1 Nia, natan agawa ed komaanemaplo tan siam a taon ya oley na saray okom ed saray totoo na Nephite, si Nephi, say laki ya anak nen Helaman, so pinmawil ed dalin na Zarahemla a nanlapu ed dalin a mamabaybay.

2 Tan sikato so linma ed saray totoo a manaayam ed dalin a mamabaybay, tan impulong to so salita na Dios ed sikara, tan namprofesiya na dakel a beñgatla ed sikara;

3 Tan ag da inawat so amin a salita to, kanian sikato so ag nanayam ed limog da, balet sikato so pinmawil lamet ed dalin a nianakan to.

4 Tan dia ed impakanengneng to ed saray totoo ed kipapasen a makapataktakot a karelmeñgan, tan saraman so matatakew a Gadianton so akapasen ed saray yuroñgan na panañgokoman—tan sinamsam da so pakapanyari tan pakaoley ed dalin; ya impaliis da so saray gangan na Dios, tan angapo so angan melag a kamaoñgan a ginawa ra ed arapan to; tan sikara so ag nangawa na kaptekan ed saray anak na totoo;

5 Dinusa ra so saray matunong lapu ed inkamatunong da, tan pinaulyan da so saray nankasalanan tan saray marelmeng ya ag-nadusa makaseñgeg ed kuarta ra; tan nagkalalo ni sikara so impasen da a pañgulo na oley, pian sikara so manoley unong ed kaliktan da, pian sikara so makagamor na gungona tan gloria na mundo, tan, nagkalalo ni, pian mainomay da so mangawa na panagkamalala, tan panagtakew, tan panagpatey, tan mangawa ra na unong ed dili a saray kaliktan da—

6 Natan saya a baleg a kaugsan so sinmabi ed saray Nephite, ed baetan na aliwa a dakel a taon; tan sanen saya so anengneng nen Nephi, say puso to so napno na ermen ed dalem na pagew to; tan inkuan to ed maniirap a kamarerua to:

7 O, no komon saray agew ko so wala ed saray agew sanen si amak a Nephi so unaan a pinmaway ed dalin na Jerusalem, pian siak komon so akigayaga ed sikato ed dalin a sipan; a sanen saman saray totoo to mainomay ira a bañgatan, malet so panañgonor da ed saray gangan na Dios, tan matantan ira a mangawa na karelmeñgan; tan masiglat ira ya ondeñgel ed saray salita na Katawan—

8 On, no komon saray agew ko dia ed saraman ya agew, dia ed ontan say kamareruak so awalaan na gayaga ed inkamatunong na saray kaagian ko.

9 Balet nia, siak so nigena a saraya so agew ko, tan say kamareruak so napano na ermen lapu ed karelmeñgan na saray kaagian ko.

10 Tan nia, natan saya so agawa diman ed tori, a wala ed tanamanan nen Nephi, a saya so asinger ed dalan ya onarap ed sankabalegan a tindaan, a saya so wala ed ciudad na Zarahemla; dia ed ontan, si Nephi so yinmuko ed tori a wala ed tanamanan to, a saya a tori so asinger ed loluoban na tanamanan ya onarap ed baleg a dalan.

11 Tan agawa a wala so saray pigara a totoo ya onlalabas tan anengneng da si Nephi ya iiter to so kamarerua to ed Dios diman ed tori; tan sikara so binmatik tan imbaga ra ed saray totoo so nipaakar ed anengneng da, tan dinmago so saray totoo ed baleg a tipon pian nakabatan da so señgegan na ontan la a paneermen lapu ed karelmeñgan na saray totoo.

12 Tan natan, sanen tinmalindeg si Nephi anengneng to so dakerakel a totoo ya atiptipon.

13 Tan agawa a binisuat to so sañgi to tan inkuan to ed sikara: Nia, akin atiptipon kayo ed inkasikayo? Pian ibagak ed sikayo so nipaakar ed saray karelmeñgan yo?

14 On, lapu ed siak so linma ed torik pian iter ko so kamareruak ed Dios ko, lapu ed mapalalo ya ermen na pusok, a say makaseñgeg saray karelmeñgan yo!

