1 Tan agawa a dia ed komalimamplo tan apat a taon dakel so saray baliñgaan ed simbaan, tan wala met so baliñgaan ed limog na saray totoo, a dia ed saya dakel so tinmerter a dala.

2 Tan saray kabiañgan ya inmaalsa so apatey tan dinagdag da ra ed paway na saman a dalin, tan sikara so linma ed ari na saray Lamanite.

3 Tan agawa a sikara so nanseet a nampagalaw ed saray Lamanite a mibakal sumpa ed saray Nephite; balet nia, saray Lamanite mapalalo so takot da, a dia ed onia ag da labay a deñgelen so salita na saray sinmisian.

4 Balet agawa dia ed komalimamplo tan anem a taon ya oley na saray okom, wala so sinmisian a nanlapu ed saray Nephite a linma ed saray Lamanite; tan sikara so tinmaluna a kaiba na saray arum kanian apagalaw da ra ya onsanok sumpa ed saray Nephite; tan legan na saman a taon namparaan ira ya onkana ed bakal.

5 Tan dia ed komalimamplo tan pito a taon sikara so linma sumpa ed saray Nephite a milaban, tan ginapoan da so kimey na patey; on, a dia ed komalimamplo tan walo a taon ya oley na saray okom sikara so tinmaluna ed pakagamor na pankayarian ed dalin na Zarahemla; on, tan ontan met ed amin a dalin, anga ed say dalin ya asinger ed dalin na Bountiful.

6 Tan saray Nephite tan saray ñgayew nen Moronihah so adagdag anga ed dalin na Bountiful;

7 Tan diman sinalimbeñgan da sumpa ed saray Lamanite, manlapu ed sagur a dayat, ya anga ed bokig; a saya so sanagew ya akaren na sakey a Nephite, manlapu ed saman a pasen a sinalimbeñgan da tan diman da impasen so saray ñgayew da a mañgiagel ed baybay a bansa ra.

8 Tan dia ed onia saraman so Nephite a sinmisian, dia ed tulong na dakel a bilang na ñgayew na saray Lamanite, agamoran da so amin a kayarian na saray Nephite a wala ed mamaabalaten. Tan saya ya amin so agawa ed saray komalimamplo tan walo tan siam a taon ya oley na saray okom.

9 Tan agawa dia ed komaanemaplo a taon ya oley na saray okom, tinmaluna si Moronihah a kaiba to so saray ñgayew to ed impakagamor to na dakel a kabiañgan na dalin; on, abawi ra so dakel a ciudad a naplag ed lima na saray Lamanite.

10 Tan agawa ed komaanemaplo tan sakey a taon ya oley na saray okom tinmaluna ra ed impakabawi na anga ed kapaldua na amin a kayarian da.

11 Natan saya a baleg ya abalang na saray Nephite, tan say dakel ya inatey ed limog da, so ag agawa no ag makaseñgeg ed karelmeñgan tan karumsisan a wala ed limog da; on, tan saya dia ed limog na saraman so mañgibabaga a sikara so miembro na simbaan na Dios.

12 Tan saya so lapu ed kinon na saray puso ra, lapu ed mapalalo a kayamanan da, on, saya so lapu ed panagpairap da ed saray duka, ya insiblet da so saray kakanen da ed saray nanaerasan, insiblet da so saray kawes da ed saray lakseb, tan binakbak da so saray mapaabeba a kaagian da ed aping, ya binalaw-balaw da so saman so sagrado, ya imburi ra so espiritu na profesiya tan puyan, panagpatey, panagtulisan, panagtila, panagtakew, pikakaloguran, baleg a pibabaliñgaan, tan insian ya inmarawi ed dalin na Nephi, ed limog na saray Lamanite—

13 Tan makaseñgeg ed saya a baleg a karelmeñgan da, tan say baleg a panagpasirayew da ed biskeg da a dili, sikara so atilak ed biskeg da a dili; dia ed ontan sikara so ag inmaliguas, balet sikara so apairap tan abakbak, tan adagdag ed arap na saray Lamanite, anga ed abalang da so pankayarian ed amin lawari a dalin da.

