray totoo so nambabawi tan nampaabeba ra ed inkasikara a dili a mapalalo, sikato so nannañgis lamet ed Katawan, a nankuan:

10 O Katawan, nia saya a totoo so nambabawi; tan dineral da la so olop nen Gadianton ed limog da angan sikara so sigpot naandi la, tan iniamot da la so saray maamot a plano ra ed dalin.

11 Natan, O Katawan, lapu ed saya ya impampaabeba ra iarawim pa so pasnok mo, tan ombetel la so pasnok mo ed inkaderal na saray marelmeng a totoo a sikara so dineral mo la.

12 O Katawan, iyarawim pa komon so pasnok mo, on, say masebeg a pasnok mo, tan gawam a saya ya eras so ontonda la ed saya a dalin.

13 O Katawan, siak pa so deñgelen mo, tan abuloyan mo komon a saya so nagawa unong ed saray salitak, tan mañgibaki ka na uran ed tapew na dalin, pian mañgiter na saray buñga to, tan saray dawa to ed panaon na panagdadawa.

14 O Katawan, dineñgel mo so saray salitak sanen ikuan ko, Wala so eras, pian say salot na espada so ontonda la; tan kabat ko, angan dia ed saya a panaon, a deñgelen mo so saray salitak, tan inkuan mo a: No saya a totoo so mambabawi sikato so iligyas ko.

15 On, O Katawan, tan anengneng mo a sikara so nambabawi la, lapu ed eras tan say salot tan inkaderal a sinmabi ed sikara.

16 Tan natan, O Katawan, iarawim pa la so pasnok mo, tan subok mo ra lamet no sika so panlingkoran da? Tan no onia, O Katawan, nayarian mo la ra a bendicionan unong ed saray salitam ya imbalikas mo.

17 Tan agawa dia ed komapitomplo tan anem a taon say Katawan inarawi to so pasnok to ed saray totoo, tan ingangan to so uran ya ompelag ed dalin, a dia ed saya so añgiter na saray buñga dia ed panaon na panagbuñga. Tan agawa a saya so añgiter na saray dawa to ed panaon na panagdadawa to.

18 Tan nia, nangayaga so saray totoo tan ingalang da so Dios, tan say amin a tapew na dalin so napno na gayaga; tan ag da la inanap a deralen si Nephi, balet sikato so pinabli ra a sakey a baleg a profeta, tan sakey a too na Dios, ya awalaan na baleg a pakapanyari tan pakaoley a niiter ed sikato a nanlapu ed Dios.

19 Tan nia, si Lehi, ya agi to, ag met natitilak no nipaakar ed saray beñgatla ed inkamatunong.

20 Tan dia ed onia agawa a saray totoo nen Nephi ginmapo ra ya inmaliguas lamet ed dalin, tan ginapoan da a paalageyan so saray andi-kakanaan a pasen da, tan ginapoan da so ondakel tan ontayak, ya anga ed alaknaban da so amin a dalin, mandapag a mamabaybay tan dia ed mamaabalaten, manlapu ed sagur a dayat ya anga ed bokig a dayat.

21 Tan agawa a say komapitomplo tan anem a taon so nansampot ed kareenan. Tan say komapitomplo tan pito a taon so ginmapo ed kareenan; tan say simbaan so tinmayak ed amin a tapew na dalin; tan say karaklan ed saray totoo, mandapag a saray Nephite tan saray Lamanite, so miembro na simbaan; tan awalaan ira na mapalalo a baleg a kareenan ed dalin; tan dia ed onia so impansampot na komapitomplo tan pito a taon.

22 Tan awalaan met ira na kareenan ed komapitomplo tan walo a taon, likud ed pigara a baliñgaan nipaakar ed pigara a datak na doctrina ya initer na saray profeta.

23 Tan dia ed komapitomplo tan siam a taon wala so ginmapo a dakel a sebegan. Balet agawa a si Nephi tan si Lehi, tan dakel ed saray kaagian da a makaamta nipaakar ed tua a datak na saray doctrina, lapu ed akaawat ira na dakel a puyan ya inagew-agew, dia ed ontan sikara so nampulong ed saray totoo, a dia ed saya nansampot so saray sebegan da ed saman met lamlamang a taon.

