1 Tan natan, inararok a kaagian, nia, ibawag ko ed sikayo likud no sikayo so mambabawi saray kaaboñgan yo so nataynan ya angapo so manayam.

2 On, likud no sikayo so mambabawi, saray kaasawaan yo wala so baleg a señgegan a sikara so onermen ed agew a sikara so mampasuso; tan salien yo so ombatik tan angapo so pasen a napansalimbeñgan; on, tan abagey ed saraman so wala so anak, tan sikara so ambelat tan ag ira makabatik, dia ed ontan, sikara so nagatin-gatinan tan natilak ira ya ompatey.

3 On, abagey so saya a totoo a sikara so tatawagen a totoo nen Nephi likud no sikara so mambabawi, sano nanengneng da so saraya ya amin a pakapatnagan tan pakelaw a saraya so nipanengneng ed sikara; tan nia, sikara so apili a totoo na Katawan; on, saray totoo nen Nephi so inaro to, tan ontan met dinusa to ra; on, dia ed agew na saray karelmeñgan da sikara so dinusa to lapu ed inaro to ra.

4 Balet nia kaagian ko, saray Lamanite so binusol to lapu ed saray kagagawa ra a mauges ya andi-tonda, tan saya so lapu ed karelmeñgan na sisia a tawir na kaamaan da. Balet nia, say kilalaban so sinmabi ed sikara lapu ed impampulong na saray Nephite; tan lapu ed saya a gagala say Katawan pinarukey to so saray agew da.

5 Tan pilalek ko a nengneñgen yo a say babaleg a kabiañgan da so wala ed dalan na susumpalen da, tan sikara so mankokurang a maalwar ed arap na Dios, tan susumpalen da so saray gangan to tan saray tutuntonen to tan saray panañgokom to unong ed gangan nen Moises.

6 On, ikuan ko ed sikayo, a say babaleg a kabiañgan da saya so gagawaen da, tan pansasagpotan da ed andi-kesaw a seet pian naawit da so saray nakdaan ni a kaagian da ed pikakabat na katuaan; dia ed ontan wala so dakel ya onaarum ed saray bilang da ya inagew-agew.

7 Tan nia, kabat yo ed inkasikayo a dili, lapu ed naimatonan yo so saya, tan no kaonoñgan so kinarakel na saray naaawit ed pikakabat na katuaan, tan makapikabat ed saray marelmeng tan marumsis a sisia a tawir na kaamaan da, tan sikara so nitunton a manisia ed saray masanto a kasulatan, on, dia ed saray profesiya na saray masanto a profeta, a saraya so nisulat, a saya so añgiwanwan ed sikara ed pananisia ed Katawan, tan dia ed pambabawi, a saya a pananisia tan pambabawi so añgawit na inkaoman na puso ed sikara—

8 Dia ed ontan, no kaonoñgan so kinarakel na saray akarapat ed saya, kabat yo ed inkasikayo a dili a sikara so malet tan ag-nagiing ed say pananisia, tan dia ed beñgatla a señgegan na impanmaliw da a bulos.

9 Tan kabat yo met ya inkutkot da so saray agamil da ed bakal, tan antakot da la ya alaen so saraya ag la piga a dia ed antokaman a pamaakaran sikara so makapankasalanan; on, anengneng yo ya antakot da so mankasalanan—tan nia lablabayen da la a sikara so nagatin-gatinan tan pateyen na saray kabusol da, tan ag da itagey so saray espada da sumpa ed sikara, tan saya so lapu ed pananisia ra ed si Cristo.

10 Tan natan, lapu ed ag ira nagiing sanen anisia ra ed saman a beñgatla a sisiaen da, lapu ed elet da ed bekta a sikara so aliwawaan, nia, bendicionan ira na Katawan tan parukeyen to so saray agew da, manwari ya ontan a wala so saray karelmeñgan da—

11 On, angan sikara so onlasay ed ag-pananisia say Katawan parukeyen to so saray agew da, anga ed isabi na panaon a saya so sinalita na kaamaan tayo, tan ontan met nen profeta Zenos, tan dakerakel ni a profeta, nipaakar ed kipawil na saray kaagian tayo, saray Lamanite, ed pikakabat lamet ed katuaan—

12 On, ikuan ko ed sikayo, a dia ed saray kaunoran a panaon saray sipan na Katawan so niiter met ed saray kaagian tayo, saray Lamanite; tan angaman ontan a dakel so kairapan ya onsabi ed sikara, tan angaman sikara so nadagdag diman tan dia ed tapew na dalin, tan sikara so anupan, tan sikara so nabakbak tan natayak ed arawi a pasen, ya angapo so pasen a napansalimbeñgan da, say Katawan so manmaliw a mapañgasi ed sikara.

13 Tan saya so unong ed say profesiya, a sikara so naawit lamet ed tua a kakabatan, a saya so pikakabat ed Mananundon da, tan saman so baleg tan matua a managpastol da, tan sikara so nibilang ed limog na saray karnero to.

14 Dia ed ontan ikuan ko ed sikayo, a magmaong ni ra nen say sikayo, likud no sikayo so mambabawi.

15 Tan nia, no saray makapakelaw a kimey so nipanengneng ed sikara a saraya so nipanengneng ed sikayo, on, ed saraman so linmasay ed ag-pananisia makaseñgeg ed saray sisia a tawir na kaamaan da, nanengneng yo ed inkasikayo a dili a kapiganman ag la ra onlasay ed ag-pananisia.

16 Dia ed ontan, inkuan na Katawan: Ag ko ra sigpot a deralen, balet gawaen ko dia ed agew na kakabatan ko a sikara so ompawil lamet ed siak, inkuan na Katawan.

17 Tan natan nia, inkuan na Katawan, nipaakar ed saray totoo a Nephite: No sikara so ag mambabawi, tan onoren da so linawak, sigpot ko ra a deralen, kuan na Katawan, lapu ed ag da pananisia angaman ontan a dakel so saray ankakabaleg a kimey a ginawak ed limog da; tan unong ya andi so duarua a say Katawan so mabilay saraya ya amin a beñgatla so onia, inkuan na Katawan.