15 Tan lapu ed paneermen ko tan pandageyem ko kanian nantitipon kayo, tan sikayo so mankelaw; on, tan wala so baleg a pankaukolan yo ya onkelaw; on, nepeg yo so onkelaw lapu ed sikayo so nisian kanian say demonyo awalaan na malet a bemben ed saray puso yo.

16 On, panon ya initer yo so dalan na panagayat na saman a panseseetan to ya alaen so saray kamarerua yo ed kaaraleman na andi-angaan a kaermenan tan andi-angaan ya inkaabagey?

17 O mambabawi kayo, mambabawi kayo! Akin nakaukolan ni ya ompatey kayo? Pawil kayo, pawil kayo ed Katawan a Dios yo. Akin sikayo so inkaindan to?

18 Say makaseñgeg lapu ed pinaawet yo so saray puso yo; on, ag yo dineñgel so voces na maong a managpastol; on, sikato so sinugsogan yo a mamasnok sumpa ed sikayo.

19 Tan nia, imbes a sikayo so tiponen to, likud no sikayo so mambabawi, nia, sikayo so itaytayak to pian manmaliw kayo a karne na saray aso tan saray monanakap.

20 O, panon so pañgilingwan yo ed Dios yo dia ed saman ya agew a sikato so añgilaban ed sikayo?

21 Balet nia, say makaseñgeg say pakaala yo na gungona, pian dayewen kayo na saray totoo, on, tan pian makaala kayo na balitok tan pilak. Tan inteen yo so saray puso yo ed saray kayamanan tan andi-kakanaan a beñgatla na mundo, a makaseñgeg ed saraya sikayo so mampapatey, tan mantutulisan, tan mantatakew, tan mantatasi ed aliwa a tua sumpa ed kaabay yo, tan mangagawa kayo na amin a nengneng na karelmeñgan.

22 Tan makaseñgeg ed saya, gonigon so onsabi ed sikayo likud no sikayo so mambabawi. Tan no sikayo so ag mambabawi, nengneng yo, saya a baleg a ciudad, tan ontan met ed saraman so ankakabaleg a ciudad a wala ed kaliber-liber, a saraya so wala ed dalin a kayarian tayo, so naekal pian angapo so pasen yo ed saraya; tan nia, say Katawan ag to initer ed sikayo so biskeg, a siñga unong ed ginawa to, pian makatalindeg kayo sumpa ed saray kabusol yo.

23 Tan nia, onia so kuan na Katawan: Ag ko ipanengneng ed saray marelmeng so biskeg ko, ed sakey a nagkalalo nen say sananey, likud ed saraman so mambabawi ed saray kasalanan da, tan ondeñgel ed saray salitak. Natan dia ed ontan, pirawat ko a sikayo so onnengneng, kaagian ko, a magmaong ni so saray Lamanite nen say sikayo likud no sikayo so mambabawi.

24 Tan nia, sikara so lalo a matunong nen say sikayo, lapu ed ag ira nankasalanan sumpa ed saman so baleg a kakabatan a naawat yo; dia ed ontan say Katawan so mapañgasi ed sikara; on, padukeyen to so saray agew da tan parakelen to so saray boleg da, anga ed sano sikayo so sigpot a naderal likud no sikayo so mambabawi.

25 On, abagey kayo lapu ed saman so baleg a karumsisan a sinmabi ed limog yo; tan intipon yo so inkasikayo ed saya, on, ed saman so maamot ya olop ya inletneg nen Gadianton!

26 On, inkaabagey so onsabi ed sikayo lapu ed saman so kinon a pinaulyan yo ya onloob ed saray puso yo, a saya so añgipaatagey ed sikayo ed labas na kaabigan lapu ed mapalalo a kinabaleg na kayamanan yo!

27 On, abagey kayo lapu ed karelmeñgan yo tan saray karumsisan yo!

28 Tan likud no sikayo so mambabawi sikayo so ompatey; on, angan saray dalin tayo so naala ed sikayo, tan sikayo so naderal ed tapew na dalin.

29 Nia natan, ag ko ikuan a saraya a beñgatla so onsabi, unong ed siak, ya aliwa a lapu ed siak a dili kanian kabat ko so saraya a beñgatla; balet nia, amtak so saraya a beñgatla so tua lapu ed say Katawan a Dios so añgipakabat ed siak, dia ed ontan paneknekan ko a saraya so nagawa.