24 Tan agawa dia ed komawalomplo a taon ya oley na saray okom ed saray totoo nen Nephi, wala so pigara a bilang na saray sinmisian ed totoo nen Nephi, a pigara a taon la so apalabas nen sikara so linma ed saray Lamanite, tan inala ra ed inkasikara so ñgaran a Lamanite, tan wala met so pigara a bilang a sikara so peteg a kailalakan na saray Lamanite, lapu ed sikara so apagalaw da ra a mampasnok, odino saraman so sinmisian, dia ed ontan ingapo ra so bakal ed saray kaagian da.

25 Tan sikara so nangawa na panagpatey tan panagsamsam; tan sikara so onsener ed kapalandeyan, tan dia ed kalawakan tan saray maamot a pasen da, ya iamot da so inkasikara pian ag ira nasukayan, ya inagew-agew naaawat da so onaarum ed saray bilang da, ya angan wala so saray sinmisian a linma ya akitipon ed sikara.

26 Tan ag abayag a panaon, on, ed baetan na aliwa a dakel a taon, sikara so nanmaliw a mapalalo a baleg ya olop na saray matatakew; tan sinokait da ya amin so saray maamot a plano nen Gadianton; tan dia ed onia sikara so nanmaliw a matatakew nen Gadianton.

27 Natan nia, saraya a matatakew baleg so deral a ginawa ra, on, angan baleg a deral ed limog na saray totoo nen Nephi, tan ontan met ed limog na saray totoo a Lamanite.

28 Tan agawa ya nakaukolan ya ontonda so saya a kimey na panagderal; dia ed ontan sikara so añgibaki na ñgayew na mabibiskeg a totoo ed kalawakan tan dia ed saray kapalandeyan pian mananap ed saya ya olop na matatakew, tan deralen da ra.

29 Balet nia, agawa a dia ed saman a taon sikara so adagdag a papawil ed dili a dalin da. Tan dia ed onia so impansampot na komawalomplo a taon ya oley na saray okom ed saray totoo nen Nephi.

30 Tan agawa dia ed gapo na komawalomplo tan sakey a taon sikara so linma lamet sumpa ed saya ya olop na saray matatakew, tan dakel so saray aderal da; tan sikara met so dinalaw na baleg a kadederal.

31 Tan sikara so apasuotan lamet a pinmawil ed saray kalawakan tan manlapu ed saray kapalandeyan a paarap ed saray dili a dalin da, lapu ed mapalalo a kinarakel na saraman so matatakew a manaayam ed kapalandeyan tan dia ed kalawakan.

32 Tan agawa ya onia so impansampot na saya a taon. Tan dinmakel ni so saray matatakew tan binmiskeg ira, a dia ed saya ag ira tinmakot ed amin a ñgayew na saray Nephite, tan ontan met ed saray Lamanite; tan sikara so señgegan na baleg a takot a sinmabi ed saray totoo ed amin a tapew na dalin.

33 On, lapu ed sikara so dinmalaw ed dakel a pasen na dalin, tan nangagawa ra na baleg a panagderal ed sikara; on, dakel so saray pinapatey da, tan inaawit da so saray arum a dinakep ed kalawakan, on, lalo la ed saray bibii tan saray anak da.

34 Natan saya a baleg a kaugsan, a sinmabi ed saray totoo lapu ed karelmeñgan da, so amagalaw ed sikara lamet a makanunot ed Katawan a Dios da.

35 Tan dia ed onia so impansampot na komawalomplo tan sakey a taon ya oley na saray okom.

36 Tan dia ed komawalomplo tan dua a taon ginapoan da lamet ya ilingwan so Katawan a Dios da. Tan dia ed komawalomplo tan talo a taon ginapoan da so ombiskeg ed karelmeñgan. Tan dia ed komawalomplo tan apat a taon ag da ni inapiger so saray kagagawa ra.

37 Tan agawa ed komawalomplo tan lima a taon sikara so binmiskeg la a binmiskeg ed saray kinon da, tan dia ed saray karelmeñgan da; tan dia ed onia sikara so asinger lamet ed kadederal.

38 Tan dia ed onia so impansampot na komawalomplo tan lima a taon.