14 Balet nia, si Moronihah dakel a beñgatla so impulong to ed saray totoo makaseñgeg ed karelmeñgan da, tan ontan met nen Nephi tan si Lehi, a sikara so lalaki ya anak nen Helaman, sikara so nampulong na dakel a beñgatla ed saray totoo, on, tan sikara so namprofesiya na dakel a beñgatla ed sikara nipaakar ed karelmeñgan da, tan no anto so onsabi ed sikara no ag ira mambabawi ed saray kasalanan da.

15 Tan agawa a sikara so nambabawi, tan unong a sikara so nambabawi sikara so ginmapo ya inmaliguas.

16 Tan sanen anengneng nen Moronihah a sikara so nambabawi sikara so inwanwan to ya onla ed sakey a pasen ya anga ed sananey, tan manlapu ed sakey a ciudad ya anga ed sananey a ciudad, anga ed impakabawi ra na kapaldua ed saray kayarian da tan kapaldua ed amin a dalin da.

17 Tan dia ed onia so impansampot na komaanemaplo tan sakey a taon ya oley na saray okom.

18 Tan agawa a dia ed komaanemaplo tan dua a taon ya oley na saray okom, si Moronihah ag to la nagamoran so saray kayarian da a wala ed saray Lamanite.

19 Dia ed ontan pinaulyan da la so plano ra a pañgala ed saray nakekeraan ni a dalin da, agay la so karakel na saray Lamanite kanian nanmaliw ya angapo so pakagawa na saray Nephite a pakagamor na pakapanyari ed sikara; dia ed ontan inkana nen Moronihah so amin a ñgayew to pian napagnayon to so saraman so kabiañgan ya abawi ra.

20 Tan agawa, lapu ed karakel na bilang na saray Lamanite wala so baleg a takot na saray Nephite, ag la piga sikara so natalo ra, tan gatin-gatinan da ra, tan pateyen da ra, tan deralen da ra.

21 On, ginapoan da a nanunotan so saray profesiya nen Alma, tan ontan met ed saray salita nen Mosiah; tan anengneng da a sikara so totoo a matalker a teñger da, tan impasen da ya angapo so kana na saray gangan na Dios.

22 Tan inuman da tan ginatin-gatinan da na saray sali ra so saray gangan nen Mosiah, odino say ingangan na Katawan ed sikato ya iter to ed saray totoo; tan anengneng da a saray gangan so nanmaliw a nauman, tan sikara so nanmaliw a marelmeng a totoo, a dia ed say a sikara so nanmaliw a marelmeng a siñga saray Lamanite.

23 Tan lapu ed karelmeñgan da say simbaan so linmasay; tan ginapoan da so ag manisia ed espiritu na profesiya tan dia ed espiritu na puyan; tan say tutol na Dios sankanengneng to ra ed lupa.

24 Tan anengneng da a sikara so kinmapoy, a siñga saray kaagian da, a Lamanite, tan say Espiritu na Katawan so ag to la ra iniagel; on, saya so inmoyos la ed sikara makaseñgeg say Espiritu na Katawan so ag manayam ed aliwa a masanto a templo—

25 Dia ed ontan say Katawan tinondaan to ra ya iagel ed panamegley na makapakelaw tan andi-kapara a pakapanyari to, lapu ed sikara so naplag ed kipapasen na ag-pananisia tan makapataktakot a karelmeñgan; tan anengneng da a saray Lamanite so mas dakerakel a maong nen say sikara, tan likud no sikara so ompeket ed Katawan a Dios da andi-saew ya ompatey ira.

26 Tan nia, anengneng da a say biskeg na saray Lamanite so siñga kinabaleg na biskeg da, angan too tan too. Tan dia ed onia sikara so naplag ed saya a baleg a kasalanan; on, dia ed onia sikara so nanmaliw a makapoy, lapu ed saray kasalanan da, dia ed baetan na aliwa a dakel a taon.